ເມື່ອວັນທີ 10 ກຸມພາ 2020 ທີ່ຜ່ານມາ ໂຊຊ່ຽວເດືອດເທົ່າໆກັບເລື່ອງໂຄຣານາ ເມື່ອມີຜູ້ໃຊ້ທະວິດເຕີສາວຄົນໜຶ່ງໂພສຂໍ້ຄວາມໃນທາງສຽດສີຄົນທີ່ກິນເຂົ້າໜຽວວ່າມີໂອກາດກໍ່ການຮ້າຍ ຈຶ່ງເຮັດໃຫ້ມີຜູ້ຄົນຈຳນວນຫຼາຍໂພສຂໍ້ຄວາມທະວິດເຕີຕອບໂຕ້ຈົນເກີດມີແຮັສແທັກ #saveເຂົ້າໜຽວ ແລະ ຕິດອັນດັບ2 ໃນ Top 10
ເຈົ້າຂອງທະວິດເຕີຄົນນີ້ໄດ້ທະວິດຂໍ້ຄວາມໃນລັກສະນະສຽດສີຄົນທີ່ກິນເຂົ້າໜຽວ ເຊິ່ງໄດ້ວິເຄາະວ່າ: “ຄົນຮ້າຍປຸ້ນຮ້ານຄຳ ແລະ ຄົນຮ້າຍກາດຍິງທີ່ໂຄລາດ ທັງສອງມັກປືນ ແລະ ມັກກິນເຂົ້າໜຽວ ຖ້າຈະ assume ທາງອາດຊະຍາວິທະຍາ ຈະພົບວ່າ ພວກທີ່ມັກກິນເຂົ້າໜຽວມີໂອກາດກໍ່ການຮ້າຍສູງ ແລ້ວໃຜທີ່ມັກກິນເຂົ້າໜຽວນັ້ນກໍ່ຄືລາວ”
ເລື່ອງນີ້ໄດ້ສ້າງຄວາມບໍ່ພໍໃຈໃຫ້ແກ່ຜູ້ຄົນຈຳນວນຫຼາຍ ທັງຄົນລາວ ແລະ ຄົນໄທສ່ວນຫຼາຍທີ່ກິນເຂົ້າໜຽວ ໃນທະວິດເຕີໄດ້ມີການຕັ້ງແຮັສແທັກ “#saveເຂົ້າໜຽວ” ເພື່ອອອກມາປົກປ້ອງຄົນທີ່ກິນເຂົ້າໜຽວ ທີ່ບໍ່ໄດ້ມີຈິດໃຈໂຫດຮ້າຍຂະໜາດນັ້ນ ເພາະຖ້າຄົນມັນຈະຊົ່ວບໍ່ວ່າຈະກິນອາຫານຫຼູຫຼາລາຄາແພງພຽງໃດມັນກໍ່ຊົ່ວຢູ່ແລ້ວ ແລະ ແນ່ນອນວ່າ ງານນີ້ ເຮັດໃຫ້ດາຣາສາວເຊື້ອສາຍລາວຢ່າງ “ແອັບເປິ້ນ ສີສະຫງຽນ” ພ້ອມທະວິດໂຕ້ຕອບກັບທັນທີ.
ນອກຈາກນີ້, ຍັງມີຄົນເຂົ້າໄປຕອບໂຕ້ໂພສກ່າວໂຈມຕີເຈົ້າຂອງທະວິດເຕີ້ດັ່ງກ່າວວ່າເປັນການເຊື່ອມໂຍງທີ່ຂີ້ຮ້າຍຫຼາຍ ແລະ ເຫດການຄົນຮ້າຍປຸ້ນຮ້ານຄຳ ກັບ ເຫດການຄົນຮ້າຍກາດຍິງມັນບໍ່ມີຄວາມກ່ຽວຂ້ອງກັບອາຫານເລີຍ ບໍ່ຈຳເປັນຕ້ອງເອົາປະເດັນເຂົ້າໜຽວມາກ່ຽວພັນ ເພາະຄົນທີ່ກິນເຂົ້າໜຽວຄົນໄທເກືອບທຸກຄົນກໍ່ກິນ ບໍ່ແມ່ນສະເພາະແຕ່ຄົນພາກອີສານເທົ່ານັ້ນ ແລະ ສິ່ງທີ່ບໍ່ສົມຄວນທີ່ສຸດຄືການໄປພາດພິງເຖິງລາວ ເຊິ່ງເປັນຊື່ຂອງປະເທດເພື່ອນບ້ານ ມັນອາດຈະສ້າງຄວາມແຕກແຍກໃຫ້ຄົນທັງສອງຝາກຝັ່ງແມ່ນໍ້າຂອງໄດ້.
ຮຽບຮຽງຂ່າວ: ພຸດສະດີ