ດອກໄມ້ເປັນສິ່ງທີ່ສາມາດໃຫ້ກັນໄດ້ຕະຫຼອດ ບໍ່ວ່າຈະເປັນວັນຄົບຮອບທີ່ໄດ້ຮັກກັນ, ວັນສໍາຄັນຂອງບ່າວ-ສາວ, ວັນຮັບໃບປະກາດ, ວັນຄອບຄົວ, ວັນເກີດ ຫຼື ໂອກາດພິເສດ ແຕ່ການທີ່ຈະມອບດອກໄມ້ໃຫ້ໃຜຄົນໜຶ່ງຕ້ອງຄໍານຶງເຖິງວ່າຈະມອບໃຫ້ໃຜ ເພື່ອຄວາມເໝາະສົມ ແລະ ສາມາດສື່ຄວາມເຖີງຮູ້ສຶກ ແທນຄວາມໝາຍຂອງຄໍາເວົ້າຂອງຜູ້ໃຫ້ຕໍ່ຜູ້ຮັບໄດ້ຢ່າງເລິກເຊີ່ງ.

ສໍາລັບຄູ່ບ່າວ-ສາວ ທີ່ຢາກບອກຮັກກັນແທນຄໍາເວົ້າດ້ວຍດອກໄມ້ ເຮົາໄປເບິ່ງນໍາກັນເລີຍວ່າດອກໄມ້ແຕ່ລະຊະນິດສື່ຄວາມໝາຍແນວໃດ?

ຄວາມໝາຍຂອງດອກກຸຫຼາບ: ໃນວັນແຫ່ງຄວາມຮັກ ຫຼື ວັນຄົບຮອບ ຫຼື ວັນສ້າງສັນຕ່າງໆ ຄົງຈະຂາດດອກກຸຫຼາບບໍ່ໄດ້ ໂດຍການບອກຮັກດ້ວຍດອກກຸຫຼາບນັ້ນສາມາດບອກເຖິງນິໄສ ແລະ ຄວາມໝາຍຂອງສີດອກໄມ້ອີກດ້ວຍເປັນຕົ້ນຄື:

ກຸຫຼາບສີແດງ ແທນວ່າ: “ຂ້ອຍຮັກເຈົ້າ” ໂດຍບົ່ງບອກເຖິງການແອບຮັກໃຜຄົນໜຶ່ງ, ໃຊ້ເປັນຂອງສື່ແທນໃຈເພື່ອບອກໃຫ້ຜູ້ຮັບຮູ້ວ່າມີຄົນກໍາລັງແອບຮັກຢູ່, ເປັນຄວາມຮັກທີ່ສຸດແສນຈະເລີກເຊິ່ງ, ໝັ້ນຄົງ ແລະ ບໍ່ມີວັນຈືດຈາງ.

ກຸຫຼາບສີບົວ: ເປັນຄວາມຮັກທີ່ໂຣແມນຕິກ ແລະ ສະແດງເຖິງຄວາມຮັກອັນຫວານຊຶ້ງທີ່ຜູ້ໃຫ້ມີຕໍ່ຜູ້ຮັບ ແຕ່ຢ່າຟ້າວດີໃຈ ເພາະອາດຈະເປັນພຽງຮັກທີ່ຫຼອກລວງກໍ່ເປັນໄປໄດ້.

ກຸຫຼາບແດງເຫຼືອງ: ຄວາມຮັກແບບໝູ່ເພື່ອນ ເປັນຕົວແທນແຫ່ງມິດຕະພາບທີ່ສື່ເຖິງຄວາມຫ່ວງໃຍຂອງຜູ້ໃຫ້, ສະແດງເຖິງຄວາມປາຖະໜາດີ ຕ້ອງການໃຫ້ສຸຂະພາບແຂງແຮງ, ມີຄວາມສຸກ ເໝາະກັບການມອບໃຫ້ໝູ່ເພື່ອນໃນໂອກາດພິເສດຕ່າງໆ ຫຼື ໄປຢ້ຽມຢາມຖາມສຸກທຸກ ແລະ ເວລາເຈັບເປັນກໍໄດ້ເຊັ່ນກັນ.

ກຸຫຼາບສີຂາວ: ຄວາມຮັກບໍລິສຸດ ສະແດງເຖິງຄວາມຮັກທີ່ໃສສະອາດບໍລິສຸດ ໂດຍບໍ່ຄິດວ່າຮັກທີ່ມອບໃຫ້ໄປຈະໄດ້ຄວາມຮັກຕອບກັບມາ ຫຼື ບໍ່ ເໝາະກັບການມອບໃຫ້ເຈົ້ານາຍ, ພໍ່ແມ່ ຫຼື ຄູບາອາຈານ ແລະ ຜູ້ອາວຸໂສ.

ດອກເດຊີ: ເປັນຕົວແທນຂອງຄວາມຮັກໄຮ້ດຽງສາ ແລະ ຄວາມຮັກບໍລິສຸດໃຈທີ່ມີຕໍ່ກັນ ສື່ເຖິງຄວາມຮັກ ແລະ ຫົວໃຈທີ່ໃສສະອາດ ແລະ ຍັງເປັນດອກໄມ້ທີ່ສາວໆມັກຫຼາຍ ໂດຍສະເພາະດອກເດຊີ່ສີຂາວ ເມື່ອໃຫ້ໃຜໄປເຂົາກໍຍ່ອມຮູ້ສຶກເຖິງຄວາມປາຖະໜາດີ ແລະ ມີຄວາມຮັກບໍລິສຸດໃຈຂອງຜູ້ໃຫ້.

ດອກລິນລີ່ສີຂາວ: ແທນຄໍາວ່າ: “ຂ້ອຍຮູ້ສຶກດີທີ່ໄດ້ຮູ້ຈັກ ແລະ ຢາກຢູ່ໃກ້ເຈົ້າ”  ສະແດງເຖິງຄວາມຮັກແບບອ່ອນຫວານ, ຈິງໃຈ ແລະ ເທີດທູນ ເໝາະກັບການມອບໃຫ້ໃນວັນແຫ່ງຄວາມຮັກ ຫຼື ວັນວາເລັນທາຍ, ວັນຮັບປະລິຍາ ຫຼື ໃນໂອກາດທີ່ຫາຍາກໃນການເຂົ້າໄປທໍາຄວາມຮູ້ຈັກກັບໃຜຄົນໜຶ່ງ.

ດອກຄາຣເນຊັ່ນສີບົວ: ຕົວແທນຄວາມຮູ້ສຶກ…”ຂ້ອຍຄິດຮອດເຈົ້າຕະຫຼອດເວລາ” ມີຄວາມໝາຍເລີກເຊິ່ງ ແລະ ຫອມຫວານຄືກັບສີຂອງດອກໄມ້, ສື່ເຖິງຄວາມຮັກທີ່ກໍາລັງເບັ່ງບານເປັນສີບົວ.

ດອກຟອຣເກັດມີນອດ: ແທນຄວາມໝາຍ “ຢ່າລືມຄວາມຮູ້ສຶກດີໆທີ່ເຄີຍມີໃຫ້ກັນ” ເປັນດອກໄມ້ແຫ່ງຄວາມໂຣແມນຕິກ ຈາກຕໍານານຄວາມຮັກທີ່ສຸດຊຶ້ງທີ່ເຄີຍເລົ່າຂານກັນມາ.

ດອກທິວລິບສີແດງ: ແທນຄໍາວ່າ: “ຢາກໃຫ້ໂລກຮູ້ວ່າຂ້ອຍຮັກເຈົ້າ” ສະແດງເຖິງຄວາມໝັ້ນຄົງໃນຄວາມຮັກ, ຄວາມຈິງຈັງຈິງໃຈ, ຄວາມຊື່ສັດ ແລະ ຮັກໝົດຫົວໃຈຂອງຜູ້ໃຫ້.

ດອກກ້ວຍໄມ້: ເປັນດອກໄມ້ທີ່ບອກຮັກວ່າ: “ຂ້ອຍບໍ່ອາດຫ້າມຫົວໃຈໃຫ້ຄິດຮອດເຈົ້າໄດ້” ຖືເປັນຕົວແທນຂອງຄວາມໝັ້ນຄົງແລະ ຄວາມງາມຂອງຄວາມຮັກ.

ດອກຕາເວັນ: ໃຊ້ແທນຄວາມໝາຍຂອງຄວາມເຊື່ອໝັ້ນ, ໝັ້ນຄົງ, ຮັກດຽວໃຈດຽວ ໃຜໄດ້ຮັບຕ້ອງເປັນທີ່ປື້ມຍິນດີ ເພາະນັ້ນໝາຍຄວາມວ່າ ຜູ້ໃຫ້ຕ້ອງການທີ່ຈະພິຊີດໃຈເຈົ້າໃຫ້ໄດ້ນັ້ນເອງ.

ດອກຄັດເຕີຣ: ສະແດງເຖິງຄວາມຮູ້ສຶກທີ່ເລີກເຊິ່ງ  “ເຖິງເຈົ້າຈະບໍ່ຫຼຽວມາແຕ່ຂ້ອຍຈະຢູ່ຂ້າງໆເຈົ້າຕໍ່ໄປ” ເປັນດອກໄມ້ປະດັບ ແລະ ບໍ່ເດັ່ນເທົ່າໃດດອກໄມ້ຊະນິດອື່ນ ແຕ່ຖ້າຂາດດອກໄມ້ຊະນິດນີ້ໄປກໍອາດຈະບໍ່ສວຍງາມເທົ່ານີ້ກໍເປັນໄປໄດ້.

ດອກໄລເຊນທັສ: ເປັນດອກໄມ້ທີ່ນິຍົມໃຊ້ໃນການຈັດຊໍ່ດອກໄມ້ສໍາລັບງານແຕ່ງດອງ ລັກສະນະຄ້າຍຄືກັບດອກກຸຫຼາບ ແຕ່ມີຂະໜາດນ້ອຍ ແລະ ບາງກວ່າ ເປັນດອກໄມ້ທີ່ສື່ເຖິງມິດຕະພາບອັນໝັ້ນຄົງ, ຄວາມຊົງຈໍາດີໆ ແລະ ຄວາມເອົາໃຈໃສ່ຕໍ່ກັນ ແລະ ກັນ.

ນັ້ນກໍເປັນຄວາມໝາຍຂອງດອກໄມ້ ຖືໄດ້ວ່າຄວາມໝາຍຂອງແຕ່ລະຊະນິດນັ້ນມັນຫວານເລີກເຊິ່ງແທ້ໆ ແລະ ຍ່າລືມມອບໃຫ້ຄົນພິເສດຂອງທ່ານ ເພື່ອຈະໄດ້ບອກຄວາມຮູ້ສຶກທີ່ແທ້ຈິງຕໍ່ຜູ້ຮັບກັນເດີ້.

• ຄວາມໝາຍຂອງດອກໄມ້ທີ່ມອບໃຫ້ກັນ ແທນຄວາມຮູ້ສຶກ ຫຼື ຄໍາເວົ້າ
• 10 ໄອເດຍມອບຂອງຂວັນໃຫ້ຄົນທີ່ທ່ານຮັກໃນວັນວາເລັນທາຍ
• ສິ່ງຂອງຂັວນ10 ຢ່າງທີ່ບໍ່ຄວນໃຫ້ກັນໃນວັນວາເລັນທາຍ

ຮຽບຮຽງໂດຍ: ໃບບົວ ຈັນທະລັງສີ

ແຫຼງຂໍ້ມູນຈາກ: akerufeed.com