ເມື່ອເວລາປະມານ 10:53 ນາທີ (ຕາມເວລາທ້ອງຖິ່ນ) ຂອງວັນທີ 24 ມິຖຸນາ 2019 ສູນເຄືອຂ່າຍແຜ່ນດິນໄຫວຂອງຈີນກວດພົບແຮງສັ່ນສະເທືອນທີ່ວັດແທກລະດັບຄວາມຮຸນແຮງໄດ້ 7,6 ແມັກນີຈູດ ຂະນະທີ່ສຳນັກທໍລະນີວິທະຍາຂອງອາເມຣິກາໄດ້ລະບຸວ່າ ພົບແຜ່ນດິນໄຫວຂະໜາດ 7,3 ແມັກນີຈູດທີ່ມີຈຸດສູນກາງໃນທະເລບັນດາ ແລະ ຢູ່ເລິກລົງໄປ 208 ກີໂລແມັດ.
ເຫດການດັ່ງກ່າວເກີດຂຶ້ນພາຍຫຼັງບໍ່ເທົ່າໃດຊົ່ວໂມງທີ່ເກີດແຜ່ນດິນໄຫວລະດັບແຮງສັ່ນສະເທື່ອນລະດັບ 6,1 ແມັກນີຈູດຫ່າງຈາກເມືອງອາເບປຸຣະໃນແຂວງປາປົວ ໄປທາງຕາເວັນຕົກປະມານ 240 ກີໂລແມັດ ແລະ ເລິກລົງໄປ 21 ກີໂລແມັດ ເບື້ອງຕົ້ນຍັງບໍ່ມີປະກາດເຕືອນຄື້ນຍັກສຶນາມິ ແລະ ຍັງມີພົບຜູ້ເສຍຊີວິດ ລວມເຖິງຄວາມເສຍຫາຍຮ້າຍແຮງ ທັງນີ້ ອິນໂດເນເຊຍຕັ້ງຢູ່ເທິງວົງແຫວນໄຟ ຈຶ່ງເກີດແຜ່ນດິນໄຫວເລື້ອຍໆ ຂະນະທີ່ເມື່ອປີຜ່ານມາກໍເກີດເຫດການແຜ່ນດິນໄຫວຂະໜາດ 7,5 ແມັກນີຈູດ ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 2.200 ລາຍ.
ຖືເປັນຄວາມສູນເສຍຄັ້ງໃຫຍ່ທີ່ສຸດໃນຮອບ 14 ປີ ຫຼັງເກີດເຫດແຜ່ນດິນໄຫວລະດັບ 9,1 ແມັກນີຈູດໃນແຂວງອາເຈະເມື່ອປີ 2004 ຊຶ່ງກໍ່ໃຫ້ເກີດຄື້ນຍັກສຶນາມິ ແລະ ມີຜູ້ເສຍຊີວິດຫຼາຍກວ່າ 170.000 ລາຍໃນຫຼາຍປະເທດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: khaosod