ການກໍ່ສ້າງເຮືອນພັກຊົ່ວຄາວຂອງຜູ້ປະສົບໄພຈາກຄູກັ້ນນໍ້າເຂື່ອນເຊປຽນ-ເຊນໍ້ານ້ອຍແຕກທີ່ ເມືອງ ສະໜາມໄຊ ແຂວງ ອັດຕະປື ອີງຕາມແຜນເບື້ອງຕົ້ນຈະສໍາເລັດ ແລະ ໃຫ້ຜູ້ປະສົບໄພໄດ້ເຂົ້າຢູ່ທັງໝົດພາຍໃນເດືອນພະຈິກ 2018, ແຕ່ການກໍ່ສ້າງລ່າຊ້າເລີຍເວລາຈົນເຖິງປັດຈຸບັນ ເຊິ່ງເຈົ້າແຂວງໄດ້ເລັ່ງໃຫ້ບໍລິສັດຜູ້ຮັບເໝົາເລັ່ງມືກໍ່ສ້າງໃຫ້ທ່ວງທັນ ແລະ ຍົກຍ້າຍປະຊາຊົນທີ່ຄົງຄ້າງທັງໝົດໃຫ້ແລ້ວພາຍໃນເດືອນ ມັງກອນ 2019 ນີ້.
ວັນທີ 27 ທັນວາ 2018 ທີ່ຜ່ານມາ, ທ່ານ ເລັດ ໄຊຍະພອນ ເຈົ້າແຂວງ ອັດຕະປື ພ້ອມດ້ວຍຄະນະ ລົງເຄື່ອນໄຫວຕິດຕາມຄວາມຄືບໜ້າການກໍ່ສ້າງເຮືອນພັກຊົ່ວຄາວຂອງຜູ້ປະສົບໄພທີ່ ເມືອງ ສະໜາມໄຊ ໂດຍຊີ້ນໍາພາກສ່ວນຮັບເໝົາກໍ່ສ້າງເລັ່ງມືກໍ່ສ້າງໃນຈໍານວນທີ່ຍັງເຫຼືອ ໃຫ້ຮີບຮ້ອນສືບຕໍ່ປະກອບ ແລະ ຕິດຕັ້ງໃຫ້ທ່ວງທັນ ເພື່ອຈັດສັນຍົກຍ້າຍປະຊາຊົນບ້ານທີ່ຍັງຄົງຄ້າງຢູ່ໃນແຕ່ລະຈຸດໃຫ້ສໍາເລັດໂດຍໄວ ພາຍໃນເດືອນ ມັງກອນ 2019 ນີ້. ພ້ອມນັ້ນ, ຍັງນໍາເອົາກໍາລັງທະຫານເຂົ້າມາຊ່ວຍກໍ່ສ້າງຮ່ວມກັບບໍລິສັດສູນລະ 40 ຄົນ.
ໃນການລົງຕິດຕາມຊູກຍູ້ຄັ້ງນີ້ໄດ້ລົງຢູ່ 3 ສູນຄື: ສູນດອນບົກ ມີຈໍານວນ 125 ຄອບຄົວ ຍ້າຍມາຈາກບ້ານທ່າແສງຈັນ ໂດຍເຮືອນພັກຊົ່ວຄາວທີ່ຈະສ້າງມີທັງໝົດ 178 ຫຼັງ, ກໍ່ສ້າງສໍາເລັດ 62 ຫຼັງ; ສູນປິນດົງມີ 89 ຄອບຄົວ ຍ້າຍມາຈາກ ບ້ານ ສະໝອງ ມີເຮືອນພັກຊົ່ວຄາວທັງໝົດ 90 ຫຼັງ ໃນນັ້ນ ເຮືອນຄູ່ 23 ຫຼັງ, ດ່ຽວ 67 ຫຼັງ ແລະ ກໍ່ສ້າງສໍາເລັດ 15 ຫຼັງ; ສູນຕໍມໍຢອດຍ້າຍມາຈາກ ບ້ານ ຫີນລາດ ຈໍານວນ 176 ຄອບຄົວ ແລະ ບ້ານ ຕະມໍຢອດ 45 ຄອບຄົວ ໂດຍມີເຮືອນພັກຊົ່ວຄາວທັງໝົດ 196 ຫຼັງ, ກໍ່ສ້າງສໍາເລັດແລ້ວ 103 ຫຼັງ ເຊິ່ງຍັງ 74 ຄອບຄົວບໍ່ໄດ້ເຂົ້າໄປພັກເທື່ອຍ້ອນບາງຄອບຄົວມີຈໍານວນຄົນຫຼາຍ ຈິ່ງຈໍາເປັນໄດ້ລໍຖ້າເຮືອນຄູ່ (ຢູ່ໄດ້ຫຼາຍຄົນ) ປະກອບສໍາເລັດ. ໃນຈໍານວນ 3 ສູນລວມບໍລິສັດຮັບເໝົາກໍ່ສ້າງມີ 5 ບໍລິສັດຄື: ບໍລິສັດບຸກເບີກ, ບໍລິສັດກໍ່ສ້າງປະກອບເຮືອນ, ບໍລິສັດຕິດຕັ້ງນໍ້າສະອາດ, ບໍລິສັດຕິດຕັ້ງວິດ-ຄອງນໍ້າ ແລະ ບໍລິສັດຕິດຕັ້ງລະບົບໄຟຟ້າ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ເສດຖະກິດ-ສັງຄົມ, laoedaily.com