ສຳນັກຂ່າວສະໜຸກຂອງປະເທດ ໄທ ລາຍງານວ່າ ນາຍົກເທສະມົນຕີ ນະຄອນ ຂອນແກ່ນ ກ່າວວ່າ ຈາກສະຖານະການແຜ່ລະບາດຂອງໄວຣັສໂຄວິດ-19 ໃນປະເທດໄທ ຍັງມີແນວໂນ້ມທີ່ຈະມີຜູ້ຕິດເຊື້ອເພີ່ມຂຶ້ນ ເຮັດໃຫ້ທາງເທສະບານນະຄອນຂອນແກ່ນ ໄດ້ມີການຫາລືກັບຜູ້ນໍາຊຸມຊົມ, ໜ່ວຍງານຕ່າງໆຂອງຈັງຫວັດ ຈຶ່ງໄດ້ຂໍ້ສະຫຼຸບວ່າ ການຈັດງານສຸດຍອດສົງການອິສານ ຖະໜົນເຂົ້າໜຽວ ເຊິ່ງຈະຈັດຂຶ້ນລະຫວ່າງວັນທີ 13-15 ເມສາ ຂອງທຸກປີ ແມ່ນໃນປີນີ້ ຈະໄດ້ຍົກເລີກການຈັດງານ ເພື່ອເປັນການປ້ອງກັນການແຜ່ລະບາດຂອງໄວຣັສໂຄວິດ-19.
ງານສົງການອິສານທີ່ຖະໜົນເຂົ້າໜຽວໄດ້ຮັບຄວາມນິຍົມຈາກທັງຄົນໄທ ແລະ ຄົນຕ່າງຊາດເປັນຈໍານວນຫຼາຍ ເຊິ່ງຖ້າຫາກມີການຈັດງານໃນໄລຍະທີ່ສະຖານະການແຜ່ລະບາດຂອງເຊື້ອຍັງຢູ່ໃນພາວະສ່ຽງ, ນັກທ່ອງທ່ຽວທີ່ມາທ່ຽວງານກໍຈະບໍ່ມີຄວາມສຸກ ແລະ ມີໂອກາດສ່ຽງຕິດເຊື້ອໄດ້ ແລະ ເພື່ອເປັນການຮັກສາພາບລັກຂອງຈັງຫວັດຂອນແກ່ນ ຈື່ງເຮັດໃຫ້ຕ້ອງຍົກເລີກງານໃນຄັ້ງນີ້.
ຮຽບຮຽງຂ່າວ: ລັດສະໝີ