ອີງຕາມບົດລາຍງານສະພາບອາກາດຈາກກົມອຸຕຸນິຍົມ ເລກທີ 1141/ກອຕທ, ລົງວັນທີ 08 ຕຸລາ 2018 ລາຍງານວ່າ: ໃນຕົ້ນອາທິດ ເລີ່ມແຕ່ວັນທີ 8-10 ຕຸລາ 2018 ຄວາມກົດດັນອາກາດສູງທີ່ມີກຳລັງອ່ອນ-ປານກາງ ປົກຄຸມຢູ່ແຂວງພາກເໜືອ ແລະ ພາກກາງ ຂອງປະເທດລາວ ພ້ອມ ລົມຕາເວັນອອກສຽງເໜືອພັດປົກຄຖມເປັນສວ່ນໃຫຍ່, ຈະເຮັດໃຫ້ອາກາດເຢັນຢູ່ທົ່ວໄປໃນຕອນເຊົ້າຂອງແຕ່ລະພາກ ພ້ອມມີໝອກບາງປົກຫຸ້ມ ໂດຍສະເພາະຢູ່ແຂວງພາກເໜືອ ຈະມີຝົນຕົກກະຈາຍຢູ່ບາງທ້ອງຖີ່ນ.
ສ່ວນວັນທີ 11-14 ຕຸລາ 2018 ຄວາມກົດດັນຂອງອາກາດເຢັນຈາກປະເທດຈີນ ຈະມີກຳລັງແຮງເພີ່ມຂື້ນ ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ, ຈະເຮັດໃຫ້ອາກາດເຢັນ-ໜາວລົງຕື່ມ ໂດຍສະເພາະຢູ່ເຂດແຂວງພາກເໜືອດ້ານຕາເວັນອອກເຊັ່ນ: ເຂດໄຊສົມບູນ, ເມືອງນາກາຍ, ຫຼັກ 20, ເຂດພູພຽງບໍລະເວນ ພ້ອມມີໝອກບາງ ແລະ ລົມພັດແຮງເປັນບາງໂອກາດ.
ສຳລັບພາກກາງ-ໃຕ້ ອາກາດເຢັນໃນຕອນກາງຄືນ-ຕອນເຊົ້າ, ສ່ວນຕອນກາງເວັນອາກາດຮ້ອນ.
ທ່ານສາມາດອ່ານຂໍ້ມູນສະພາບອາກາດ ແລະ ສະພາບລະດັບນໍ້າຢ່າງລະອຽດຂອງອາທິດທີ່ຜ່ານມາ ແລະ ການຄາດຄະເນສະພາບອາກາດ ແລະ ລະດັບນໍ້າຂອງອາທິດນີ້ໄດ້ຕາມບົດລາຍງານລຸ່ມນີ້:
ຮຽບຮຽງໂດຍ: ບຸນມີ ຄຳມີໄຊ
ແຫຼ່ງຂໍ້ມູນ: ກົມອຸຕຸນິຍົມ ແລະ ອຸທົກກະສາດ