ການນຳໃຊ້ຜະລິດຕະພັນທີ່ມີສ່ວນປະສົມຂອງທຳມະຊາດກຳລັງໄດ້ຮັບຄວາມນິຍົມ ເພາະໃນປັດຈຸບັນຄົນສ່ວນໃຫຍ່ຫັນມາໃສ່ໃຈເລື່ອງຂອງສຸຂະພາບ ແລະ ການຮັກສາສິ່ງແວດລ້ອມຫຼາຍຂຶ້ນກວ່າໄລຍະທີ່ຜ່ານມາ ຊຶ່ງຢູ່ໃນລາວກໍມີກຸ່ມທີ່ຜະລິດສິນຄ້າປະເພດນີ້ອອກຈຳໜ່າຍ ແຕ່ກໍຍັງຢູ່ໃນວົງແຄບ ແລະ ມີໜ້ອຍຄົນທີ່ຮູ້ຈັກ.
ທານຝັນອໍການິກຟາມ (Thaan Fun Organic Farm) ຊື່ນີ້ອາດຍັງບໍ່ເປັນທີ່ຮູ້ຈັກຫຼາຍປານໃດ ແຕ່ຜະລິດຕະພັນຂອງເຂົາເຈົ້າເປັນທີ່ໜ້າສົນໃຈ ເນື່ອງຈາກວ່າສະກັດມາຈາກວັດຖຸດິບທຳມະຊາດ ແລະ ໃຊ້ໄດ້ແທ້ ທັງມີປະສິດທິພາບ ພ້ອມທັງມີການຫຸ້ມຫໍ່ທີ່ໜ້າດຶງດູດໃຈ ຜະລິດຕະພັນຂອງເຂົາເຈົ້າປະກອບມີ ນໍ້າຢາຖູພື້ນ ນໍ້າຢາລ້າງຖ້ວຍ ນໍ້າຢາສະຫົວໝາກຂີ້ຫູດ ນໍ້າຢານວດຜົມໝາກຂີ້ຫູດ ນໍ້າຢາຊັກເຄື່ອງ ຜະລິດຕະພັນທັງໝົດເຫຼົ່ານີ້ສາມາດເກັບຮັກສາໄວ້ໄດ້ດົນເຖິງ 1-2 ປີ ກຸ່ມລູກຄ້າສ່ວນໃຫຍ່ຈະເປັນຊາວຕ່າງຊາດ ສ່ວນຄົນລາວກໍມີພຽງບາງກຸ່ມຄົນທີ່ນິຍົມໃຊ້ສິນຄ້າປະເພດນີ້ ຫາກທ່ານໃດສົນໃຈຜະລິດຕະພັນກໍສາມາດຫາຊື້ໄດ້ທີ່ຮ້ານດັກແດ້.
ທ້າວ ແຊັກ ອະພິວົງ (Zack Aphivong) ເຈົ້າຂອງທານຟັນອໍການິກຟາມໄດ້ໃຫ້ຂໍ້ມູນກັບນັກຂ່າວລາວໂພສວ່າ ທານຝັນອໍການິກຟາມສ້າງຂຶ້ນ 2-3 ປີທີ່ຜ່ານມາ ຊຶ່ງມີຄວາມຄິດເລີ່ມຈາກການທີ່ຕົນເອງໄດ້ເຄີຍເຮັດວຽກກັບອົງການສາກົນ ແລະ ໄດ້ມີຄວາມຮູ້ກ່ຽວກັບເລື່ອງນີ້ໃນລະຫວ່າງການເຮັດວຽກຈຶ່ງມີຄວາມຄິດນຳເອົາບົດຮຽນທີ່ໄດ້ມາສ້າງເປັນຜະລິດຕະພັນ ເບື້ອງຕົ້ນໄດ້ມີການເຕົ້າໂຮມຄົນໃນຊຸມຊົນຜູ້ທີ່ວ່າງງານມາຮ່ວມຕົວກັນເຮັດກິດຈະກຳ ແຕ່ຍ້ອນເກີດມີຄວາມຫຍຸ້ງຍາກຫຼາຍປັດໄຈຈຶ່ງງເຮັດໃຫ້ປັດຈຸ ບັນເຫຼືອພຽງຄົນໃນຄອບຄົວທີ່ເປັນແຮງງານຫຼັກ ຫຼື ເຮັດນຳກັນແບບທຸລະກິດຄອບຄົວເທົ່ານັ້ນ ສຳລັບແຜນການຂະຫຍາຍຕະຫຼາດໃນອະນາຄົດຕອນນີ້ແມ່ນຍັງບໍ່ມີແຜນທີ່ແນ່ນອນເທື່ອເພາະວ່າຍັງມີຄວາມຫຍຸ້ງຍາກຫຼາຍປະກາດ.
ຜະລິດຕະພັນປອດສານຜິດເຫຼົ່ານີ້ເປັນສິນຄ້າທີ່ສ້າງຂຶ້ນມາຈາກຄົນລາວ 100% ວັດຖຸດິບທີ່ນຳໃຊ້ໃນການຜະລິດກໍ່ເປັນວັດຖຸດິບທີ່ຢູ່ໃນທ້ອງຖິ່ນ ເຊິ່ງຜ່ານການໝັກແບບຊີວະພາບເປັນຢ່າງດີ ຮັບປະກັນເລື່ອງຄວາມສະອາດ ສິນຄ້າປອດສານເຄມີ ແລະ ມີຄຸນນະພາບດີ ມີການຫຸ້ມຫໍ່ທີ່ທັນສະໄໝ ແລະ ໃຊ້ງ່າຍຈົນຢາກໃຫ້ທຸກຄົນໄດ້ລອງ ທີ່ສຳຄັນນອກຈາກສິນຄ້າຈະເປັນມິດຕໍ່ສິ່ງ ແວດລ້ອມແລ້ວຍັງເປັນການສົ່ງເສີມໃຫ້ຄົນລາວມີອາຊີບ ເປັນການສົ່ງເສີມໃນພາກຂອງເສດຖະກິດລາວໃຫ້ມີການຂະຫຍາຍຕົວໃນດ້ານຂອງທຸລະກິດແບບ SME ໄດ້ອີກດ້ວຍ ຊຶ່ງສອດຄ່ອງກັບຄຳຂວັນທີ່ວ່າ “ລາວເຮັດ ລາວໃຊ້ ລາວໄດ້ ລາວຈະເລີນ”.
ຂຽນໂດຍ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ທ້າວ ແຊັກ ອະພິວົງ ເຈົ້າຂອງທານຝັນອໍການິກຟາມ