ສຳນັກຂ່າວຕ່າງປະເທດລາຍງານຈາກນະຄອນຫຼວງປຽງຢາງຂອງ ສປ ເກົາຫຼີ ເມື່ອວັນທີ 18 ພຶດສະພາຜ່ານມາວ່າ ສປ ເກົາຫຼີພວມຜະເຊີນວິກິດໄພແລ້ງຄັ້ງຮຸນແຮງທີ່ສຸດໃນຮອບ 100 ປີ ຊຶ່ງສົ່ງຜົນກະທົບຢ່າງໜັກຕໍ່ພາກກະສິກຳ ແລະ ຜົນຜະລິດອາຫານພາຍໃນປະເທດ.
ທັງນີ້ ປະລິມານນ້ຳຝົນ ຫຼື ຫິມະທີ່ຕົກໃນ ສປ ເກົາຫຼີ ລະຫວ່າງກາງເດືອນພຶດສະພາປີຜ່ານມາເຖິງກາງເດືອນພຶດສະພາປີນີ້ ມີພຽງແຕ່ 56,3 ມິລິແມັດ ຊຶ່ງເປັນໂຕເລກຕ່ຳສຸດນັບຕັ້ງແຕ່ປີ 1917.
ຂໍ້ມູນດັ່ງກ່າວສອດຄ່ອງກັບລາຍງານຂອງໂຄງການອາຫານໂລກ (WFP) ທີ່ລະບຸວ່າ ຜົນຜະລິດດ້ານກະສິກຳຂອງ ສປ ເກົາຫຼີ ປີຜ່ານມາຢູ່ທີ່ 4.951 ລ້ານໂຕນ ຫຼຸດລົງ 503.000 ໂຕນຈາກປີ 2017 ແລະ ຜົນຜະລິດມີທ່າອຽງຕ່ຳກວ່າເປົ້າໝາຍໃນປີນີ້ ໂດຍສະເພາະເຂົ້າຈ້າວ ຂ້າວສາລີ ມັນຝຣັ່ງ ແລະ ຖົ່ວເຫຼືອງ ທັງນີ້ WFP ວິເຄາະວ່າ ປັດໄຈສຳຄັນທີ່ສົ່ງຜົນກະທົບຕໍ່ພາກກະສິກຳຂອງ ສປ ເກົາຫຼີ ແມ່ນກ່ຽວຂ້ອງກັບສະພາບອາກາດທີ່ປ່ຽນແປງຢ່າງໜັກ ບໍ່ວ່າຈະເປັນໄພທຳມະຊາດ (ອຸທົກກະໄພ ແລະ ວິກິດໄພແລ້ງ) ຊຶ່ງລັດຖະບານນະຄອນຫຼວງປຽງຢາງຍັງບໍ່ເປີດໂອກາດໃຫ້ເຈົ້າໜ້າທີ່ຂອງ UN ເຂົ້າເຖິງເຂດທີ່ພວມປະສົບບັນຫາ.
ນອກເໜືອຈາກພາວະປ່ຽນແປງຂອງສະພາບອາກາດຈະສົ່ງຜົນກະທົບຕໍ່ປະລິມານຜົນຜະລິດ້ານກະສິກຳຂອງ ສປ ເກົາຫຼີ ແລ້ວ ຍັງສົ່ງຜົນກະທົບຕໍ່ຄຸນນະພາບຊີວິດຂອງປະຊາຊົນພາຍໃນປະເທດອີກດ້ວຍ ຊຶ່ງລາຍງານຂອງ WFP ໄດ້ລະບຸວ່າ ຊາວ ສປ ເກົາຫຼີ ປະມານ 10,1 ລ້ານຄົນ ຫຼື ປະມານ 40% ຂອງປະຊາກອນທົ່ວປະເທດພວມເຈັບປ່ວຍຍ້ອນພາວະດ້ານໂພຊະນາການ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP