ການລະບາດຂອງໄວຣັສໂຄໂຣນາ ຫຼື ໂຄວິດ-19 ໄດ້ສົ່ງຜົນກະທົບຕໍ່ເສດຖະກິດຂອງໂລກຢ່າງໜັກ ເຊິ່ງໃນປະເທດລາວເຮົາເຖິງແມ່ນວ່າຈະບໍ່ມີລາຍງານຜູ້ຕິດເຊື້ອ ແຕ່ກໍ່ໄດ້ຮັບຜົນກະທົບທາງອ້ອມ ເຊິ່ງໃນຂະແໜງການທ່ອງທ່ຽວ ແລະ ການຂົນສົ່ງທັງພາຍໃນ ແລະ ລະຫວ່າງປະເທດອາດເວົ້າໄດ້ວ່າເປັນຂະແໜງການທີ່ໄດ້ຮັບຜົນກະທົບຫຼາຍທີ່ສຸດ.
ລັດວິສາຫະກິດການບິນລາວ ຕ້ອງໄດ້ນໍາໃຊ້ມາດຕະການປະຢັດຢ່າງເຂັ້ມງວດທີ່ສຸດ ຍ້ອນໄດ້ຮັບຜົນກະທົບຈາກການລະບາດຂອງພະຍາດອັກເສບປອດຮຸນແຮງທີ່ເກີດຈາກເຊື້ອຈຸລະໂລກສາຍພັນໃໝ່ ຫລື COVID-19 ຈໍານວນຜູ້ໂດຍສານໂດຍລວມຫຼຸດລົງປະມານ 50%. ດັ່ງນັ້ນ, ບໍລິສັດກໍຈະໄດ້ດໍາເນີນມາດຕະການປະຢັດຢ່າງເຂັ້ມງວດທີ່ສຸດ, ລາຍຈ່າຍໃດທີ່ບໍ່ຈໍາເປັນ ແລະ ຮີບດ່ວນແມ່ນໃຫ້ເລື່ອນອອກໄປກ່ອນ, ພ້ອມນີ້ ໄດ້ລະດົມໃຫ້ພະນັກງານການບິນຈໍານວນໜຶ່ງທີ່ເຫລືອວຽກກໍຂໍຮຽກຮ້ອງໃຫ້ສະໝັກໃຈພັກວຽກໄປກ່ອນໂດຍບໍ່ເອົາເງິນເດືອນ ແລະ ຖ້າຫາກ COVID-19 ຍັງສືບຕໍ່ແຜ່ລະບາດເປັນເວລາດົນອາດມີການຕັດເງິນເດືອນຂອງພະນັກງານສ່ວນໃດສ່ວນໜຶ່ງອີກ. ນອກຈາກນີ້ ລັດວິສາຫະກິດການບິນລາວ ໄດ້ສະເໜີຂໍທິດຊີ້ນໍາຈາກລັດຖະບານ ເພື່ອຊ່ວຍແກ້ໄຂບັນຫາຕາມຄວາມເໝາະສົມ.
ທ່ານ ບຸນມາ ຈັນທະວົງສາ ຜູ້ອຳນວຍການໃຫຍ່ລັດວິສາຫະກິດການບິນລາວ ໃຫ້ສຳພາດກັບໜັງສືພິມລາຍວັນລາວພັດທະນາວ່າ ຍ້ອນການລະບາດຂອງ COVID-19 ເຮັດເສັ້ນທາງການບິນໄປຕ່າງປະເທດຂອງການບິນລາວຕ້ອງໄດ້ຢຸດໃຫ້ບໍລິການຊົ່ວຄາວ ເພື່ອສະກັດກັ້ນໄວຣັສຮ້າຍນີ້, ໃນຂະນະເສັ້ນທາງບິນໄປ ສປ ຈີນ ມີ 9 ເສັ້ນ, ປັດຈຸບັນຍັງເຫຼືອແຕ່ເສັ້ນທາງ ວຽງຈັນ-ຊາງຊາ ທີ່ຍັງໃຫ້ບໍລິການຢູ່ແຕ່ເປັນການເຊົ່າເໝົາລໍາເພື່ອຂົນສົ່ງເຄື່ອງຊ່ວຍເຫຼືອດ້ານການແພດ ແລະ ຜູ້ໂດຍສານຈໍານວນໜຶ່ງທີ່ຕົກຄ້າງຢູ່ລາວໄປຈີນ, ສ່ວນເສັ້ນທາງການບິນຈາກລາວໄປ ສ.ເກົາຫລີ ໄດ້ຢຸດເປັນການຊົ່ວຄາວແລ້ວໃນວັນທີ 29 ກຸມພາຜ່ານມານີ້. ປັດຈຸບັນ ເສັ້ນທາງບິນໄປຕ່າງປະເທດຂອງລາວທີ່ຍັງສືບຕໍ່ໃຫ້ບໍລິການຢູ່ລວມມີ: ວຽງຈັນ-ບາງກອກ, ວຽງຈັນ-ຊຽງໃໝ່, ວຽງຈັນ-ຮ່າໂນ້ຍ, ວຽງຈັນ-ໂຮຈິມິນ ແລະ ວຽງຈັນ-ສຽມລຽບ ແຕ່ຈຳນວນຜູ້ໂດຍສານມີພຽງ 20-30% ທຽບກັບຜ່ານມາ ແລະ ຖ້າພະຍາດດັ່ງກ່າວຍັງສືບຕໍ່ຮ້າຍແຮງຂຶ້ນໃນຕໍ່ໜ້າອາດຫຼຸດຖ້ຽວບິນໄປປະເທດໃກ້ຄຽງນີ້ລົງອີກ. ສ່ວນສາຍການບິນພາຍໃນແມ່ນຍັງສືບຕໍ່ໃຫ້ບໍລິການເປັນປົກກະຕິ, ແຕ່ຈໍານວນຜູ້ໂດຍສານໃນແຕ່ລະເສັ້ນທາງກໍ່ຫຼຸດລົງຫຼາຍເຊັ່ນກັນເມື່ອທຽບໃສ່ເມື່ອກ່ອນ.
ຮຽບຮຽງຂ່າວ: ພຸດສະດີ