ໜັງສືພິມວຽງຈັນທາມລາຍງານເມື່ອວັນທີ 3 ກຸມພາ 2020 ວ່າ ລາວພົບສອງກໍລະນີທີ່ສົງໄສ ອາດຈະຕິດເຊື້ອໂຄໂຣນາສາຍພັນໃໝ່.
ທ່ານ ປອ ດຣ ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ ໄດ້ກ່າວຢູ່ໃນພິທີຖະແຫຼງຂ່າວຕອນເຊົ້າຂອງມື້ນີ້ 03 ກຸມພາ 2020 ວ່າ ຜົນກວດທັງ 9 ກໍລະນີແມ່ນເປັນຜົນລົບ ຫຼື ວ່າ negative ສະນັ້ນຖືວ່າບໍ່ພົບເຊື້ອ ດັ່ງກ່າວ.
ລາວໄດ້ກວດ 11 ຄົນທີ່ມີອາການ ແລະ ກໍລະນີສົງໄສທີ່ເປັນທັງຄົນລາວ ແລະ ຄົນຈີນ ແຕ່ພາຍຫຼັງທີ່ກວດ ແລະ ວິເຄາະເຫັນວ່າ 9 ກໍລະນີນັ້ນບໍ່ ແມ່ນການຕິດເຊື້ອພະຍາດປອດອັກເສບ ຫຼື ຕິດເຊື້ອໄວຣັສໂຄໂຣນາທີ່ກຳລັງລະບາດຢູ່ໃນໂລກປະຈຸບັນນີ້. ແຕ່ອີກ 2 ກໍລະນີທີ່ຍັງເຫຼືອນັ້ນແມ່ນຢູ່ໃນການສົງໄສ ເພາະທັງສອງເປັນ ຄົນຈີນທີ່ມີປະຫວັດພົວພັນກັບຄົນຈີນທີ່ຢູ່ນະຄອນ ອູຮັ່ນ, ແຂວງ ຫູເປີ່ຍ ສປ ຈີນ ເຊິ່ງເປັນບ່ອນທີ່ມີການລະບາດໜັກກວ່າໝູ່ ທາງສູນກຳລັງມີການວິເຄາະຕື່ມເພື່ອຄວາມແນ່ໃຈ.
ທ່ານ ປອ ດຣ ພອນປະດິດ ຍັງໄດ້ອະທິບາຍຕື່ມວ່າ: ຫຼາຍຄົນອາດເຂົ້າໃຈວ່າ ວິທະຍາສາດການວິເຄາະວິໄຈ ແລະ ບົ່ງມະຕິພະຍາດດັ່ງກ່າວຂອງວິຊາການລາວຈະບໍ່ທັນສະໄໝຄືກັບປະເທດເພື່ອນບ້ານ ຫຼື ຫຼາຍປະເທດຢູ່ໃນໂລກ, ແຕ່ໃຫ້ເຂົ້າໃຈວ່າວິຊາການຂອງລາວກໍ່ສາມາດວິເຄາະ, ວິໄຈ ແລະ ບົ່ງມະຕິໄດ້ໂດຍອຸປະກອນທີ່ທັນສະໄໝທຽບເທົ່າປະເທດເພື່ອນບ້ານເຊັ່ນກັນ, ເຊິ່ງຈະໃຊ້ເວລາປະມານ 3-4 ຊົ່ວໂມງໃນການບົ່ງມະຕິພະຍາດດັ່ງກ່າວ.
ທາງສູນວິເຄາະ ແລະ ລະບາດວິທະຍາກະຊວງສາທາລະນະສຸກຍັງໄດ້ແຈ້ງຕື່ມໃຫ້ບັນດາປະຊາຊົນທີ່ມີຂໍ້ສົງໄສ ແລະ ບໍ່ເຂົ້າໃຈຫຍັງກ່ຽວກັບການປ້ອງການຕົນເອງ, ການລະບາດ ຫຼື ຈະໄປຫາໃຜຖ້າມີກໍລະນີສົງໄສ ແລະ ອື່ນໆ ແມ່ນໃຫ້ໂທເຂົ້າເບີ 166 ໄດ້ຕະຫຼອດ 24 ຊົ່ວໂມງ.
ນັບແຕ່ມື້ນີ້ເປັນຕົ້ນໄປ ເວລາ 16 ໂມງຂອງທຸກໆມື້ທາງກະຊວງສາທາລະນະສຸກຈະມີການຖະແຫຼງຂ່າວຄວາມຄືບໜ້າຂອງສະຖານະການ ການກະກຽມເຝົ້າລະວັງ ແລະ ມາດຕະການຕ່າງໆຕໍ່ກັບພະຍາດປອດປັກເສບ ຈາກເຊື້ອໄວຣັສໂຄໂຣນາສາຍພັນໃໝ່.
ຮຽບຮຽງຂ່າວ: ພຸດສະດີ