ທ່ານນາຍົກລັດຖະມົນຕີ ທ່ານ ທອງລຸນ ສີສຸລິດ ໄດ້ສະແດງຄວາມເປັນຫ່ວງກ່ຽວກັບກໍລະນີສານເຄມີຕົກຄ້າງຈາກການປູກພືດກະສິກຳບາງຊະນິດໃນລາວທີ່ຈະສົ່ງຜົນກະທົບຫຼາຍດ້ານ ໂດຍສະເພາະການປູກກ້ວຍ ຊຶ່ງຖ້າຫາກພົບເຫັນຜູ້ປະກອບການທີ່ນຳໃຊ້ສານເຄມີແມ່ນໃຫ້ຈັບ (ຈັບມາດຳເນີນຄະດີ) ໄດ້ທັນທີ.
ຕໍ່ກັບບັນຫາດັ່ງກ່າວທ່ານນາຍົກໄດ້ກ່າວວ່າ ສານເຄມີທີ່ສັ່ງຫ້າມຫາກມີການພົບເຫັນການນຳເຂົ້າແບບຜິດກົດໝາຍແມ່ນໃຫ້ດຳ ເນີນຄະດີໄດ້ທັນທີ ເພາະຈະສົ່ງຜົນກະທົບໂດຍກົງຕໍ່ສິ່ງແວດລ້ອມ ໂດຍກົດໝາຍໄດ້ກຳນົດໄວ້ຈະແຈ້ງເຖິງປະເພດສານເຄມີທີ່ສາມາດນຳເຂົ້າ ແລະ ຫ້າມນຳເຂົ້າ ພ້ອມນີ້ ກໍໄດ້ເນັ້ນໃຫ້ພາກສ່ວນກ່ຽວຂ້ອງຈັດຕັ້ງປະຕິບັດຢ່າງເຂັ້ມງວດ.
ອີງຕາມຂໍ້ມູນຈາກກະຊວງກະສິກຳ ແລະ ປ່າໄມ້ໃຫ້ຮູ້ວ່າ ປັດຈຸບັນສວນກ້ວຍຫອມໃນລາວມີເນື້ອທີ່ທັງໝົດປະມານ 15.000 ເຮັກ ຕາ ໃນນັ້ນ ສ່ວນໃຫຍ່ເປັນຂອງນັກລົງທຶນຈາກ ສປ ຈີນ ຊຶ່ງໃນຊຸມປີຜ່ານມາລັດຖະບານກໍໄດ້ມີການກວດພົບບາງບໍລິສັດປູກກ້ວຍທີ່ໄດ້ນຳໃຊ້ຢາປາບສັດຕູພືດ (ຢາຕ້ອງຫ້າມ) ເຂົ້າໃນການຜະລິດ.
ຢ່າງໃດກໍດີ ລະຫວ່າງລາຍຮັບທີ່ໄດ້ຈາກການສົ່ງອອກຊຶ່ງເປັນເມັດເງິນຈຳນວນມະຫາສານ ແລະ ຜົນກະທົບຂອງເຄມີທີ່ຕົກຄ້າງຊຶ່ງອາດຈະກາຍເປັນໄພຄຸກຄາມຕໍ່ສຸຂະພາບ ແລະ ຊີວິດຂອງປະຊາຊົນລາວໃນໄລຍະຍາວ ນີ້ຖືເປັນບັ້ງໂຈດສຳຄັນທີ່ລັດຖະບານຕ້ອງເອົາໃຈໃສ່ ປັບປຸງ ແລະ ຫາວິທີແກ້ໄຂຮ່ວມກັນຢ່າງຮີບດ່ວນ.
ໂດຍ: ສະຫະລັດ ວອນທິວົງໄຊ