ກະຊວງການຕ່າງປະເທດແຫ່ງ ສປປ ລາວ ລາຍງານວ່າ ໃນວັນທີ 16 ມິຖຸນາ 2020 ຜ່ານມາ, ທ່ານ ຈ່ຽງ ຈາຍຕົ່ງ, ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໄດ້ໂອ້ລົມຜ່ານໂທລະສັບກັບ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ເຊິ່ງໄດ້ແລກປ່ຽນຄໍາຄິດເຫັນ ກ່ຽວກັບ ບັນຫາໃນການພົວພັນຮ່ວມມື ລາວ-ຈີນ ເປັນຕົ້ນແມ່ນ ການໄປມາຫາສູ່ກັນຂອງການນຳຂັ້ນສູງ, ການຮ່ວມມືກ່ຽວກັບການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19, ມາດຕະການຜ່ອນຜັນສຳລັບການເດີນທາງທີ່ຈຳເປັນ, ການອຳນວຍຄວາມສະດວກໃຫ້ການປະຕິບັດບັນດາໂຄງການຮ່ວມມືທີ່ສໍາຄັນ ພາຍໃຕ້ເງື່ອນໄຂສືບຕໍ່ປ້ອງກັນພະຍາດໂຄວິດ-19 ຢ່າງເປັນປົກກະຕິ.
ໃນໄລຍະຜ່ານມາ, ສອງປະເທດໄດ້ບັນລຸໝາກຜົນທີ່ສໍາຄັນຮ່ວມກັນໃນການປ້ອງກັນເຊື້ອພະຍາດໂຄວິດ-19 ແລະ ໃນຕໍ່ໜ້າ, ເພື່ອອຳນວຍຄວາມສະດວກໃຫ້ແກ່ການຟື້ນຟູການຜະລິດ ແລະ ການພັດທະນາເສດຖະກິດສັງຄົມຂອງສອງຝ່າຍ, ການປະຕິບັດໂຄງການຮ່ວມມືທີ່ສໍາຄັນຕ່າງໆ, ສອງຝ່າຍໄດ້ແລກປ່ຽນບາງບັນຫາດັ່ງລຸ່ມນີ້:
- ຝ່າຍລາວຈະຮັບໄປພິຈາລະນາ ຂໍ້ສະເໜີຂອງຝ່າຍຈີນກ່ຽວກັບການເປີດ “ຊ່ອງທາງສີຂຽວ” ສຳລັບການເດີນທາງທີ່ມີຄວາມຈຳເປັນຮີບດ່ວນ ລະຫວ່າງ ລາວ-ຈີນ, ຈີນ-ລາວ.
- ສຳລັບບໍລິສັດຂອງ ຈີນ ທີ່ໄດ້ຮັບອະນຸຍາດໃຫ້ດໍາເນີນທຸລະກິດ ຫຼື ມີໂຄງການ ຢູ່ ສປປ ລາວ ທີ່ມີຈຸດປະສົງຈະນໍາເອົາພະນັກງານເຂົ້າມາເຮັດວຽກໃນໂຄງການຂອງຕົນ ແມ່ນໃຫ້ດໍາເນີນການຕາມຂັ້ນຕອນປົກກະຕິ ໂດຍສະເໜີຜ່ານຂະແໜງການທີ່ກ່ຽວຂ້ອງ ແລະ ໄດ້ຮັບການອະນຸມັດ ວີຊ່າ ຈາກກະຊວງການຕ່າງປະເທດແລ້ວ ຈຶ່ງສາມາດໄປຂໍ ວີຊ່າ ຢູ່ ສະຖານທູດ ແລະ ສະຖານກົງສູນໃຫຍ່ ແຫ່ງ ສປປ ລາວ ປະຈໍາ ສປ ຈີນ, ອາດຈະຂໍເປັນລາຍບຸກຄົນ ຫລື ເປັນກຸ່ມກໍ່ໄດ້.
- ຝ່າຍຈີນ ເຫັນດີຈະຕັ້ງໜ້າຄົ້ນຄວ້າມາດຕະການອໍານວຍຄວາມສະດວກໃຫ້ແກ່ຄະນະຜູ້ແທນທາງການ ແລະ ບຸກຄົນຂອງລາວທີ່ມີຄວາມຈຳເປັນເດີນທາງໄປຈີນອີກດ້ວຍ.
- ສປ ຈີນ ຈະສືບຕໍ່ຮ່ວມມືກັບ ສປປ ລາວ ຢ່າງໃກ້ຊິດ ແລະ ກຳລັງພິຈາລະນາໃຫ້ການຊ່ວຍເຫຼືອຕື່ມສຳລັບວຽກງານປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ເພື່ອບໍ່ໃຫ້ກັບມາລະບາດຮອບໃໝ່ຕາມການສະເໜີຂອງກະຊວງສາທາລະນະສຸກລາວ.
ຮຽບຮຽງຂ່າວ: ພຸດສະດີ