ໜັງສືພິມປ້ອງກັນຄວາມສະຫງົບລາຍງານເມື່ອວັນທີ 20 ກຸມພາ 2020 ວ່າ ຄະນະສານອາຍາ ສານປະຊາຊົນຂັ້ນຕົ້ນນະຄອນຫຼວງວຽງຈັນ ເປີດປະຊຸມສານໃນ ວັນທີ 13 ກຸມພາ 2020 ເພື່ອນຳເອົາສຳນວນຄະດີອາຍາຂັ້ນຕົ້ນ ເລກທີ 187/ອຍກ.ນວ ຂຶ້ນມາພິຈາລະນາຕັດສິນ ໃນສະຖານການລັກຊັບພົນລະເມືອງ, ການຊື້-ຂາຍຊັບ ແລະ ການໂຕນໜີຈາກຄ້າຍຄຸມຂັງ, ເຊິ່ງມີຈຳເລີຍໃນສຳນວນຄະດີດັ່ງກ່າວ 6 ຄົນ ແລະ ສານໄດ້ຕັດສິນຈຳຄຸກ ພ້ອມປັບໃໝຕາມສະຖານການກະທຳຜິດຂອງຈຳເລີຍ.
ຈໍາເລີຍ 1 ຊື່ທ້າວ ຄຳເພັດ ຫຼື ແຫຼ້ພົນ ອາຍຸ 26 ປີ, ຈຳເລີຍ 2 ຊື່ ທ້າວ ມົນຊະນະ ຫຼື ລຸ້ຍ ອາຍຸ 26, ຈຳເລີຍ 3 ທ້າວ ພອນປະເສີດ ຫຼື ຊາຍ ອາຍຸ 19 ປີ, ທັງ 3 ຈຳເລີຍ ຢູ່ບ້ານ ດົງນາໂຊກໃຕ້; ຈຳເລີຍ 4 ຊື່ທ້າວ ນົກ ອາຍຸ 24 ປີ ຢູ່ບ້ານ ໜອງແຕ່ງໃຕ້ ທັງ 4 ຈຳເລີຍ ໄດ້ກະທຳຜິດໃນສະຖານການລັກຊັບພົນລະເມືອງ, ສ່ວນຈຳເລີຍ 5 ຊື່ທ້າວ ພຸດສະດີ ຫຼື ພຸດ ອາຍຸ 22 ປີ ຢູ່ບ້ານ ໜອງແຕ່ງໃຕ້ ກະທຳຜິດໃນສະຖານການລັກຊັບ ແລະ ຊື້ຂາຍຊັບພົນລະເມືອງ. ສຳລັບຈຳເລີຍ 6 ຊື່ ທ້າວ ສະເຫຼີມສຸກ ຫຼື ເປ່ເລ່ ອາຍຸ 26 ປີ ຢູ່ບ້ານ ດົງນາໂຊກໃຕ້ ໄດ້ກະທຳຜິດໃນການລັກຊັບ ແລະ ການໂຕນໜີຈາກຄ້າຍຄຸມຂັງ; ທັງໝົດຢູ່ເມືອງ ສີໂຄດຕະບອງ ນະຄອນຫຼວງວຽງຈັນ.
ອົງການໄອຍະການປະຊາຊົນໄດ້ຖະແຫຼງການວ່າ: ການເຄື່ອນໄຫວຂອງພວກຈຳເລີຍ ແມ່ນໄດ້ເລາະລັກຊັບປະເພດລົດຈັກຕາມນະຄອນຫຼວງວຽງຈັນ ແລະ ນຳໄປຂາຍໃຫ້ກັບພັກພວກ ເມື່ອໄດ້ເງິນແລ້ວ ກໍນຳມາແບ່ງປັນ ກັນໃຊ້ຈ່າຍສ່ວນຕົວໝົດ. ໃນນີ້, ທ້າວ ຄຳ ເພັດ ຫຼື ແຫຼ້ພົນ (ຈຳເລີຍ1) ໄດ້ກະທຳຜິດໃນລະຫວ່າງປີ 2016-2017 ລັກຊັບພົນລະເມືອງມາແລ້ວ 26 ຄັ້ງ ລັກໄດ້ປະເພດລົດເວບ 100 ຈຳນວນ 22 ຄັນ, ລັດສະແມັດ 1 ຄັນ, ສະກຸບປີ້ 1 ຄັນ, ຄິກໄອ 1 ຄັນ ແລະ ລົດລອງຊິນ 1 ຄັນ. ໃນຈຳນວນລົດທີ່ລັກມານັ້ນ ໄດ້ຂາຍໃຫ້ພັກ ພວກທີ່ຮັບຊື້ໄດ້ເງິນທັງໝົດ 34.300.000 ກີບ.
ທ້າວ ມົນຊະນະ ຫຼື ລຸ່ຍ (ຈຳເລີຍ 2) ໄດ້ ເຄື່ອນໄຫວລັກມາແລ້ວ 5 ຄັ້ງ ເປັນລົດຄຼິກໄອ 3 ຄັນ, ຊູເມີ້ເອັກ 1 ຄັນ ແລະ MSX 1 ຄັນ ແຕ່ຈຳເລີຍ 2 ບໍ່ທັນໄດ້ຂາຍ ມີແຕ່ເອົາໄປນຳໃຊ້ ແລະ ໃຫ້ໝູ່ໄປນຳໃຊ້, ທ້າວ ພອນປະເສີດ ຫຼື ຊາຍ (ຈຳເລີຍ 3) ລັກລົດຈັກມາແລ້ວ 3 ຄັ້ງ ເປັນລົດເວບ 100 2 ຄັນ ແລະ ລົດຄຼິກໄອ ນຳໄປຂາຍໄດ້ເງິນ 2.200.000 ກີບ, ທ້າວ ນົກ (ຈຳເລີຍ4) ໄດ້ລັກຊັບມາແລ້ວ 10 ຄັ້ງ ເປັນລົດເວບ 100 ທັງໝົດ 20.000.000 ກີບ, ທ້າວ ພຸດສະດີ ຫຼື ພຸດ (ຈຳ ເລີຍ5) ກໍ່ເຫດລັກຊັບມາແລ້ວ 6 ຄັ້ງ ເປັນລົດຈັກ ເວັບ 100 ທັງໝົດ ແລະ ຂາຍໄດ້ເງິນ ຈຳນວນ 12.000.000 ກີບ. ນອກນີ້, ຈຳເລີຍ 5 ຍັງສາລະພາບອີກວ່າ: ຜ່ານມາ ໄດ້ເຄີຍຮັບຊື້ລົດຈັກທີ່ພັກພວກລັກມາຂາຍ ຈຳນວນ 24 ຄັນ ໂດຍຊື້ຄັນລະ 2.000.000 ກີບ ແລ້ວ ສົ່ງຢູ່ນະຄອນຫຼວງ ແລະ ຕ່າງແຂວງຄັນລະ 3.000.000- 3.500.000 ກີບ.
ສຳລັບ ທ້າວ ສະເຫຼີມສຸກ ຫຼື ເປ່ເລ່ (ຈຳ ເລີຍ6) ໄດ້ກໍເຫດລັກຊັບມາແລ້ວ 4 ຄັ້ງ ມີລົດເວັບຮ້ອຍ 2 ຄັນ, ລັດຈັກໂຄລາວ 1 ຄັນ ຂາຍໄດ້ເງິນຈຳນວນ 2.200.000 ກີບ, ສ່ວນຄັ້ງທີ່ 4 ແມ່ນກຳລັງລົງມືລັກລົດຈັກຊູເມີ້ເອັກ ແຕ່ຖືກເຈົ້າໜ້າທີ່ກັກຕົວມາດຳເນີນຄະດີ. ນອກນີ້, ໃນເວລາດຳເນີນຄະດີ, ຈຳເລີຍ 6 ໄດ້ຫຼົບໜີອອກຈາກຄ້າຍຄຸມຂັງ ແຕ່ຖືກເຈົ້າໜ້າທີ່ຕິດຕາມກັກຕົວໄດ້ທັນ.
ການຄົ້ນຄວ້າບັນດາຂໍ້ມູນຫຼັກຖານເອກະສານຕ່າງໆ ມີຢູ່ໃນສຳນວນຄະດີຢ່າງຖີ່ຖ້ວນ ຮອບດ້ານ ແລະ ພາວະວິໄສແລ້ວ ເຫັນວ່າ: ມີຫຼັກຖານທີ່ໜັກແໜ້ນ ແລະ ພຽງພໍສາມາດຢັ້ງຢືນໄດ້ກ່ຽວກັບການກະທຳຜິດຂອງພວກຈຳເລີຍຕາມຂໍ້ກ່າວຫາແທ້. ສະນັ້ນ, ຄະນະສານຈຶ່ງເຫັນຄວນລົງໂທດຕັດສິນດັ່ງນີ້: ຕັດ ສີນ ຈຳເລີຍ 1 ຈຳຄຸກ 5 ປີ ປັບໃໝ 8.000.000 ກີບ; ຕັດສິນຈຳເລີຍ 2 ຈຳຄຸກ 3 ປີ 6 ເດືອນ ປັບໃໝ 3.500.000 ກີບ; ຕັດສິນຈຳ ເລີຍ 3 ຈຳຄຸກ 3 ປີ ປັບໃໝ 5.000.000 ກີບ; ຕັດສິນຈຳເລີຍ 4 ຈຳຄຸກ 4 ປີ ປັບໃໝ 5.000.000 ກີບ; ຕັດສີນຈຳເລີຍ 5 ຈຳຄຸກ 5 ປີ ປັບໃໝ 3.000.000 ກີບ ແລະ ຕັດສິນຈຳເລີຍ 6 ຈຳຄຸກ 5 ປີ ປັບໃໝ 4.000.000 ກີບ.
ຮຽບຮຽງຂ່າວ: ພຸດສະດີ