ເວັບໄຊຂ່າວ ມະຕິຊົນ ລາຍງານວ່່າ ທ່ານ ຫວັງ ເຫວິນປິນ ໂຄສົກກະຊວງການຕ່າງປະເທດຈີນ ເປີດເຜີຍເມື່ອວັນທີ 22 ກໍລະກົດນີ້ວ່າ ອາເມລິກາໄດ້ເພີ່ມລະດັບຄວາມຕຶງຄຽດໃນຄວາມຂັດແຍ້ງລະຫວ່າງສອງປະເທດຢ່າງບໍ່ເຄີຍມີມາກ່ອນດ້ວຍການສັ່ງປິດສະຖານກົງສູນຈີນ ໃນເມືອງຮຸສຕັນ ລັດເທັກຊັສ ລົງຢ່າງກະທັນຫັນໃນວັນທີ 21 ກໍລະກົດ ທີ່ຜ່ານມາ ໂດຍທາງກະຊວງການຕ່າງປະເທດສະຫະລັດອາເມລິກາໄດ້ໃຫ້ເຫດຜົນວ່າ ເພື່ອປ້ອງກັນຊັບສິນທາງປັນຍາຂອງອາເມລິກາ ແລະ ຂໍ້ມູນສ່ວນຕົວຂອງຄົນອາເມລິກາ.
ທ່ານ ຫວັງ ເຫວິນປິນ ໄດ້ກ່າວປະນາມການຕັດສິນໃນດັ່ງກ່າວ ແລະ ເບິ່ງວ່າສິ່ງທີ່ກີດຂຶ້ນນີ້ເປັນການກະທຳທີ່ບໍ່ເໝາະສົມ ເພາະມັນອາດເຮັດໃຫ້ຄວາມສຳພັນລະຫວ່າງ 2 ປະເທດຕຶງຄຽດຂຶ້ນກວ່າເກົ່າ ແລະ ຍັງໄດ້ເຕືອນວ່າອາເມລິກາຈະໄດ້ຮັບມາດຕະການຕອບໂຕ້ຈາກຈີນ ຖ້າຫາກຍັງບໍ່ປ່ຽນໃຈ ຫຼື ຍົກເລີກການກະທຳເຫຼົ່ານີ້.
ດ້ານ ທ່ານ ຫູ ຊີຈິນ ບັນນາທິການໜັງສືພິມໂກລບອລທາມ ສື່ກະບອກສຽງຂອງຈີນ ໄດ້ມີການທະວິດຂໍ້ຄວາມວ່າ ອາເມລິກາໃຫ້ເວລາລັດຖະບານຈີນ 72ຊົ່ວໂມງໃນການປິດສະຖານກົງສຸນໃນເມືອງຮຸສຕັນ.
ທະວີດດັ່ງກ່າວມີຂຶ້ນຫຼັງຈາກທີ່ເຈົ້າໜ້າທີ່ດັບເພີງ ແລະ ຕຳຫຼວດຂອງເມືອງຮຸສຕັນລົງພື້ນທີ່ສະຖານກົງສູນ ຫຼັງໄດ້ຮັບລາຍງານວ່າມີການຈູດເຈ້ຍໃນຕູ້ຄອນເທນເນີຫຼາຍຕູ້ທີ່ເປີດຢູ່ ດ້ານໃນຂອງສະຖານກົງສູນຈີນ ໃນເມືອງຮຸສຕັນ ໂດຍທີ່ເຈົ້າໜ້າທີ່ສະຫະລັດບໍ່ໄດ້ຮັບອະນຸຍາດໃຫ້ເຂົ້າໄປຂ້າງໃນ. ແລະສື່ທ້ອງຖິ່ນລາຍງານວ່າບໍ່ມີໃຜໄດ້ຮັບບາດເຈັບຫຼືເສຍຊີວິດໃນເຫດການດັ່ງກ່າວ. ໃນຂະນະທີ່ສື່ບາງສຳນັກລາຍງານວ່າ ການຈູດເຈ້ຍດັ່ງກ່າວແມ່ນເປັນການຈູດເຈ້ຍເອກະສານທີ່ເຈົ້າໜ້າທີ່ສະຖານກົງສູນຈີນບໍ່ຕ້ອງການນຳເອົາກັບປະເທດ.
ຮຽບຮຽງຂ່າວ: ພຸດສະດີ