ຫຼາຍຄັ້ງທີ່ເຮົາພົບເຫັນສັດຖືກປະປ່ອຍຕາມຖະໜົນຫົນທາງ, ຖືກຈັບກັກຂັງໃນກົງ ຫຼື ທຳການທໍລະມານຕ່າງໆ ເຊີ່ງສາມາດເຫັນໄດ້ໃນບາງພື້ນທີ່ຂອງສັງຄົມວ່າການທໍລະມານສັດເປັນເລື່ອງທຳມະດາ. ແລ້ວທ່ານຮູ້ບໍວ່າ ປະເທດລາວກໍມີກົດໝາຍກ່ຽວກັບການປົກປ້ອງການທໍລະມານ (ທາລຸນ) ສັດ ຄືກັນກັບນານາປະເທດ, ໃນກົດໝາຍປະມວນອາຍາສະບັບລ່າສຸດ ເຊີ່ງໄດ້ຮັບການຢັ້ງຢືນ ແລະ ມີຜົນສັກສິດທຽບເທົ່າບັນດາກົດໝາຍຕ່າງໆ ທີ່ ສປປ ລາວ ກຳນົດອອກ, ໄດ້ຮັບການປະກາດນຳໃຊ້ໂດຍລັດຖະບານແຫ່ງ ສປປ ລາວ ເມື່ອວັນທີ 18/11/2018.
ຕາມປະມວນກົດໝາຍອາຍາ ມາດຕາ 353 ວ່າດ້ວການທໍລະມານສັດມີເນື້ອໃນດັ່ງນີ້:
ບຸກຄົນໃດຫາກໄດ້ກະທຳຕໍ່ສັດ ທີ່ເປັນການທໍລະມານ ເປັນຕົ້ນການກັກຂັງສັດໂດຍໃຫ້ອົດເຂົ້າ, ອົດນ້ຳ ແລະ ໃຊ້ແຮງງານເກີນຂອບເຂດ ໂດຍບໍ່ໃຫ້ສັດໄດ້ພັກຜ່ອນ, ທຸບຕີທີ່ມີລັກສະນະທາລຸນ, ບັນທຸກ ແລະ ຂົນສົ່ງແບບແອອັດທໍລະມານ, ຂ້າສັດແບບໂຫດຮ້າຍປ່າເຖື່ອນ ຫລື ໃຊ້ສານພິດເບື່ອສັດຈະຖືກລົງໂທດດັດສ້າງໂດຍຕັດອິດສະຫລະພາບ ຫລື ຖືກປັບໄໝ 500.000 ກີບ ຫາ 3 ລ້ານກີບ.
ໃນກໍລະນີການກະທຳຜິດເປັນອາຈິນ (ເຮັດຊໍ້າອີກ) ຈະຖືກລົງໂທດຕັດອິສະລະພາບ ແຕ່ ສາມເດືອນ ຫາ ຫນຶ່ງປີ ແລະ ຈະຖືກປັບໃຫມແຕ່ 3.000.000 ກີບ ຫາ 10.000.000 ກີບ.
ການເພີ່ມໂທດນີ້ແມ່ນສະແດງໃຫ້ເຫັນເຖີງການປ່ຽນແປງທັດສະນະຄະຕິຕໍ່ສັດ ແລະ ມັນຍັງຈະຊ່ວຍໃຫ້ໝັ້ນໃຈໄດ້ເຖີງການຄຸ້ມຄອງສັດຈາກການຖືກທໍລະມານອີກດ້ວຍ. ຕໍ່ກັບບັນດາກົດໝາຍການຄຸ້ມຄອງສັດໄວ້ໃນກົດໝາຍປະມວນອາຍານີ້ ແມ່ນຈະໃຫ້ສິດອຳນາດແກ່ເຈົ້າໜ້າທີ່ ສາມາດນຳໃຊ້ກົດໝາຍໃນການລົງໂທດຜູ້ທີ່ທໍລະມານສັດ ຫຼື ຜູ້ທີ່ໃຊ້ແຮງງານສັດໜັກເກີນໄປໄດ້.
ກົດໝາຍປະມວນອາຍາວ່າດ້ວຍການທາລຸນສັດນີ້ແມ່ນມີຂື້ນເພື່ອຮອງຮັບປະກົດການທາງສັງຄົມ ແລະ ສາມາດແຈ້ງຕໍ່ຕຳຫຼວດສືບສວນ-ສອບສວນ ໄດ້ ຖ້າຫາກພົບເຫັນການທາລຸນສັດ.
ຮຽບຮຽງຂ່າວ: ແຟນຊິສ ສະຫວັນຄຳ
ແຫຼ່ງຂໍ້ມູນ: ປະມວນກົດໝາຍອາຍາ