ສຳນັກຂ່າວຕ່າງປະເທລາຍງານຈາກນະຄອນຫຼວງຈາກາຕາ ປະເທດອິນໂດເນເຊຍ ເມື່ອວັນທີ 25 ມັງກອນ 2019 ວ່າ ສຳນັກງານບໍລິຫານຈັດການໄພພິບັດແຫ່ງຊາດ (BNPB) ລາຍງານເມື່ອວັນສຸກກ່ຽວກັບສະຖານະການລະດັບນໍ້າລົ້ນເຂື່ອນ “ບິລິ-ບິລິ” ເມື່ອກາງອາທິດນີ້ ສົ່ງຜົນໃຫ້ເກີດນໍ້າຖ້ວມກະທັນຫັນ ແລະ ດິນຖະລົ່ມເປັນວົງກວ້າງໃນພື້ນທີ່ຫຼາຍແຫ່ງທາງຕອນໃຕ້ຂອງເກາະສຸລາເວສີ ເຊິ່ງເປັນສະຖານທີ່ຕັ້ງຂອງເຂື່ອນ ປັດຈຸບັນມີລາຍງານຕົວເລກຜູ້ເສຍຊີວິດ 30 ຄົນ, ມີປະຊາກອນອີກ 30.000ຄົນ ຕ້ອງອົບພະຍົບອອກຈາກບ້ານເຮືອນ ແລະ ມີຜູ້ຕ້ອງໄດ້ຮັບການຮັກສາຕົວທີ່ໂຮງໝໍເກືອບ 50 ຄົນ.
ໄພພິບັດຄັ້ງນີ້ໄດ້ເກີດຂຶ້ນຢ່າງກະທັນຫັນມັນໄດ້ສ້າງຄວາມເສຍຫາຍເປັນວົງກວ້າງໃຫ້ກັບລະບົບໂຄງສ້າງພື້ນຖານຂະໜາດໃຫຍ່ທັງຖະໜົນ ແລະ ຂົວ ກາຍເປັນອຸປະສັກໃຫ້ກັບເຈົ້າໜ້າທີ່ໃນການລຳລຽງຄວາມຊ່ວຍເຫຼືອເຂົ້າສູ່ພື້ນທີ່ປະສົບໄພ ຈິ່ງຕ້ອງໃຊ້ເຮລິຄອບເຕີຫຼາຍລຳເຂົ້າໄປຢ່ອນຖົງເຄື່ອງຊ່ວຍເຫຼືອ ແລະ ອົບພະຍົບປະຊາຊົນແທນ. ນອກຈາກນີ້, ຜູ້ເສຍຊີວິດຍັງມີແນວໂນ້ມເພີ່ມຂຶ້ນເນື່ອງຈາກມີລາຍງານຜູ້ສູນຫາຍ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews