ສານກຳປູເຈຍຕັດສິນຈຳຄຸກ ທ້າວ ທັດ ຣຸຕ ມຸນີ ລ່າມ (ນັກແປພາສາ) ແລະ ຜູ້ປະສານງານກອງຖ່າຍຮູບເງົາສາລະຄະດີເປັນເວລາ 2 ປີ ເນື່ອງຈາກລັດຖະບານລະບຸວ່າ ສາລະຄະດີດັ່ງກ່າວເປັນຂ່າວປອມ!.
ຜູ້ຕ້ອງຫາຄົນດັ່ງກ່າວຄື ທັດ ຣຸຕ ມຸນີ ອາຍຸ 48 ປີ ຖືກກັກຕົວໄດ້ທີ່ປະເທດໄທ ແລະ ຖືກສົ່ງຕົວກັບກຳປູເຈຍເມື່ອປີຜ່ານມາ ຂະນະທີ່ພະຍາຍາມເດີນທາງໄປຍັງປະເທດເນເທີແລນກັບຄອບຄົວ ຫຼັງຈາກທີ່ເຮັດໜ້າທີ່ເປັນລ່າມ ແລະ ຜູ້ປະສານງານໃຫ້ກັບກອງຖ່າຍທຳຮູບເງົາສາລະຄະດີເລື່ອງ “My Mother Sold Me” ຂອງສະຖານີຣັດເຊຍທູເດທີ່ເລົ່າເລື່ອງລາວຂອງເດັກຍິງກຳປູເຈຍຈາກຄອບຄົວທຸກຍາກທີ່ຖືກຂາຍເຂົ້າສູ່ອາຊີບຂາຍບໍລິການ ແຕ່ເຈົ້າໜ້າທີ່ກຳປູເຈຍກໍໄດ້ອອກມາເປີດເຜີຍວ່າ ເດັກຍິງໃນຮູບເງົາສາລະຄະດີເລື່ອງນີ້ ແລະ ແມ່ຂອງນາງໄດ້ຮັບຄ່າຈ້າງ 200 ໂດລາໃຫ້ຕົວະລະຫວ່າງຖ່າຍທຳສາລະຄະດີຊຶ່ງມີຄວາມຍາວ 30 ນາທີຊຶ່ງປ່ອຍອອກອາກາດເມື່ອເດືອນຕຸລາ 2018 ຜ່ານມາ.
ທັງນີ້ ເມື່ອວັນທີ 26 ມິຖຸນາຜ່ານມາ ຜູ້ພິພາກສາສານກຳປູເຈຍຈຶ່ງໄດ້ຕັດສິນຈຳຄຸກຜູ້ກ່ຽວເປັນເວລາ 2 ປີໃນຄວາມຜິດຖານສົມຮູ້ຮ່ວມຄິດໃນການເຮັດສາລະຄະດີທີ່ກໍ່ໃຫ້ເກີດຄວາມແຕກແຍກ ແລະ ສັ່ງປັບໄໝເປັນເງິນຊົດເຊີຍຈຳນວນ 17.500 ໂດລາໃຫ້ກັບ 2 ແມ່ລູກທີ່ປາກົດຕົວໃນຮູບເງົາສາລະຄະດີດັ່ງກ່າວ ຊຶ່ງທັງສອງໄດ້ເລົ່າໃຫ້ເຈົ້າໜ້າທີ່ຟັງວ່າ ຈຳເລີຍບອກກັບຕົນເອງ ແລະ ລູກສາວວ່າຈະຊ່ວຍເລື່ອງຂໍ້ຂັດແຍ່ງທີ່ດິນ ແລະ ຈະເປີດຮ້ານຂາຍເຄື່ອງໃຫ້ຖ້າຫາກ 2 ແມ່ລູກແຕ່ງເລື່ອງຂອງລູກສາວຕາມທີ່ປາກົດໃນຮູບເງົາສາລະຄະດີ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: thaipost