ທາງການຮົງກາຣີໄດ້ອອກມາຖະແຫຼງວ່າ ອາດບໍ່ມີຄວາມຫວັງທີ່ຈະພົບຜູ້ລອດຊີວິດທີ່ຍັງສູນຫາຍອີກ 21 ຄົນຈາກເຫດເຮືອລ່ອງແມ່ນ້ຳດານູບຂອງກຸ່ມນັກທ່ອງທ່ຽວ ສ.ເກົາຫຼີ ຕຳກັບເຮືອສຳລານຂະໜາດໃຫຍ່ສົ່ງຜົນໃຫ້ເຮືອຂອງນັກທ່ອງທ່ຽວ ສ.ເກົາຫຼີ ຈົມກາງແມ່ນ້ຳດານູບ ເຫດການດັ່ງກ່າວເກີດຂຶ້ນເມື່ອວັນທີ 29 ພຶດສະພາຜ່ານມາ ຊຶ່ງມີຜູ້ເສຍຊີວິດແລ້ວຢ່າງໜ້ອຍ 7 ລາຍ ຂະນະທີ່ເຈົ້າໜ້າທີ່ໄດ້ກັກຕົວກັບຕັນເຮືອສຳລານໄວ້ສືບສວນ.
ຂະນະທີ່ທີມນັກດຳນ້ຳກອງທັບບົກກໍໄດ້ເຂົ້າຮ່ວມປະຕິບັດການຄົ້ນຫາຜູ້ສູນຫາຍຢ່າງຮີບດ່ວນຊຶ່ງການຄົ້ນຫາກໍເຕັມໄປດ້ວຍອຸປະສັກ ສ່ວນກະຊວງການຕ່າງປະເທດຂອງ ສ.ເກົາຫຼີ ກໍໄດ້ຖະແຫຼງວ່າ ເຮືອທີ່ມີຊື່ວ່າ ເມີຣເມດ ຊຶ່ງເປັນເຮືອນຳທ່ຽວລ່ອງແມ່ນ້ຳດານູບ ມີນັກທ່ອງທ່ຽວຊາວ ສ.ເກົາຫຼີ ທັງໝົດ 33 ຄົນ ແຍກເປັນນັກທ່ອງທ່ຽວ 30 ຄົນ ແລະ ຄົນນຳທ່ຽວ 3 ຄົນ ທັງນີ້ ຜູ້ທີ່ເສຍຊີວິດທັງ 7 ລາຍແມ່ນຊາວ ສ.ເກົາຫຼີ ແລະ ນີ້ກໍຖືເປັນອຸບັດເຫດທາງເຮືອທີ່ຮຸນແຮງທີ່ສຸດໃນຮົງກາຣີ.
ສ່ວນປະທານາທິບໍດີ ມຸນ ແຈ-ອິນ ຂອງ ສ.ເກົາຫຼີ ກໍໄດ້ສັ່ງການໃຫ້ລັດຖະບານດຳເນີນການທຸກວິທີທາງເພື່ອປະຕິບັດການຊ່ວຍເຫຼືອສຳລັບຜູ້ປະສົບເຄາະຮ້າຍ ແລະ ລັດຖະບານໄດ້ສົ່ງເຈົ້າໜ້າທີ່ 18 ຄົນເດີນທາງໄປຍັງນະຄອນບູດາເປສ ປະເທດຮົງກາຣີເພື່ອຮ່ວມປະຕິບັດການຊ່ວຍເຫຼືອ.
ຂະນະທີ່ ທ່ານ ວິກເຕີຣ ອໍຣບານ ນາຍົກລັດຖະມົນຕີຂອງຮົງກາຣີກໍໄດ້ສົ່ງສານສະແດງຄວາມເສຍໃຈຢ່າງສູງເຖິງປະທານາທິບໍດີ ມຸນ ແຈ-ອິນ ແລະ ຈະໃຫ້ຄວາມຮ່ວມມືກັບລັດຖະບານ ສ.ເກົາຫຼີ ຢ່າງໃກ້ຊິດກ່ຽວກັບອຸບັດເຫດໃນຄັ້ງນີ້ ແລະ ການຄົ້ນຫາຜູ້ປະສົບເຄາະຍັງຈະດຳເນີນຕໍ່ໄປ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: REUTERS