ຫຼັງຈາກທີ່ມື້ວານນີ້ (8 ພະຈິກ 2018) ທີ່ເວັບໄຊລາວໂພສໄດ້ນຳສະເໜີຂ່າວກ່ຽວກັບໃບຂັບຂີ່ຍານພາຫະນະລາວໄປນຳໃຊ້ໃນປະເທດເພື່ອນບ້ານ (ໄທ) ກໍ່ໄດ້ຮັບຄວາມສົນໃຈຈາກປະຊາຊົນ ແລະ ມີ 2-3 ຄຳຖາມຫຼັກທີ່ທຸກຄົນຢາກໄດ້ຄຳຕອບຄື: 1. ຄວາມຈະແຈ້ງໃນການນຳໃຊ້ໃບຂັບຂີ່ຍານພາຫະນະລາວໃນປະເທດເພື່ອນບ້ານ, 2. ໃບຂັບຂີ່ລາວທີ່ມີຊື່ເປັນພາສາອັງກິດຢູ່ກ້ອງຊື່ພາສາລາວແມ່ນໃບຂັບຂີ່ອາຊຽນບໍ່?, 3. ຊີ້ແຈ້ງກ່ຽວກັບຄຳສຳພາດຂອງອະທິບໍດີກົມຂົນສົ່ງທາງບົກຂອງໄທກ່ຽວກັບການນຳໃຊ້ໃບຂັບຂີ່ຈາກ 10 ປະເທດອາຊຽນໃນໄທ.
ເພື່ອໃຫ້ທຸກຄຳຖາມໄດ້ຮັບຄຳຕອບ ທາງນັກຂ່າວລາວໂພສໄດ້ໂທລະສັບໄປສອບຖາມຂໍ້ມູນກັບທາງຫົວໜ້າສູນສອບເສັງໂຍທາ-ທົ່ງປົ່ງ ແລະ ທາງກົມຂົນສົ່ງ ເຊິ່ງຜ່ານການສອບຖາມຂໍ້ມູນຈາກທັງສອງໜ່ວຍງານກໍ່ໄດ້ຄຳຕອບເປັນສຽງດຽວກັນວ່າ: ສຳລັບໃບຂັບຂີ່ປົກຄອງ (ໃບຂັບຂີ່ພາຍໃນ) ແມ່ນສາມາດນຳໃຊ້ສະເພາະພາຍໃນປະເທດ ໃນກໍລະນີທີ່ທ່ານນຳໃຊ້ໃບຂັບຂີ່ພາຍໃນເດີນທາງຂັບລົດສ່ວນຕົວໄປນອກປະເທດເພື່ອນບ້ານທີ່ເປັນປະເທດຕິດກັບຊາຍແດນລາວ ແມ່ນສາມາດນຳໃຊ້ໄດ້ແຕ່ໃນເຂດ, ແຂວງ, ຈັງຫວັດທີ່ຕິດກັບຊາຍແດນລາວເທົ່ານັ້ນ ຍົກຕົວຢ່າງ: ຂົວມິດຕະພາບລາວ-ໄທ 1 ຕິດກັບຈັງຫວັດໜອງຄາຍ ແລະ ອຸດອນທານີ, ສຳລັບດ່ານອື່ນໆທີ່ມີຈຸດເຊື່ອມຕໍ່ຊາຍແດນລາວກໍ່ເຊັ່ນດຽວກັນ.
ທາງກົມຂົນສົ່ງຍັງບອກອີກວ່າ ສຳລັບໃບຂັບຂີ່ລາວ (ສີເຫຼືອງ) ທີ່ມີພາສາອັງກິດຢູ່ກ້ອງຊື່ນາມສະກຸນພາສາລາວນັ້ນ ບໍ່ແມ່ນໃບຂັບຂີ່ອາຊຽນ ຫຼື ໃບຂັບຂີ່ສາກົນຕາມທີ່ຫຼາຍຄົນເຂົ້າໃຈ ສາເຫດມາຈາກການປະກອບຟອມແລ່ນເອົາໃບຂັບຂີ່ໃນເບື້ອງຕົ້ນ ບາງຄົນລະບຸຊື່ນາມສະກຸນເປັນພາສາອັງກິດລົງໃສ່ແບບຟອມ ແລະ ບາງຄົນຂຽນແຕ່ຊື່ນາມສະກຸນເປັນພາສາລາວ ຈິ່ງເຮັດໃຫ້ໃບຂັບຂີ່ຍານພາຫະນະຂອງບາງຄົນມີແຕ່ຊື່ພາສາລາວ ແລະ ບາງຄົນກໍ່ມີທັງຊື່ພາສາລາວກັບພາສາອັງກິດ ແຕ່ທັງໝົດມັນກໍ່ເປັນພຽງແຕ່ໃບຂັບຂີ່ພາຍໃນເທົ່ານັ້ນ ແລະ ເປັນຫຍັງບາງຄົນເອົາໃບຂັບຂີ່ທີ່ມີພາສາລາວກັບພາສາອັງກິດໃຫ້ເຈົ້າໜ້າຕຳຫຼວດທີ່ເພື່ອນບ້ານເບິ່ງແລ້ວທາງເຈົ້າໜ້າທີ່ບໍ່ປັບໄໝ ສາເຫດອາດເປັນຍ້ອນເຈົ້າໜ້າທີ່ຕຳຫຼວດເພື່ອນບ້ານເຫັນຊື່ເປັນພາສາອັງກິດ ແລະ ອ່ານເຂົ້າໃຈ (ພາສາອັງກິດເປັນພາສາກາງໃນການສື່ສານ) ແລະ ອີກຢ່າງໜຶ່ງທ່ານນຳໃຊ້ໃບຂັບຂີ່ໃນຂອບເຂດແຂວງ ຫຼື ຈັງຫວັດທີ່ຕິດກັບຊາຍແດນ ເຊິ່ງມັນບໍ່ມີຄວາມຜິດດ້ານລະບຽບຕຳຫຼວດຈິ່ງປ່ອຍຜ່ານ.
ຕໍ່ຈາກກໍລະນີບົດສຳພາດຂອງທ່ານອະທິບໍດີກົມຂົນສົ່ງທາງບົກ (ໄທ) ໄດ້ກ່າວຜ່ານໂທລະພາບວ່າ 10 ປະເທດອາຊຽນສາມາດນຳໃຊ້ໃບຂັບຂີ່ພາຍໃນຂອງປະເທດຜູ້ສົ່ງມາເຄື່ອນໄຫວໃນປະເທດໄທໄດ້ ທາງກົມຂົນສົ່ງ (ລາວ) ໄດ້ໃຫ້ຄຳຕອບກ່ຽວກັບເລື່ອງນີ້ມາວ່າ: ແມ່ນແລ້ວທີ່ 10 ປະເທດອາຊຽນສາມາດນຳໃຊ້ໃບຂັບຂີ່ຂອງປະເທດຜູ້ສົ່ງໄປເຄື່ອນໄຫວໃນປະເທດໄທໄດ້ ແຕ່ໃບຂັບຂີ່ນັ້ນຕ້ອງເປັນໃບຂັບຂີ່ສາກົນທີ່ອອກໂດຍໜ່ວຍງານທີ່ມີອຳນາດອອກໃບຂັບຂີ່ຂອງປະເທດນັ້ນ (ຄືໃບຂັບຂີ່ສາກົນທີ່ອອກຢູ່ໃນປະເທດ) ເຊິ່ງໃບຂັບຂີ່ສາກົນແມ່ນສາມາດນຳໃຊ້ໃນການຂັບລົດໄດ້ 10 ປະເທດອາຊຽນ ແຕ່ສະເພາະໃບຂັບຂີ່ລາວພາຍໃນບໍ່ສາມາດເອົາໄປເຂື່ອນໄຫວກາຍຂອບເຂດທີ່ກຳນົດໄວ້.
ສຳລັບຂັ້ນຕອນໃນການເຮັດໃບຂັບຂີ່ສາກົນແມ່ນ: ທ່ານຕ້ອງມີຂັບຂີ່ຍານພາຫະນະພາຍໃນກ່ອນ ແລ້ວຈິ່ງສາມາດໄປແລ່ນເອົາໃບຂັບຂີ່ຍານພາຫະນະສາກົນທີ່ຫ້ອງບໍລິການປະຕູດຽວກົມຂົນສົ່ງ (ແຖວປະຕູໄຊ) ຫຼື ໂທສອບຖາມຂໍ້ມູນເພີ່ມເຕີມຈາກກົມຂົນສົ່ງທີ່ເບີ: 021 417240 ແລະ 021 417293 ໃນໂມງລັດຖະການ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ສູນສອບເສັງໂຍທາ-ທົ່ງປົ່ງ, ກົມຂົນສົ່ງ