ໃນວັນທີ 22 ພະຈິກ 2018 ເຈົ້າແຂວງ ຈຳປາສັກ ໄດ້ອອກຂໍ້ຕົກລົງສະບັບເລກທີ 1206/ຈຂ.ຈສ ວ່າດ້ວຍການຕັດເງິນເດືອນໆ 11-12 ປີ 2018 ເພື່ອປະກອບສ່ວນສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຂອງແຂວງຈຳປາສັກ, ເຊິ່ງຂໍ້ຕົກລົງດັ່ງກ່າວ ໄດ້ເກີດມີສຽງວິພາກວິຈານເຖິງຄວາມບໍ່ເໝາະສົມ ເນື່ອງຈາກເງິນເດືອນຂອງພະນັກງານແມ່ນໜ້ອຍຢູ່ແລ້ວ.
ສະນັ້ນ, ມາຮອດວັນທີ 30 ພະຈິກ 2018 ເຈົ້າແຂວງໄດ້ອອກຂໍ້ຕົກລົງເລກທີ 1264/ຈຂ.ຈສ. ເພື່ອລົບລ້າງແຈ້ງການ ເລກທີ 1206/ຈຂ.ຈສ ລົງວົນທີ 22 ພະຈິກ 2018. ເຊິ່ງມີເນື້ອໃນດັ່ງນີ້:
ມາດຕາ 1: ເຫດຜົນລົບລ້າງ:
ຂໍ້ຕົກລົງສະບັບເລັກທີ 1206/ຈຂ.ຈສ ແມ່ນຜົນຂອງກອງປະຊຸມເຈົ້າແຂວງ-ຮອງເຈົ້າແຂວງ, ຄະນະກຳມະການ ປກຊ-ປກສ ແລະ ຄະນະກຳມະການຂັ້ນແຂວງກະກຽມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ, ຄັ້ງວັນທີ 6 ພະຈິກ 2018 ຍ້ອນຄະນະນຳພວກເຮົາຄິດວ່າ: ຢາກໃຫ້ພະນັກງານທຸກຄົນມີການປະກອບສ່ວນ, ສະແດງຄວາມກະຕັນຍູຮູ້ບຸນຄຸນ, ເຄົາລົບ ແລະ ຊົມເຊີຍ ຕໍ່ວັນວິລະກຳອັນຍິ່ງໃຫຍ່ດັ່ງກ່າວ, ຫາກບໍ່ແມ່ນການຕົກລົງ ແບບພາລະການ-ໃນຕົວຂອງທ່ານໃດທ່ານໜຶ່ງ ເພື່ອບັງຄັບຂັ້ນລຸ່ມຈັດຕັ້ງປະຕິບັດ.
ມາດຕາ 2: ງົບປະມານທີ່ຈະຮັບໃຊ້ໃນການສະເຫຼີມສະຫຼອງວັນດັ່ງກ່າວ ຈະຄົ້ນຄວ້າບ້ວງເງິນໃດໜຶ່ງຕາງຫາກ.
ມາດຕາ 3: ບັນດາພະແນກ, ກົມກອງອ້ອມຂ້າງແຂວງ, ກົມກອງສູນກາງທີ່ຕັ້ງຢູ່ແຂວງ, ນະຄອນປາກເຊ ແລະ 9 ເມືອງ, ພາກສ່ວນທີ່ກ່ຽວຂ້ອງຈົ່ງຮັບຮູ້ ແລະ ພ້ອມກັນຈັດຕັ້ງປະຕິບັດຕາມເນື້ອໃນຈິດໃຈຂໍ້ຕົກລົງສະບັບນີ້ດ້ວຍ:
ມາດຕາ 4: ຂໍ້ຕົກລົງສະບັບນີ້ໃຊ້ລົບລ້າງ ຂໍ້ຕົກລົງສະບັບເລກທີ 1206/ຈຂ.ຈສ, ລົງວັນທີ 22 ພະຈິກ 2018 ແລະ ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ໃບແຈ້ງການ: ແຂວງ ຈຳປາສັກ