ຈາກທີ່ມີກະແສອອກມາທາງໂລກໂຊຊຽວກ່ຽວກັບໂຄສະນາອຸປະກອນຂາຍເຄື່ອງຊ່ວຍປະຢັດໄຟຟ້າທີ່ມີຊື່ວ່າ Power Factor Saver ຊຶ່ງຖືກແຊຣຢ່າງຫຼວງຫຼາຍໃນຂະນະນີ້ວ່າມີຄຸນສົມບັດດີເລີດ ສາມາດຊ່ວຍປະຢັດຄ່າໄຟຟ້າລົງໄດ້ເຖິງເຄິ່ງໜຶ່ງຂອງມູນຄ່າທີ່ເຄີຍເສຍໂດຍບໍ່ຜິດກົດໝາຍ.
ແຕ່ໃນຄວາມເປັນຈິງແລ້ວ ທີມງານຂອງລາວໂພສໄດ້ເຂົ້າໄປສອບຖາມຂໍ້ມູນຄວາມຈິງກັບເຈົ້າໜ້າທີ່ໄຟຟ້າຊຶ່ງໄດ້ຄຳຕອບມາວ່າ ກໍລະນີນີ້ຖືເປັນໂຄສະນາຊວນເຊື່ອ ເປັນເລື່ອງທີ່ຜິດກົດໝາຍ ແລະ ເປັນໄປບໍ່ໄດ້ທີ່ອຸປະກອນດັ່ງກ່າວຈະສາມາດຊ່ວຍປະຢັດໄຟຟ້າໄດ້ ແຕ່ຖ້າໄດ້ແທ້ກໍອາດເປັນການກັກກະແສໄຟຟ້າຊຶ່ງອາດກໍ່ໃຫ້ເກີດກະແສໄຟຟ້າລັດວົງຈອນທີ່ຈະເປັນອັນຕະລາຍຮ້າຍແຮງຕໍ່ຜູ້ທີ່ນຳໃຊ້ເອງ ຊຶ່ງປັດຈຸບັນເຈົ້າໜ້າທີ່ກ່ຽວຂ້ອງພວມດຳເນີນການສືບຫາຕົ້ນຕໍແຫຼ່ງທີ່ມາຂອງອຸປະກອນດັ່ງກ່າວ.
ສຳລັບການແຊຣ ການໂພສ ທີ່ທ່ານໄດ້ເຫັນທາງໂລກໂຊຊຽວນັ້ນແມ່ນເປັນພຽງການໂຄ ສະນາຂາຍສິນຄ້າເທົ່ານັ້ນ ຊຶ່ງທາງສູນໄຟຟ້າບໍ່ມີສ່ວນກ່ຽວຂ້ອງ ແລະ ຮັບຮູ້ກ່ຽວກັບເລື່ອງນີ້ ຊຶ່ງຖ້າຫາກທາງເຈົ້າໜ້າທີ່ກວດພົບ ຫຼື ເຫັນຜູ້ຊົມໃຊ້ອຸປະກອນດັ່ງກ່າວແມ່ນຈະຖືກສອບສວນ ແລະ ດຳເນີນຄະດີຕາມກົດໝາຍ ດັ່ງນັ້ນ ຈຶ່ງຂໍຮຽກຮ້ອງມາຍັງພໍ່ແມ່ປະຊາຊົນທຸກຄົນຈົ່ງມີສະຕິ ແລະ ຄິດໃຫ້ຮອບຄອບກ່ຽວກັບກໍລະນີນີ້.
ໂດຍ: ສະຫະລັດ ວອນທິວົງໄຊ