ປະຊາຊົນຊາວເຮຕິຈຳນວນຫຼາຍພັນລ້ານຄົນອອກມາຍ່າງຂະບວນຕາມຖະໜົນຫຼວງໃນນະຄອນປໍຣໂຕແປຣງ ເພື່ອຮຽກຮ້ອງໃຫ້ ທ່ານ ໂຈເວແນລ ໂມອີສ ປະທານາທິບໍດີລາອອກຈາກຕຳແໜ່ງຂໍ້ຫາ “ສໍ້ໂກງງົບປະມານຂອງແຜ່ນດິນ”.
ກໍລະນີດັ່ງກ່າວເກີດຂຶ້ນພາຍຫຼັງຜູ້ພິພາກສາຈາກສານກວດສອບເງິນແຜ່ນດິນໄດ້ເປີດເຜີຍເມື່ອບໍ່ດົນມານີ້ວ່າ ທ່ານ ໂມອີສ ເປັນສູນກາຂອງແຜນການສໍ້ໂກງຊັບສິນຈາກງົບປະມານຊ່ວຍເຫຼືອຈາກເປໂຕຣໄຄຣກຸ່ມຂໍ້ຕົກລົງຄວາມຮ່ວມມືດ້ານພະລັງງານທີ່ກໍ່ຕັ້ງຂຶ້ນໂດຍລັດຖະບານເວເນຊູເອລາສຳລັບສ້າງຖະໜົນ ໂດຍລາຍງານໄດ້ລະບຸວ່າ ລັດຖະບານເຮຕິໄດ້ເຮັດສັນຍາກັບບໍລິສັດເອກະຊົນ 2 ແຫ່ງຄື ອະກຣີທຣານ ແລະ ເບເທັກ ໃນການກໍ່ສ້າງຖະໜົນ ແລະ ໄດ້ກວດສອບພົບພາຍຫຼັງວ່າ 2 ບໍລິສັດນີ້ມີໝາຍເລກຜູ້ເສຍພາສີ ແລະ ເຈົ້າຂອງດຽວກັນ.
ຂະນະທີ່ ທ່ານ ໂມອີສ ກ່ອນທີ່ຈະເຂົ້າມາຮັບຕຳແໜ່ງປະທານາທິບໍດີເມື່ອປີ 2017 ກໍເຄີຍເປັນຜູ້ບໍລິຫານບໍລິສັດອະກຣີທຣານມາກ່ອນ ທັງນີ້ ບໍລິສັດດັ່ງກ່າວໄດ້ງົບປະມານສ້າງຖະໜົນມູນຄ່າ 700.000 ໂດລາ ແຕ່ກໍໄດ້ນຳເງິນດັ່ງກ່າວໄປປູກກ້ວຍແທນທີ່ຈະນຳມາສ້າງຖະໜົນ.
ຄະດີດັ່ງກ່າວສົ່ງຜົນໃຫ້ເກີດການຕັ້ງຄະນະກຳມະການກວດສອບໂດຍສະພາຜູ້ແທນລາຊະດອນເມື່ອປີ 2016 ແລະ 2017 ກ່ອນທີ່ຈະເກີດການປະທ້ວງອັນນຳໄປສູ່ການສືບສວນ-ສອບສວນໂດຍສານກວດສອບເງິນແຜ່ນດິນກ່ຽວກັບການນຳໃຊ້ງົບປະມານຊ່ວຍເຫຼືອຂອງກຸ່ມເປໂຕຣໄຄຣ ມູນຄ່າລວມເຖິງ 1.600 ລ້ານໂດລາ ຂະນະທີ່ການປະທ້ວງຫຼ້າສຸດໄດ້ຮັບການສະໜັບສະໜູນໂດຍພັກຝ່າຍຄ້ານທີ່ລົງຊີງໄຊແຂ່ງກັບ ທ່ານ ໂມອີສ ໃນການເລືອກຕັ້ງເມື່ອປີ 2017 ທີ່ຜ່ານມາ.
ທັງນີ້ ມີຊາວເຮຕິເສຍຊີວິດແລ້ວຢ່າງໜ້ອຍ 7 ລາຍໃນການປະທ້ວງເມື່ອເດືອນກຸມພາທີ່ຜ່ານມາ ຊຶ່ງສົ່ງຜົນໃຫ້ລັດຖະບານຖືກຍຶດອຳນາດ ແຕ່ມາຮອດປັດຈຸບັນກໍຍັງບໍ່ມີການແຕ່ງຕັ້ງຄະລະລັດຖະບານຊຸດໃໝ່ ຍັງບໍ່ມີການອະນຸມັດງົບປະມານແຜ່ນດິນ ແລະ ຍັງບໍ່ມີຄວາມຊັດເຈນວ່າຈະມີການເລືອກຕັ້ງສະມາຊິກສະພາຜູ້ແທນລາຊະດອນຄັ້ງໃໝ່ໃນເມື່ອໃດ?.
ຮຽບຮຽງ: ສະຫະລັດ ວອນທິວົງໄຊ
ຮູບພາບ:matichon