ຈາກກໍລະນີທີ່ມີການເຜີຍແຜ່ຂ່າວລືທາງໂລກອອນລາຍ ວ່າການກິນໄຂ່ສາມາດຕ້ານໄວຣັສໂຄໂຣນາໄດ້ນັ້ນ ບໍ່ແມ່ນຄວາມຈິງແຕ່ຢ່າງໃດ! ຕົ້ນຕໍຂ່າວລືນີ້ມາຈາກ ການສົ່ງຕໍ່ຂ່າວຜ່ານທາງສັງຄົມອອນລາຍ ບາງຄົນກໍເວົ້າວ່າ ”ມີພີ່ນ້ອງໂທມາແຕ່ທາງໃຕ້ ມາເລົ່າສູ່ຟັງວ່າມີເດັກນ້ອຍເກີດໃໝ່ ແລ້ວສາມາດເວົ້າໄດ້ເລີຍ ເມື່ອມີຄົນຖາມວ່າ ເປັນຫຍັງຄືສາມາດເວົ້າໄດ້ ເດັກນ້ອຍຈຶ່ງຕອບວ່າ ມີຄົນສົ່ງໃຫ້ມາເກີດຂຶ້ນ ມາບອກຊາວໂລກວ່າ ໂລກນີ້ກຳລັງຈະເກີດເລື່ອງບໍ່ສົມຄວນເກີດ ຈະເກີດເລື່ອງບໍ່ດີ ໃຫ້ພາກັນເອົາໄຂ່ອັດປາກ ຫຼື ກິນໄຂ່ຄົນລະໜ່ວຍ” ຫຼືບາງຄົນກໍເວົ້າວ່າ “ການກິນໄຂ່ຕົ້ມຈະສາມາດຊ່ວຍໃຫ້ເຊົາຈາກພະຍາດທີ່ເກີດຈາກເຊື້ອໄວຣັສໂຄໂຣນາໄດ້”.
ຈາກຂ່າວລືດັ່ງກ່າວ ເຫັນວ່າບໍ່ເປັນຄວາມຈິງແທ້ແນ່ນອນ. ການກິນໄຂ່ຕົ້ມແມ່ນມີປະໂຫຍດ ແຕ່ບໍ່ມີປະໂຫຍດໃດທີ່ສາມາດຮັກສາການຕິດເຊື້ອໄວຣັສໂຄໂຣນາສາຍພັນໃໝ່ ເຊິ່ງເປັນສາເຫດຂອງພະຍາດປອດອັກເສບໄດ້. ປັດຈຸບັນ, ບັນດານັກວິທະຍາດສາດ, ແພດໝໍ ແລະ ນັກລະບາດວິທະຍາ ຮ່ວມກັນຊອກຫາວິທີຄິດວັກຊີນຕ້ານເຊື້ອ ແລະ ຮັກສາຜູ້ຕິດເຊື້ອຢ່າງໃກ້ຊິດ ແຕ່ກໍຍັງບໍ່ມີຜົນສຳຫຼວດໃດທີ່ແຈ້ງວ່າ ສາມາດຕ້ານໄວຣັສໂຄໂຣນາໄດ້ 100%.
ວິທີທີ່ຈະສາມາດປ້ອງກັນຕົນເອງຈາກການຕິດເຊື້ອໄວຣັສໂຄໂຣນາກໍຄື ຮັກສາສຸຂະພາບໃຫ້ແຂງແຮງ ແລະ ປະຕິບັດຕາມຄໍາແນະນໍາຂອງການນໍາ ກໍຄື ກະຊວງສາທາລະນະສຸກ ແລະ ອົງການອະນາໄມໂລກໄດ້ວາງອອກ.
ຮຽບຮຽງຂ່າວ: ລັດສະໝີ