ສຳນັກຂ່າວສານປະເທດລາວ ລາຍງານໃຫ້ຮູ້ວ່າ ກະຊວງ ແຮງງານ ແລະ ສະຫວັດດີການສັງຄົມ (ຮສສ) ຄາດຄະເນວ່າຈະມີຜູ້ອອກແຮງງານປະມານ 96.174 ຄົນ ທີ່ຢຸດພັກໃນໄລຍະນີ້ ຖ້າຫາກຈະໃຫ້ເງິນອຸດໜູນໄລຍະການຢຸດງານຜູ້ລະ 5 ແສນກີບຕໍ່ເດືອນ ໄລຍະ 2 ເດືອນ (ເດືອນພຶດສະພາ ແລະ ມິຖຸນາ) ຈະຕ້ອງໃຊ້ງົບປະມານຫຼາຍກວ່າ 48 ຕື້ກີບ ຕໍ່ເດືອນ.
ກະຊວງແຮງງານ ແລະ ສະຫວັດດີການສັງຄົມ ໄດ້ນຳສະເໜີບົດລາຍງານຜົນການຄົ້ນຄວ້ານະໂຍບາຍ ແລະ ມາດຕະການຊ່ວຍເຫຼືອກຸ່ມເປົ້າໝາຍ ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ສະບັບເລກທີ 1115/ຮສສ ລົງວັນທີ 11 ເມສາ 2020. ການຄົ້ນຄວ້າແມ່ນອີງໃສ່ພື້ນຖານຜົນສຳຫລວດກຳລັງແຮງງານ ຄັ້ງທີ II ໃນປີ 2017 ມີການຈ້າງງານນອກລະບົບ ຈຳນວນ 269.000 ຄົນ ທີ່ເປັນໄວໜຸ່ມ ແລະ ປະມານ 1.185.000 ຄົນ ເປັນຜູ້ໃຫຍ່, ອາໄສຢູ່ຊົນນະບົດ 869.000 ຄົນ ແລະ ໃນຕົວເມືອງ 584.000 ຄົນ.
ພ້ອມກັນນັ້ນ, ໃນໄລຍະການລະບາດຂອງພະຍາດໂຄວິດ-19 ໄດ້ມີແຮງງານລາວ ທີ່ອອກແຮງງານຢູ່ປະເທດໄທ ແບບຖືກຕ້ອງ ແລະ ບໍ່ຖືກຕ້ອງຕາມກົດໝາຍເດີນທາງກັບຄືນປະເທດເປັນຈຳນວນຫຼາຍ ໂດຍຜ່ານຊ່ອງທາງຕ່າງໆ. ໃນນັ້ນ, ແຮງງານລາວເຮັດວຽກຢູ່ປະເທດໄທ ທີ່ຖືກຕ້ອງຕາມກົດໝາຍ ແຕ່ປີ 2016-2019 ມີທັງໝົດ 213.477 ຄົນ. ຜູ້ປະກັນຕົນໃນລະບົບປະກັນສັງຄົມພາກວິສາຫະກິດ ມີທັງໝົດ 116.979 ຄົນ, ເຊິ່ງຄາດຄະເນວ່າຈະມີຜູ້ອອກແຮງງານປະມານ 96.174 ຄົນ ທີ່ຢຸດພັກໃນໄລຍະນີ້ ຖ້າຫາກຈະໃຫ້ເງິນອຸດໜູນໄລຍະການຢຸດງານຜູ້ລະ 5 ແສນກີບຕໍ່ເດືອນ ໄລຍະ 2 ເດືອນ (ເດືອນພຶດສະພາ ແລະ ມິຖຸນາ) ຈະຕ້ອງໃຊ້ງົບປະມານຫຼາຍກວ່າ 48 ຕື້ກີບຕໍ່ເດືອນ.
ຮຽບຮຽງຂ່າວ: ພຸດສະດີ