ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ໄດ້ລົງນາມເຊັນສັນຍາເອກະສານຮ່ວມມື ຈຳນວນ 9 ສະບັບ, ເນື່ອງໃນໂອກາດການເດີນທາງມາຢ້ຽມຢາມ ສັນຖະວະໄມຕີ ສປປ ລາວ ຢ່າງເປັນທາງການຂອງ ສະຫາຍ ຫງວຽນ ຟູຈ້ອງ ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍຄະນະ ໃນວັນທີ 24-25 ກຸມພາ 2019 ເຊິ່ງພິທີລົງນາມໄດ້ຈັດຂຶ້ນ ໃນວັນທີ 24 ກຸມພາ 2019 ທີ່ນະຄອນຫລວງວຽງຈັນ, ໂດຍການເຂົ້າຮ່ວມເປັນສັກຂີພະຍານ ຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ແລະ ສະຫາຍ ຫງວຽນ ຟູ ຈ້ອງ, ພ້ອມດ້ວຍການນຳຂັ້ນສູງ ຂອງສອງປະເທດ.
ບັນດາເອກະສານດັ່ງກ່າວ, ປະກອບມີ:
- ສັນຍາວ່າດ້ວຍການຮ່ວມມືດ້ານການເງິນ.
- ສັນຍາວ່າດ້ວຍການຮ່ວມມື ພັດທະນາໂຄງການພະລັງງານໄຟຟ້າ ແລະ ບໍ່ແຮ່.
- ຂໍ້ຕົກລົງວ່າດ້ວຍການຂຸດຄົ້ນທ່າແຮງບົ່ມຊ້ອນ ໃນການກໍ່ສ້າງທາງລົດໄຟ ວຽງຈັນ-ຫວຸງອາງ.
- ບົດບັນທຶກການຮ່ວມມື ໃນຂົງເຂດຕ້ານການປ່ຽນແປງສະພາບດິນຟ້າອາດກາດ ແລະ ອະນຸລັກຊີວະນາໆ.
- ບົດບັນທຶກມອບ-ຮັບ ໂຄງການສ້າງຖານຂໍ້ມູນຂ່າວສານພູມສັນຖານ ຮັບໃຊ້ການວາງແຜນພັດທະນາເສດຖະກິດ-ສັງຄົມ ແລະ ຕິດຕາມຊັບພະຍາກອນທຳມະຊາດ ແລະ ສິ່ງແວດລ້ອມຢູ່ ສປປ ລາວ.
- ບົດບັນທຶກການຮ່ວມມືວ່າດ້ວຍຈັດຕັ້ງຜັນຂະຫຍາຍໂຄງການ “ປ່ຽນຖ່າຍອຸປະກອນໃຫ້ສະຖານີວິທະຍຸກະຈາຍສຽງແຫ່ງຊາດລາວ”
- ບົດບັນທຶກມອບ-ຮັບ ໂຄງການກໍ່ສ້າງສູນບໍລິການເຕັກນິກກະສິກຳ ແຂວງຫົວພັນ.
- ຂໍ້ຕົກລົງວ່າດ້ວຍການປະຕິບັດໂຄງການສ້ອມແປງ, ຍົກລະດັບເຂດອະນຸສອນສະຖານ ປະທານ ໂຮ່ຈີມິນ ຢູ່ບ້ານຊຽງຫວາງ, ເມືອງໜອງບົກ, ແຂວງຄຳມ່ວນ.
- ບົດບັນທຶການມອບ-ຮັບໂຄງການເພີ່ມທະວີຄວາມອາດສາມາດໃນການຄົ້ນຄວ້າວິທະຍາສາດ ແລະ ພັດທະນາເຕັກໂນໂລຊີ ໃຫ້ແກ່ສະພາວິທະຍາສາດແຫ່ງຊາດລາວ.
ພ້ອມດຽວກັນ, ພາຍຫຼັງສຳເລັດການພົບປະ ໄດ້ໄປຢ້ຽມຢາມສະຫາຍ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ທີ່ ສຳນັກງານນາຍົກລັດຖະມົນຕີ; ພົບປະຢ້ຽມຢາມສະຫາຍນາງປານີ ຢາທໍ່ຕູ້, ປະທານສະພາແຫ່ງຊາດທີ່ ສຳນັກງານສະພາແຫ່ງຊາດ. ສະຫາຍນາຍົກລັດຖະມົນຕີ ແລະ ປະທານສະພາແຫ່ງຊາດກໍ່ໄດ້ສະແດງຄວາມຂອບໃຈ ແລະ ປິຕິຍິນດີຕໍ່ການສະໜັບສະໜູນ ແລະ ຊ່ວຍເຫຼືອອັນລ້ຳຄ່າຂອງພັກ, ລັດ ແລະ ປະຊາຊົນຫວຽດນາມທີ່ມີແກ່ປະຊາຊົນລາວ.
ນອກຈາກນີ້, ສະຫາຍຫງວຽນ ຟູຈ້ອງ, ເລຂາທິການໃຫຍ່, ປະທານປະເທດແຫ່ງສສ ຫວຽດນາມຍັງໄດ້ຢ້ຽມຢາມສະຫາຍຈູມມາລີ ໄຊຍະສອນ, ອະດີດເລຂາທິການໃຫຍ່, ປະທານປະເທດແຫ່ງ ສປປ ລາວ ອີກດ້ວຍ.
ຂຽນໂດຍ: ບຸນມີ ບຸນມີໄຊ
ຮູບພາບ: Lao National radio