ບໍລິສັດ ລົງທຶນພະລັງງານເອໂວລູຊັ່ນ (EPIC) ປະເທດສິງກະໂປ ແລະ ບໍລິສັດ ຄູນມີໄຊກໍ່ສ້າງ ແລະ ສ້ອມແປງຂົວ-ທາງ (KMX) ໄດ້ຮັບອະນຸຍາດຈາກລັດຖະບານລາວ ໃຫ້ດຳເນີນການຄົ້ນຄວ້າສຶກສາຄວາມເປັນໄປໄດ້ດ້ານເສດຖະກິດ ສັງຄົມ ແລະ ສິ່ງແວດລ້ອມ ຂອງໂຄງການໂຮງງານຜະລິດໄຟຟ້າພະລັງຄວາມຮ້ອນ ຂະໜາດ 1.000 ເມກາວັດ ຢູ່ເມືອງດາກຈຶງ ແຂວງເຊກອງ ໂດຍມີມູນຄ່າລົງທຶນ 1,7 ຕື້ໂດລາສະຫະລັດ ຫຼື ປະມານ 15.301 ຕື້ກີບ ຄາດວ່າຈະໃຫ້ສຳເລັດໃນປີ 2027 ເພື່ອການຜະລິດກະແສໄຟຟ້າຕະຫຼອດປີ ສຳລັບການສົ່ງອອກໄປປະເທດໄທ ຫວຽດນາມ ກຳປູເຈຍ ແລະ ສະໜອງໃຫ້ພາຍໃນ.
ພິທີລົງນາມບັດບົນທຶກຄວາມເຂົ້າໃຈໂຄງການດັ່ງກ່າວ ຈັດຂຶ້ນວັນທີ 27 ພຶດສະພາຜ່ານມາ ຢູ່ກະຊວງແຜນການ ແລະ ການລົງທຶນ ລະຫວ່າງທ່ານນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ຈັນສອນ ແສນບຸດຕະລາດ ຮອງລັດຖະມົນຕີກະຊວງພະລັງງານ-ບໍ່ແຮ່ ແລະ ທ່ານ ຄຳຕັນ ພົມມະທັດ ຮອງປະທານ KMX ຕາງໜ້າໃຫ້ບໍລິສັດຮ່ວມທຶນ EPIC-KMX ມີພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ດອນ ລິມ ຜູ້ອຳນວຍການໃຫຍ່ EPIC ປະເທດສິງກະໂປ ກ່າວວ່າ: ພວກເຮົາມີຄວາມກະຕືລືລົ້ນຢ່າງຍິ່ງ ທີ່ໄດ້ບັນລຸຫຼັກໝາຍສຳຄັນ ໃນການພັດທະນາໂຄງການນີ້ ຮ່ວມກັບລັດຖະບານລາວ ແລະ ເຊື່ອໝັ້ນວ່າ ພວກເຮົາຈະສາມາດສະໜອງການຊ່ວຍເຫຼືອ ບໍ່ພຽງແຕ່ຂະແໜງການພະລັງງານໃນປະເທດ ແຕ່ຍັງສາມາດສະໜອງໃຫ້ຕະຫຼາດຕ່າງໆໃນພາກພື້ນ ໂດຍອີງໃສ່ຄວາມບໍ່ພຽງພໍໃນການສະໜອງພະລັງງານໄຟຟ້າທີ່ພົບເຫັນຢ່າງຫຼວງຫຼາຍ ເປັນຕົ້ນ ໃນປະເທດຫວຽດນາມ ພວກເຮົາຂໍສະແດງຄວາມຂອບໃຈລັດຖະບານລາວ ສຳລັບໂອກາດດັ່ງກ່າວ ແລະ ຫວັງວ່າຈະຈັດຕັ້ງປະຕິບັດໂຄງການໄດ້ຕາມມາດຕະຖານທີ່ສູງ.