ຫຼາຍໆປະເທດທົ່ວໂລກໄດ້ເລີ່ມນຳໃຊ້ການຊຳລະເງິນ ໂດຍບໍ່ໃຊ້ເງິນສົດຜ່ານຊ່ອງທາງຕ່າງເຊັ່ນ: ບັດເຄດິດ/ເດບິດ, ແອັບພລິເຄຊັນຂອງທະນາຄານ (ໂອນເງິນ, ສະແກນລະຫັດ QR), ໂທລະສັບມືຖືທີ່ມີລະບົບ NFC (Apple Pay, Google Pay) ແລະ ເວັບໄຊ້ຢ່າງ Paypal. ໃນປະເທດລາວເອງນອກຈາກ ບໍລິການຈ່າຍຜ່ານບັດແລ້ວ ຍັງມີບໍລິການຈ່າຍເງິນຜ່ານການສະແກນລະຫັດ QR ຈາກແອັບຂອງທະນາຄານ ເຊິ່ງການສະໝັກກໍ່ງ່າຍດາຍ ພຽງແຕ່ມີບັນຊີໃນທະນາຄານເທົ່ານັ້ນ.
ໃນວິກິດການແຜ່ລະບາດຂອງພະຍາດທີ່ເກີດຂຶ້ນໃນລາວ ຄົນສ່ວນຫຼາຍບໍ່ໄດ້ອອກຈາກບ້ານ ຖ້າບໍ່ໄດ້ແຕ່ງກິນກໍ່ຕ້ອງຫັນມາໃຊ້ແອັບສົ່ງອາຫານ ແຕ່ບັນຫາກໍ່ຄືບໍລິການດັ່ງກ່າວຍັງບໍ່ຮັບຮູບແບບການຊຳລະເງິນຜ່ານບັດ ຫຼື ຖ້າມີກໍ່ຍັງບໍ່ມີຮູບແບບອື່ນໆ ສຳຫຼັບຄົນທີ່ບໍ່ມີບັດ ເຊິ່ງໃຫ້ເຫຼືອພຽງທາງເລືອກດຽວກໍ່ຄືໃຊ້ເງິນສົດຈ່າຍ.
ຕົວແທນຈາກອົງການອະນາໄມໂລກກ່າວໄວ້ວ່າ ເຖິງຈະບໍ່ຮູ້ວ່າໄວຣັສຢູ່ເທິງໃບທະນາບັດໄດ້ດົນເທົ່າໃດ ແຕ່ກໍ່ສັນນິຖານໄດ້ວ່າມັນຢູ່ໄດ້ບໍ່ດົນກວ່າ 2 ຊົ່ວໂມງ, ພະຍາດໄວຣັສບໍ່ສາມາດຢູ່ໄດ້ດົນເທິງພື້ນຜິວຕ່າງໆ ໂດຍສະເພາະເທິງພື້ນຜິວແຫ້ງແບບໃບທະນາບັດ. ທາງອົງການກໍ່ໄດ້ກ່າວເພີ່ມວ່າ ມັນມີຄວາມເປັນໄປໄດ້ທີ່ຈະຕິດເຊື້ອຜ່ານການສຳຜັດພື້ນຜິວຕ່າງໆ, ແຕ່ມັນກໍ່ບໍ່ແມ່ນແຫຼ່ງແຜ່ເຊື້ອພະຍາດຫຼັກໆ.
ການຈັບບາຍເງິນສົດອາດຈະມີຄວາມສ່ຽງຕໍ່າຕໍ່ການຕິດເຊື້ອພະຍາດ ແຕ່ເຊື້ອພະຍາດເທິງເງິນສົດກໍ່ຍັງມີຢູ່ ທ່ານອາດຈະໃສ່ຖົງມືເວລາຈ່າຍເງິນ ແລະ ຮັບເອົາເຄື່ອງທີ່ສົ່ງມາໃຫ້ທ່ານກໍ່ໄດ້ ແຕ່ທ່ານກໍ່ຕ້ອງລ້າງມືໃຫ້ສະອາດຫຼັງຈັບບາຍຄືເກົ່າ. ບໍລິການສົ່ງອາຫານກໍ່ໄດ້ແນະນຳໃຫ້ລີກລ່ຽງການສຳຜັດກັບຜູ້ສົ່ງໂດຍໃຫ້ປະອາຫານໄວ້ບ່ອນທີ່ຜູ້ຮັບກຳນົດ(ສ່ວນຫຼາຍແມ່ນໃຫ້ຫ້ອຍໃສ່ລູກບິດປະຕູ) ແຕ່ວິທີນີ້ຈະສະດວກຕໍ່ຄົນທີ່ໃຊ້ບັດຈ່າຍ, ທ່ານອາດຈະປະເງິນໄວ້ໃຫ້ຜູ້ສົ່ງມາເອົາກໍ່ໄດ້ ແຕ່ມັນກໍ່ມິຄວາມສ່ຽງສູງຕໍ່ການຖືກລັກ ຖ້າບໍ່ລະວັງ.
ການຊຳລະຜ່ານວິທີທີ່ບໍ່ຕ້ອງໃຊ້ເງິນສົດ ນອກຈາກສະດວກແລ້ວກໍ່ຍັງສຳຄັນສຳຫຼັບຊ່ວງເວລານີ້ ເພື່ອເປັນການປ້ອງກັນການແຜ່ລະບາດຂອງໄວຣັສ, ການຫຼຸດເວລາຈ່າຍເງິນ ແລະ ເວັ້ນໄລຍະຫ່າງຈາກຜູ້ໃຫ້ບໍລິການກໍ່ຖືເປັນການປ້ອງກັນການແຜ່ລະບາດ. ການຊຳລະເງິນໃນປະເທດລາວກໍ່ມີຄວາມສະດວກຂຶ້ນ ຫຼັງຈາກທີ່ມີບໍລິການຊຳລະເງິນ ຜ່ານການສະແກນລະຫັດ QR ຂອງຮ້ານຄ້າ, ຮ້ານອາຫານ ຫຼື ບໍລິການຕ່າງໆ ທີ່ທະນາຄານຫຼາຍແຫ່ງໃນລາວໄດ້ເປີດໃຫ້ນຳໃຊ້ ເພື່ອຄວາມສະດວກສະບາຍໃນການຈ່າຍເງິນ. ນອກຈາກຄວາມສະດວກສະບາຍແລ້ວ ການຊຳລະເງິນໂດຍບໍ່ໃຊ້ເງິນສົດກໍ່ຊ່ວຍຫຼຸດຄວາມສ່ຽງຕໍ່ການຖືກລັກຊັບ ຈາກການຖືເງິດສົດຫຼາຍໆ ແລະ ຊ່ວຍຫຼຸດຜ່ອນ ແລະ ປ້ອງກັນການແຜ່ລະບາດຂອງໄວຣັສນຳ. ທັ້ງນີ້ ຫຼັງຈາກທີ່ຈັບບາຍສິ່ງຂອງທີ່ໃຊ້ປະຈຳ ກໍ່ຕ້ອງໄດ້ລ້າງມືໃຫ້ສະອາດ ແລະ ເຊັດທຳຄວາມສະອາດສິ່ງຂອງທີ່ໄດ້ຈັບຕ້ອງນຳ ເພື່ອຂ້າເຊື້ອພະຍາດໄວຣັສທີ່ຕິດຢູ່ເທິງພື້ນຜິວ.
ຮຽບຮຽງໂດຍ: ວະນິດາ