ຫຼາຍຄົນມັກເລືອກໃຊ້ຈອກຕາມຄວາມສະບາຍຂອງໃຜລາວ ຫຼື ຄວາມສວຍງາມຂອງສີສັນ ແລະ ລວດລາຍຕ່າງໆຂອງຈອກນ້ຳ ແຕ່ຮູ້ ຫຼື ບໍ່ວ່າຈອກແຕ່ລະປະເພດມີຄວາມປອດໄພບໍ່ເທົ່າກັນ! ດັ່ງນັ້ນ ເຮົາມາຊອກຮູ້ໄປພ້ອມໆກັນວ່າຈອກປະເພດໃດໃຊ້ແລ້ວອັນຕະລາຍ ແລະ ປະເພດໃດທີ່ໃຊ້ແລ້ວປອດໄພ.
ປະເພດທີ່ເປັນອັນຕະລາຍໄດ້ແກ່ ຈອກເຈ້ຍ ຊຶ່ງສ່ວນໃຫຍ່ແມ່ນຖືກນຳໃຊ້ໃນງານສັງສັນ ງານເທສະການ ແລະ ງານອື່ນໆ ເພາະວ່າເປັນຈອກທີ່ໃຊ້ງ່າຍ ໃຊ້ຄັ້ງດຽວແລ້ວຖິ້ມ ແຕ່ສິ່ງທີ່ແຝງມາພ້ອມກັບສີສັນ ແລະ ຄວາມສວຍງາມອາດປົນເປື້ອນມາພ້ອມກັບສານຟອກຂາວທີ່ເປັນອັນຕະລາຍຕໍ່ສຸຂະພາບທັງໄລຍະສັ້ນ ແລະ ໄລຍະຍາວ ຈອກຢາງ ບາງປະເພດທີ່ບໍ່ສາມາດກັນຄວາມຮ້ອນໄດ້ ເມື່ອເຮົາໆທ່ານໆນຳໄປໃສ່ເຄື່ອງດື່ມຮ້ອນສານເຄມີໃນພລາສຕິກກໍຈະລະລາຍປະປົນໄປກັບເຄື່ອງດື່ມທີ່ເຮົາດື່ມເຂົ້າສູ່ຮ່າງກາຍ ຈອກທີ່ມີສີສັນສົດໃສ ບາງຊະນິດອາດມີສານໂລຫະໜັກເຊັ່ນ ຊືນເຄືອບຢູ່ພາຍໃນຈອກ ແລະ ເມື່ອປະສົບເຄື່ອງດື່ມທີ່ມີລິດເປັນກົດ ຊືນກໍຈະລະລາຍອອກມາປົນກັບເຄື່ອງດື່ມທີ່ສົ່ງຜົນຮ້າຍຕໍ່ສຸຂະພາບ ແລະ ຮ່າງກາຍ ແລະ ປະເພດຈອກໂລຫະ ໂດຍສະເພາະປະເພດສະແຕນເລສ ນອກຈາກຈະມີລາຄາແພງແລ້ວຍັງມີອັນຕະລາຍແຝງມາພ້ອມ ເພາະເວລາທີ່ໃສ່ເຄື່ອງດື່ມທີ່ມີລິດເປັນກົດເຊັ່ນ ກາເຟ ນ້ຳໝາກໄມ້ ແລະ ອື່ນໆ ໂລຫະອາດຫຼຸດອອກມາປົກກັບເຄື່ອງດື່ມເຮັດໃຫ້ເກີດອັນຕະລາຍຕໍ່ສຸຂະພາບ.
ປະເພດຈອກທີ່ປອດໄພ ແມ່ນປະເພດຈອກແກ້ວທີ່ບໍ່ຜ່ານສານເຄມີໃດໆ ຜິວສຳຜັດໝື່ນ ງ່າຍຕໍ່ການເຮັດຄວາມສະອາດ ແລະ ບໍ່ເປັນແຫຼ່ງສະສົມຂອງແບັກທີເຣຍ ແຕ່ທົນຄວາມຮ້ອນບໍ່ໄດ້ເທົ່າທີ່ຄວນ ເພາະຈອກອາດແຕກຖ້າຫາກໃສ່ເຄື່ອງດື່ມຮ້ອນເກີນໄປ ແລະ ຈອກເຊຣາມິກທີ່ບໍ່ມີລວດລາຍ ຖືເປັນປະເພດຈອກທີ່ມີຄວາມປອດໄພທີ່ສຸດ ສາມາດທົນຄວາມຮ້ອນໄດ້ດີ ແລະ ຮັກສາອຸນຫະພູມໄດ້ ຖືວ່າເປັນໂຕເລືອກທີ່ດີທີ່ສຸດໃນການນຳມາໃຊ້ເປັນພາຊະນະໃສ່ເຄື່ອງດື່ມ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: postjung