ມະຫາວິທະຍາໄລແຫ່ງຊາດ ໂຮງຮຽນພອນສະຫວັນ-ຊົນເຜົ່າກຽມມະຫາວິທະຍາໄລ ຮ່ວມກັບໂຮງຮຽນກຽດຕິສັກນາໆຊາດ ຕາງໜ້າໃຫ້ລັດຖະບານລາວເປັນເຈົ້າພາບຈັດກິດຈະກຳເປີດຄ້າຍນັກຮຽນອາຊຽນ (ຍາມພັກແລ້ງ) ຄັ້ງທີ III ຢູ່ ສປປ ລາວ ໃນລະຫວ່າງວັນທີ 3-7 ມິຖຸນາ 2019 ຊຶ່ງມີນັກຮຽນຫຼາຍກວ່າ 60 ຄົນ ຈາກ 7 ປະເທດອາຊຽນເຂົ້າຮ່ວມ.
ພິທີດັ່ງຈັດຂຶ້ນເມື່ອວັນທີ 4 ມິຖຸນາ 2019 ຢູ່ສວນພຸໄທທີລະ ເມືອງໄຊເສດຖາ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ພຸດ ສີມມາລາວົງ ຮອງລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ ທ່ານ ຄຳພຸດ ພົມມະສອນ ຜູ້ອຳນວຍການໂຮງຮຽນພອນສະຫວັນ-ຊົນເຜົ່າ ກຽມມະຫາວິທະຍາໄລກ່າວວ່າ ການເປີດຄ້າຍນັກຮຽນອາຊຽນຢູ່ ສປປ ລາວ ໃນຄັ້ງນີ້ ມີນັກຮຽນຊັ້ນມັດທະຍົມ ແລະ ກຽມມະຫາວິທະຍາໄລຈາກ 7 ປະເທດອາຊຽນ ເຂົ້າຮ່ວມຄື ສປປ ລາວ ສສ ຫວຽດນາມ ໄທ ມາເລເຊຍ ມຽນມາ ຟີລິບປິນ ແລະ ສິງກະໂປ ຊຶ່ງບັນດານັກຮຽນຈາກປະເທດອາຊຽນ ຈະໄດ້ຮຽນຮູ້ ແລະ ແລກປ່ຽນວັດທະນະທຳ ລວມເຖິງຮຽນຮູ້ວິຖີການດຳລົງຊີວິດ ຮີດຄອງປະເພນີ ການພັດທະນາທາງດ້ານການທ່ອງທ່ຽວ ດ້ານກະສິກຳ ແລະ ດ້ານອື່ນໆ ພ້ອມນີ້ ກໍໄດ້ໄປທັດສະນະສຶກສາຢູ່ສະຖານທີ່ທ່ອງທ່ຽວທາງທຳມະຊາດ ປະຫວັດສາດ ແລະ ວັດທະນະທຳຢູ່ນະຄອນຫຼວງວຽງຈັນ.
ພ້ອມນີ້ ກໍໄດ້ຈັດພິທີບາສີສູ່ຂວັນໃຫ້ພອນແກ່ນ້ອງນັກຮຽນ ແລະ ຄະນະຜູ້ແທນຈາກບັນດາປະເທດອາຊຽນທີ່ເຂົ້າຮ່ວມເພື່ອເປັນການເຜີຍແຜ່ຮີດຄອງປະເພນີດີງາມຂອງຊາດລາວທີ່ເຄີຍປະຕິບັດກັນມາແຕ່ບູຮານການໃຫ້ບັນດາປະເທດສະມາຊິກອາຊຽນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ທັງເປັນການປະກອບສ່ວນຮັດແໜ້ນການພົວພັນຮ່ວມມືລະຫວ່າງ ສປ ປ ລາວ ກັບບັນດາປະເທດອາຊຽນໃຫ້ໄດ້ຮັບການພັດທະນາໃຫ້ແໜ້ນແຟ້ນຍິ່ງຂຶ້ນ.
ໂດຍ: ສະຫະລັດ ວອນທິວົງໄຊ