ສຳນັກຂ່າວ ມະຕິຊົນ ລາຍງານວ່າ ລັດຖະບານສະຫະລັດ ເຮັດຂໍ້ຕົກລົງຊື້ວັກຊີນປ້ອງກັນໂຄວິດ-19 ທີ່ຢູ່ລະຫວ່າງການທົດລອງທາງຄລີນິກ ຈາກບໍລິສັດຢາໃນປະເທດ ອັງກິດ ເປັນທີ່ຮຽບຮ້ອຍແລ້ວ ຈໍານວນ 300 ລ້ານໂດສ ເຖິງວ່າວັກຊີນດັ່ງກ່າວຈະຍັງບໍ່ໄດ້ຮັບການຢືນຢັນວ່າຈະສາມາດໃຊ້ເປັນວັກຊີນປ້ອງກັນໂຄວິດ-19 ໄດ້ແທ້ຫຼືບໍ່.
ລາຍງານລະບຸວ່າ ວັກຊີນນີ້ມີຊື່ວ່າ AZD1222 ເປັນຂອງບໍລິສັດ ແອສຕຣາເຊເນຊາ ບໍລິສັດຢາໃນປະເທດ ອັງກິດ ໂດຍວັກຊີນດັ່ງກ່າວຢູ່ລະຫວ່າງການພັດທະນາໂດຍມະຫາວິທະຍາໄລອ໋ອກຟອດ. ວັກຊີນດັ່ງກ່າວຍັງຢູ່ໃນຂັ້ນຕອນການທົດສອບທີ່ຍັງບໍ່ສາມາດຢືນຢັນໄດ້ວ່າສາມາດໃຊ້ໃນມະນຸດໄດ້ຢ່າງມີປະສິດທິພາບຫຼືບໍ່.
ເຖິງຢ່າງໃດກໍຕາມ, ທ່ານ ໂດນໍ້ ທຣັມ ປະທານາທິບໍດີ ສະຫະລັດອາເມລິກາ ສະແດງຄວາມຕ້ອງການວັກຊີນດັ່ງກ່າວ ເພື່ອໃຫ້ປະຊາຊົນຊາວອາເມລິກາໃຊ້ ໂດຍກະຊວງສາທາລະນະສຸກ ສະຫະລັດໄດ້ເຮັດຂໍ້ຕົກລົງທີ່ຈະສະໜັບສະໜູນ ບໍລິສັດ ແອສຕຣາເຊເນຊາ ໃນການພັດທະນາວັກຊີນດັ່ງກ່າວເປັນເງິນຈໍານວນ 1,200 ລ້ານໂດລາສະຫະລັດ ແລກກັບວັກຊີນ ຈໍານວນ 300 ລ້ານໂດສ ໃຫ້ກັບສະຫະລັດອາເມລິກາ.
ຂໍ້ຕົກລົງດັ່ງກ່າວເປີດທາງໃຫ້ມີການທົດສອບວັກຊີນດັ່ງກ່າວໃນທາງຄລີນິກໃນເຟສທີ 3 ກັບຄົນອາເມລິກາຈໍານວນ 30.000 ຄົນພ້ອມ. ດ້ານບໍລິສັດ ແອສຕຣາເຊເນຊາ ບໍລິສັດຢາທີ່ມີສຳນັກງານໃຫ່ຢູ່ໃນເມືອງ ເຄມບຣິດ ປະເທດ ອັງກິດ ໄດ້ລະບຸວ່າ ໄດ້ເຮັດຂໍ້ຕົກລົງຂາຍວັກຊີນໄປແລ້ສ 400 ລ້ານໂດສ ໂດຍພ້ອມທີ່ຈະສົ່ງສິນຄ້າໃນເດືອນ ກັນຍານີ້.
ວັກຊີນ AZD1222 ເລີ່ມການທົດສອບທາງຄລີນິກເຟສ 1 ແລະ ເຟສ 2 ໄປເມື່ອເດືອນເມສາທີ່ຜ່ານມາ ເພື່ອປະເມີນຄວາມປອດໄພ ແລະ ປະສິດທິພາບໃນການສ້າງພູມຄຸ້ມກັນໃນອາສາສະໝັກອາຍຸ 18-55 ປີ ຈໍານວນ 1.000 ຄົນ ໂດຍຂໍ້ມູນຈາກການທົດສອບດັ່ງກ່າວຄາດວ່າຈະມີການເປີດເຜີຍອອກມາໃນໄວໆນີ້.
ທັງນີ້, ລັດຖະບານສະຫະລັດອາເມລິກາ ເຮັດຂໍ້ຕົກລົງໃນການສະໜັບສະໜູນງົບປະມານໃນການພັດທະນາວັກຊີນກັບຫຼາຍບໍລິສັດ ບໍ່ວ່າຈະເປັນ ຈອນສັນແອນຈອນສັນ, ໂມເດີນາ ແລະ ຊາໂນຟີ ເຊິ່ງນັ້ນກໍສົ່ງຜົນໃຫ້ເກີດຄວາມວິຕົກກັງວົນເຊັ່ນກັນວ່າ ຊາດທີ່ລໍ້າລວຍເທົ່ານັ້ນທີ່ຈະສາມາດເຂົ້າເຖິງວັກຊີນ ເພື່ອນໍາໄປຊ່ວຍປະຊາຊົນໃນປະເທດໄດ້ກ່ອນ.
ຮຽບຮຽບໂດຍ: ລັດສະໝີ ພອນວິໄລ