ສື່ຕ່າງປະເທດຫຼາຍສຳນັກລາຍງານເມື່ອວັນທີ 1 ພຶດສະພານີ້ວ່າ ປະທານາທິບໍດີ ໂດນັລ ທຣັມ ກ່າວວ່າ ເຂົາໄດ້ເຫັນຫຼັກຖານເຊື້ອໄວຣັດໂຄໂຣນາສາຍພັນໃໝ່ 2019 ຫຼື ໂຄວິດ-19 ເລີ່ມຕົ້ນຂຶ້ນທີ່ຫ້ອງທົດລອງທາງວິທະຍາສາດ (ຫ້ອງແລັບ) ຂອງສະຖາບັນໄວຣັດວິທະຍາອູ່ຮັ່ນ ໃນນະຄອນອູ່ຮັ່ນ ມົນທົນຫູເປີ່ຍ ປະເທດຈີນ ເຊິ່ງເປັນສູນກາງການລະບາດເລີ່ມຕົ້ນຂອງເຊື້ອໄວຣັດເມື່ອເດືອນທັນວາ 2019ທີ່ຜ່ານມາ.
ເດລີເມລໄດ້ເປີດເຜີຍວ່າ ປະທານາທິບໍດີ ໂດນັລ ທຣໍ້າ ໄດ້ໂຍນຂໍ້ກ່າວຫານີ້ໃຫ້ແກ່ຈີນໃນລະຫວ່າງຖະແຫຼງຂ່າວສະຖານະການໂຄວິດ-19 ຕໍ່ສື່ມວນຊົນທີ່ທຳນຽບຂາວ ໃນນະຄອນຫຼວງວໍຊິງຕັນ ດີຊີ ເມື່ອວັນທີ 30 ເມສາທີ່ຜ່ານມາ ໂດຍ ທ່ານ ທຣັມ ກ່າວຫາຈີນວ່າ ເຊື້ອໂຄໂຣນາທີ່ເປັນສາເຫດໃຫ້ມີຄົນທົ່ວໂລກຕິດເຊື້ອເປັນລ້ານໆຄົນ ແລະ ສົ່ງຜົນກະທົບຢ່າງໃຫຍ່ຫຼວງຕໍ່ເສດຖະກິດໂລກນັ້ນ ເລີ່ມຕົ້ນມາຈາກຫ້ອງແລັບຂອງຈີນ ແຕ່ທ່ານ ທຣັມ ກໍ່ບໍ່ໄດ້ເປີດເຜີຍລາຍລະອຽດໃດໆໃນເລື່ອງນີ້ເພີ່ມຕໍ່ນັກຂ່າວ.
ນອກຈາກນັ້ນ, ປະທານາທິບໍດີ ໂດນັລ ທຣັມ ຍັງກ່າວອີກວ່າ ຕົນໄດ້ສະເໜີໃຫ້ລັດຖະບານພິຈາລະນາຫາວິທີການໃນການລົງໂທດຈີນທີ່ເປັນຕົ້ນເຫດເຮັດໃຫ້ເກີດການລະບາດຂອງເຊື້ອໂຄວິດ-19 ດ້ວຍການໃຊ້ມາດຕະການກຳແພງພາສີ, ເກັບພາສີສິນຄ້ານຳເຂົ້າຈາກຈີນເປັນ 1 ລ້ານລ້ານໂດລາເພື່ອເປັນການລົງໂທດທີ່ຈີນເປັນຕົ້ນຕໍການລະບາດຂອງເຊື້ອໂຄວິດ-19 ໃນຄັ້ງນີ້.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: www.thairath.co.th