ຄະນະກຳມາທິການແມ່ນໍ້າຂອງສາກົນ (ຄມສ) ກ່າວວ່າ ລະດັບນໍ້າຂອງໃນຫຼາຍພື້ນທີ່ອ່າງແມ່ນໍ້າຕອນລຸ່ມໄດ້ກັບຄືນສູ່ຄ່າສະເລ່ຍໃນໄລຍະຍາວເປັນປົກກະຕິ ແຕ່ວ່າກໍ່ຍັງຕໍ່າກວ່າລະດັບນໍ້າໃນລະດູແລ້ງຂອງປີ 2018 ແລະ 2019.
ອີງຕາມການຕິດຕາມກວດການໍ້າຂອງ ຄມສ, ປະລິມານຝົນທີ່ຕົກໃນທົ່ວພາກພື້ນແມ່ນໍ້າຂອງໃນເດືອນເມສາທີ່ຜ່ານມາໄດ້ປະກອບສ່ວນເຮັດໃຫ້ລະດັບນໍ້າຂອງໃນປັດຈຸບັນຢູ່ໃນສະພາບປົກກະຕິ.
ຄມສ ຄາດຄະເນວ່າຈະມີປະລິມານຝົນຕົກໃນລະດັບປານກາງຫາໜັກໃນປະເທດລຸ່ມແມ່ນໍ້າຂອງຕອນລຸ່ມທັງ 4 ປະເທດໃນລະຫວ່າງເດືອນ ພຶດສະພາ – ເດືອນ ກໍລະກົດ 2020 ໃນປະເທດກຳປູເຈຍ, ສປປ ລາວ ແລະ ປະເທດໄທ ມີທ່າອ່ຽງທີ່ຈະໄດ້ຮັບຝົນຫຼາຍກວ່າ ສສ ຫວຽດນາມ.
ຄມສ ກ່າວວ່າ ປັດຈຸບັນພາກພື້ນແມ່ນໍ້າຂອງກຳລັງໄດ້ຮັບຜົນກະທົບຈາກການປ່ຽນແປງລະຫວ່າງປະກົດການ EI Nino ແລະ La Nina ເຊິ່ງເປັນການຫຼັບໄປມາລະຫວ່າງການປ່ຽນແປງຂອງອຸນຫະພູມທີ່ອຸ່ນຂອງໜ້ານໍ້າທະເລ ແລະ ອຸນຫະພູມທີ່ເຢັນໃນມະຫາສະໝຸດປາຊີຟິກຕາເວັນອອກ. ການປ່ຽນແປງດັ່ງກ່າວໄດ້ເຮັດໃຫ້ຝົນຕົກໄວກວ່າປົກກະຕິແຕ່ມີການແຈກຢາຍທີ່ບໍ່ສະໝໍ່າສະເໝີ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: ຄະນະກຳມາທິການແມ່ນໍ້າຂອງສາກົນ