ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 08 ມິຖຸນາ 2020
ການຕິດຕາມຜູ້ເດີນທາງຈາກຈຸດຜ່ານແດນຕ່າງໆ
ຈໍານວນຜູ້ເດີນທາງເຂົ້າມາມີທັງໝົດ 1,466 ຄົນ: ຈຸດຜ່ານດ່ານລາວ-ໄທ 756 ຄົນ ລາຍລະອຽດດັ່ງລຸ່ມນີ້:ຜ່ານດ່ານຂົວມິດຕະພາບແຫ່ງທີ II ມີແຮງງານລາວ 46 ຄົນ(ມີຖິ່ນຖານມາຈາກສະຫວັນນະເຂດ 38 ຄົນ, ຄຳມ່ວນ 05 ຄົນ, ນະຄອນຫຼວງ 02 ຄົນ ແລະ ຈຳປາສັກ 01 ຄົນ); ຜ່ານດ່ານຂົວມິດຕະພາບ III ມີແຮງງານ 27 ຄົນ (ມີຖິ່ນຖານມາຈາກຄຳມ່ວນ 25 ຄົນ ແລະ ສະຫວັນນະເຂດ 02 ຄົນ); ແຮງງານລາວເຂົ້າມາຜ່ານດ່ານວັງເຕົ່າ-ຊ່ອງເມັກມີ 76 ຄົນ (ມີຖິ່ນຖານມາຈາກຈຳປາສັກ 56 ຄົນ, ສາລະວັນ 12 ຄົນ, ສະຫວັນນະເຂດ 06 ຄົນ ແລະ ນະຄອນຫຼວງ 02 ຄົນ); ເຫຼືອນັ້ນແມ່ນຄົນຂັບລົດສົ່ງສິນຄ້າ 607 ຄົນ.
ຈຸດຜ່ານດ່ານລາວ -ຈີນ 16 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ. ຈຸດຜ່ານດ່ານລາວ- ຫວຽດນາມ 622 ຄົນ, ໃນນັ້ນມີຄົນລາວກັບມາແຕ່ປິ່ນປົວ 02 ຄົນຜ່ານດ່ານນໍ້າພາວ, ແຂວງ ບໍລິຄຳໄຊ, ເຫຼືອນັ້ນແມ່ນຄົນຂັບລົດສົ່ງສິນຄ້າ 620 ຄົນ. ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 72 ຄົນ, ໃນນັ້ນ ມີແຮງງານຈີນ 70 ຄົນແລະຄົນລາວ 02 ຄົນ.
ທຸກຄົນໄດ້ແທກອຸນຫະພູມຮ່າງກາຍ, ກວດຫາອາການຜິດປົກກະຕິ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ (ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ
ໃນວັນທີ 08 ມິຖຸນາ 2020, ໄດ້ເກັບຕົວຢ່າງມາກວດວິເຄາະທັງໝົດ 319 ຄົນ, ໃນນັ້ນ ແຮງງານລາວກັບມາແຕ່ໄທ 227 ຄົນ, ແຮງງານຈີນ 77 ຄົນ, ກໍລະນີສົງໄສ 14 ຄົນແລະຜູ້ຕິດເຊື້ອນອນປິ່ນປົວຢູ່ໂຮງໝໍມິດຕະພາບ 01 ຄົນ(ກໍລະນີທີ 07). ຜົນກວດຂອງ ແຮງງານລາວ, ແຮງງານຈີນ ແລະ ກໍລະນີສົງໄສ ທີ່ກວດມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 08 ມິຖຸນາ 2020 ບໍ່ມີຜູ້ຕິດເຊື້ອໃໝ່.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 08 ມິຖຸນາ 2020 ໄດ້ເກັບຕົວຢ່າງມາກວດທັງໝົດ 8,926 ຕົວຢ່າງ, ກວດພົບເຊື້ອສະສົມ 19 ຄົນ (58 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
ການຕິດຕາມຜູ້ຖືກຈຳກັດບໍລິເວນຢູ່ໃນສະຖານທີ່ ທີ່ກຳນົດໄວ້ໃນຂອບເຂດທົ່ວປະເທດ ແລະ ການຕິດຕາມປີ່ນປົວຄົນເຈັບຢູ່ໂຮງໝໍ
ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 80 ສູນ, ມີຜູ້ຖືກຈຳກັດບໍລິເວນຢູ່ສູນ 3,262 ຄົນ, ໄດ້ເກັບຕົວຢ່າງມາກວດວິເຄາະທັງໝົດແລະ ບໍ່ພົບຜູ້ຕິດເຊື້ອ. ປະຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 01ຄົນ, ເປັນເພດຊາຍ ເຊິ່ງຈະໄດ້ສືບຕໍ່ຕິດຕາມຢູ່ໂຮງໝໍດັ່ງກ່າວຕື່ມ.
ສະພາບການລະບາດຂອງບັນດາປະເທດໃກ້ຄຽງ ແລະ ໃນໂລກ
ມາຮອດເວລາ 6:00 ໂມງເຊົ້າ ຂອງວັນທີ 09 ມິຖຸນາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ). ມີການຢັ້ງຢືນຜູ້ຕິດເຊື້ອພະຍາດCOVID-19 ແມ່ນ 7,182,933 (104,353 ໃໝ່), ເສຍຊິວິດ408,015(3,054 ໃໝ່) ເຊິ່ງກວມເອົາ 5.68 % ຂອງຜູ້ຕິດເຊື້ອທັງໝົດ, ປີ່ນປົວຫາຍດີ 3,506,341 (53,289ໃໝ່) ເຊິ່ງກວມເອົາ 48.8 % ຂອງຜູ້ຕິດເຊື້ອທັງໝົດ.
ປະເດັນສຳຄັນ ແມ່ນຍັງມີການລະບາດເປັນວົງກວ້າງຢູ່ໃນ ທະວີບອາເມລິກາ ແລະ ທະວີບເອີຣົບ, ມີບາງປະເທດ ຈໍານວນຜູ້ຕິດເຊື້ອໃນວັນດຽວ ແມ່ນມີເຖິງ 17,928 ຄົນ(ອາເມຣິກາ)ແລະ ບາງປະເທດເສຍຊີວິດເຖິງ 723 ຄົນ(ບຣາຊິວ) ຕໍ່ມື້.
ໃນບັນດາກຸ່ມປະເທດອາຊຽນມາຮອດເວລາ 6:00 ໂມງເຊົ້າຂອງວັນທີ 09 ມິຖຸນາ ມີການຢັ້ງຢືນ ຜູ້ຕິດເຊື້ອພະຍາດ COVID-19 ແມ່ນ 105,113 (1,831 ໃໝ່), ເສຍຊີວິດ 3,102 ຄົນ, ຍັງມີບາງປະເທດທີ່ມີອັດຕາການຕິດເຊື້ອໃໝ່ສູງເຖິງ 847ຄົນ (ອິນໂດເນເຊຍ) ຕໍ່ມື້. ມື້ວານນີ້ເສຍຊີວິດໃນປະເທດອາຊຽນທັງໝົດ 40 ຄົນ.