ສຳນັກຂ່າວຕ່າງປະເທດໄດ້ລາຍງານເມື່ອທ້າຍເດືອນພຶດສະພາຜ່ານມາກ່ຽວກັບການສ້າງສະຖິຕິໂລກ ຫຼື ກິນເນສ ເວິລ ເຣັກຂອດ ເມື່ອຊາຍທີ່ມີຊື່ວ່າ ແດນ ສະເປນເຊີຣ ພະນັກງານໄວ 33 ປີຂອງຮ້ານຣິສັນໃນເມືອງໄບຣຕັນ ປະເທດອັງກິດ ເມື່ອ ແດນ ກາຍເປັນເຈົ້າຂອງສະຖິຕິໂລກຄົນໃໝ່ໃນກິນເນສບຸກທີ່ສາມາດໃຊ້ນິ້ວມືພຽງນິ້ວດຽວໝຸນເບາະຮອງນັ່ງໄດ້ດົນເຖິງ 18 ນາທີ 14 ວິນາທີ ຊຶ່ງທຳລາຍສະຖິຕິເກົ່າທີ່ເຄີຍມີຄົນເຮັດໄດ້ກ່ອນໜ້ານີ້ຄື 15 ນາທີ 7 ວິນາທີ.
ຂະນະທີ່ ແດນ ໄດ້ເລົ່າວ່າ ຕົນເອງມັກເບາະຮອງນັ່ງມາໝຸນຫຼິ້ນເປັນປະຈຳລະຫວ່າງນັ່ງເບິ່ງໂທລະພາບຕັ້ງແຕ່ອາຍຸ 10 ປີ ທັງນີ້ ເບື້ອງຫຼັງຄວາມສຳເລັດຂອງ ແດນ ກໍຈະເກີດຂຶ້ນບໍ່ໄດ້ຖ້າຫາກບໍ່ມີພັນລະຍາທີ່ຮູ້ໃຈ ຄອຍໃຫ້ກຳລັງໃຈ ແລະ ຢູ່ຄຽງຂ້າງຕະຫຼອດມາ ແລະ ກໍເປັນພັນລະຍາຂອງລາວທີ່ເປັນມືກ້ອງຖ່າຍຄລິບວິດິໂອທີ່ທຳລາຍສະຖິຕິໂລກໃນຄັ້ງນີ້ ແລະ ອີກໜຶ່ງແຮງບັນດານໃຈທີ່ຊ່ວຍໃຫ້ ແດນ ສະເປນເຊີຣ ມີຄວາມມຸ່ງໝັ້ນຈົນປະສົບຄວາມສຳເລັດນັ້ນກໍຄື ແດນ ຕ້ອງການລະດົມທຶນໃຫ້ແກ່ອົງການ ການກຸສົນທີ່ມີຊື່ວ່າ ໄກ ດັອກ (Guide Dogs).
ຮຽບຮຽງ: ສະຫະລັດ ວອນທິວົງໄຊ
ຮູບພາບ: www.theargus.co.uk