ເລື່ອງຂອງໄຟຟ້າຍັງເກີດມີຄຳຖາມ ຫຼື ຂໍ້ສົງໃສຂຶ້ນມາເລື່ອຍໆ ຊຶ່ງເປັນອີກໜຶ່ງປະເດັນທີ່ຫຼາຍຄົນອາດມີຄວາມສົນໃຈ ແລະ ມີປະສົບການກ່ຽວກັບໜີ້ຄ້າງຈ່າຍທີ່ຍົກຍອດມາຈາກເດືອນກ່ອນ ເຖິງແມ່ນວ່າທ່ານຈະເຮັດການຊຳລະຄ່າໄຟຟ້າໝົດແລ້ວກໍຕາມ.
ສຳລັບໜີ້ຄ້າງຈ່າຍທີ່ຍົກຍອດມາ ເຖິງແມ່ນວ່າຈະເຮັດການຊຳລະໄປແລ້ວ ເຖິງມັນຈະເປັນພຽງຄຳຖາມເບົາໆຂອງໃຜຫຼາຍຄົນ ແຕ່ເຊື່ອວ່າມັນກໍເປັນຄຳຖາມທີ່ຫຼາຍຄົນສົງໃສ ແລະ ຢາກຮູ້ຄຳຕອບ ດັ່ງນັ້ນ ທີມງານຂອງພວກເຮົາຈຶ່ງໄດ້ສອບຖາມໄປຍັງພະນັກງານໜ່ວຍບໍລິການໄຟຟ້າແຫ່ງໜຶ່ງ (ເຂດຈີນາຍໂມ້, ເມືອງ ສີສັດຕະນາກ) ຊຶ່ງກໍໄດ້ຄຳຕອບດັ່ງນີ້.
ໃນທຸກໆຕົ້ນເດືອນທາງໜ່ວຍບໍລິການໄຟຟ້າຈະອອກໃບແຈ້ງຄ່າໄຟຟ້າໃນລະຫວ່າງວັນທີ 6-9 ຂອງຕົ້ນເດືອນ ແລະ ການຊຳລະຄ່າໄຟຟ້າແມ່ນບໍ່ໃຫ້ກາຍວັນທີ 5-6 ຂອງເດືອນຕໍ່ໄປ (ຕົວຢ່າງ ໃບແຈ້ງຄ່າໄຟຟ້າເດືອນ 4 ວັນທີຜະລິດໃບເກັບເງິນຄ່າໄຟຟ້າ ວັນທີ 8 ເມສາ 2019 ຖ້າທ່ານໄປຊຳລະເງິນຊ້າສຸດບໍ່ກາຍວັນທີ 5 ພຶດສະພາ 2019) ໃບບິນແຈ້ງເກັບເງິນຂອງເດືອນ 5 ກໍຈະບໍ່ມີໜີ້ຄ້າງຈ່າຍ.
ໜີ້ຄ້າງຈ່າຍທີ່ຍົກຍອດມານັ້ນ ມັນບໍ່ແມ່ນບັນຫາໃຫຍ່ບໍ່ຕ້ອງຕົກໃຈວ່າຈະເກີດຜົນກະທົບໃດໆ ຫາກວ່າທ່ານໄດ້ເຮັດການຊໍາລະແລ້ວ ນອກຈາກວ່າທ່ານຍັງຄ້າງຈ່າຍຄ່າໄຟຟ້າມັນກໍຈະກາຍເປັນໜີ້ສະສົມ ທາງທີ່ດີທຸກຄົນຄວນມີສະຕິໃນການຊໍາລະບໍ່ວ່າຈະເປັນຄ່ານ້ຳ ຄ່າໄຟຟ້າ ແລະ ອື່ນໆໃຫ້ກົງຕາມເວລາທີ່ກຳນົດແມ່ນດີທີ່ສຸດ.
ຊຶ່ງຖ້າຫາກບັນດາທ່ານມີຂໍ້ຂ້ອງໃຈ ຫຼື ມີຂໍ້ຊັກຖາມໃດໆກ່ຽວກັບເລື່ອງດັ່ງກ່າວສາມາດເຂົ້າໄປສອບຖາມລາຍລະອຽດຕ່າງໆໄດ້ຕາມ ໜ່ວຍບໍລິການສາຂາທີ່ຂື້ນກັບບ້ານທ່ານໄດ້.
ໂດຍ: ບຸດສະດີ ສາຍນ້ຳມັດ