ສຳນັກຂ່າວຣອຍເຕີລາຍງານຈາກນະຄອນຫຼວງພະນົມເປັນ ປະເທດ ກຳປູເຈຍ ເມື່ອວັນທີ 24 ກຸມພາ 2020 ວ່າ ສົມເດັດຮຸນເຊັນ ນາຍົກລັດຖະມົນຕີກຳປູເຈຍ ກ່າວເມື່ອວັນຈັນທີ່ຜ່ານມາວ່າ ໂຮງງານຕັດຫຍິບເສື້ອຜ້າໃນກຳປູເຈຍທີ່ໄດ້ຮັບຜົນກະທົບ “ຢ່າງໜັກ” ຈາກຜົນກະທົບຂອງໄວຣັສໂຄໂຣນາ ຫຼື ໂຄວິດ-19 ແລະ ການຫຼຸດພິເສດທາງການຄ້າ ທີ່ຮຽກວ່າຂາຍໄດ້ທຸກຢ່າງ ຍົກເວັ້ນອາວຸດ ຫຼື ອີບີເອ ຂອງອີຍູ ຈະໄດ້ຮັບການຍົກເວັ້ນພາສີເປັນເວລາຢ່າງໜ້ອຍ 6 ເດືອນ ແລະ ລັດຖະບານຈະຊ່ວຍຈ່າຍເງິນດືອນບາງສ່ວນ (40%) ໃຫ້ກັບຄົນງານຫາກການຜະລິດຕ້ອງຢຸດສະງັກ.
ອີບີເອ (Everything But Arms) ເປັນໂຄງການຊ່ວຍເຫຼືອກຸ່ມປະເທດທີ່ມີຖານະຍາກຈົນທີ່ສຸດໃນໂລກ 48 ປະເທດຂອງອີຍູ ແລະ ອີຍູປະກາດມາດຕະການລົງໂທດກຳປູເຈຍ ໃນໂທດຖານບໍ່ມີຄວາມຄືບໜ້າໃນການແກ້ໄຂບັນຫາສິດທິມະນຸດ ດ້ວຍການຫຼຸດອີບີເອລົງບາງສ່ວນ ຊຶ່ງຈະສົ່ງຜົນກະທົບຕໍ່ທຸລະກິດຕໍ່າແຜ່ນ, ເຄື່ອງນຸ່ງຫົ່ມຂອງກຳປູເຈຍ ປະມານ 20% ເຮັດໃຫ້ກຳປູເຈຍສູນເສຍລາຍຮັບໄດ້ຈາກການສົ່ງອອກໄປ 27 ປະເທດອີຢູໃນສ່ວນນີ້ ປະມານ 1,000 ລ້ານຍູໂລ.
ຮຸນເຊນ ຍັງກ່າວຕື່ມອີກວ່າ ບັນດາໂຮງແຮມທີ່ພັກໃນກຳປູເຈຍໄດ້ຮັບຜົນກະທົບຈາກໄວຣັສໂຄໂຣນາ ຫຼື ໂຄວິດ-19 ຈະໄດ້ຮັບການງົດເວັ້ນພາສີເປັນເວລາ 4 ເດືອນ.
ຮຽບຮຽງຂ່າວ: ພຸດສະດີ