ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງ ອຸດົມໄຊ ອອກແຈ້ງການສະບັບເລກທີ 516/ຖວທ, ລົງວັນທີ 14 ກັນຍາ 2018 ເຖິງທ່ານເຈົ້າເມືອງ 7 ເມືອງ, ກອງກຳລັງ ປກສ, ປກຊ, ພະແນກ, ອົງການຈັດຕັ້ງ, ໂຮງຮຽນ ແລະ ບັນດາຜູ້ປະກອບການທຸລະກິດຮ້ານອາຫານ-ຮ້ານກິນດື່ມ, ຮ້ານບັນເທີງ ແລະ ຮ້ານຄາລາໂອເກະ ທຸກພາກສ່ວນທີ່ກ່ຽວຂ້ອງ, ອົງການປົກຄອງທຸກຂັ້ນ ເປັນເຈົ້າການເອົາໃຈໃສ່ນຳພາ ກວດກາຄຸ້ມຄອງຢູ່ໃນຂົງເຂດຮັບຜິດຊອບຂອງຕົນໃຫ້ມີຄວາມເປັນລະບຽບຮຽບຮ້ອຍ, ຮັບປະກັນໃຫ້ມີຄວາມສະຫງົບປອດໄພ ແລະ ຫຼຸດຜ່ອນປະກົດການຫຍໍ້ທໍ້ໃນສັງຄົມ.
ພະນັກງານ-ລັດຖະກອນ, ທະຫານ, ຕຳຫຼວດບໍ່ຄວນນຸ່ງເຄື່ອງແບບເຂົ້າຮ້ານອາຫານ, ຮ້ານກິນດື່ມ, ຮ້ານບັນເທີງ ດື່ມສິ່ງມຶນເມົາທີ່ເຫັນວ່າບໍ່ເໝາະສົມ ແລະ ເປັນການເສື່ອມເສຍພາບພົດ ເພື່ອຫຼີກລ່ຽງຫາງສຽງຈົ່ມວ່າພະນັກງານ-ລັດຖະກອນຫຼິ້ນກິນຟຸມເຟືອຍ (ຍົກເວັ້ນກໍລະນີວຽກງານທາງການຈິ່ງໃສ່ເຄື່ອງແບບໄດ້).
ສະຖາບັນການສຶກສາຕ່າງໆ ແມ່ນໃຫ້ຄູອາຈານ, ອຳນາດການປົກຄອງບ້ານ, ຄອບຄົວພໍ່ແມ່ ເອົາໃຈໃສ່ຕິດຕາມກວດກາຄຸ້ມຄອງສຶກສາອົບຮົມນັກຮຽນ, ລູກຫຼານຂອງຕົນ ຫ້າມບໍ່ໃຫ້ນັກຮຽນນັກສຶກສານຸ່ງເຄື່ອງແບບເຂົ້າໃຊ້ບໍລິການຮ້ານກິນດື່ມ, ຮ້ານບັນເທີງ ຢ່າງເດັດຂາດ ແລະ ໃຫ້ເປັນເອກະພາບກັນປະຕິບັດຂໍ້ຫ້າມ; ເຊິ່ງນັກຮຽນບໍ່ຄວນດື່ມສິ່ງມຶນເມົາເຊິ່ງມັນບໍ່ດີຕໍ່ສຸຂະພາບ, ພ້ອມທັງສິ້ນເປືອງ ແລະ ສ່ຽງຕໍ່ການເກີດອຸບັດຕິເຫດ, ອາລະວາດຕີກັນ, ມົ້ວສຸມສິ່ງເສບຕິດ ແລະ ອື່ນໆ.
ສຳລັບເຈົ້າຂອງຮ້ານອາຫານ, ຮ້ານກິນດື່ມ, ຮ້ານບັນເທີງຕ່າງໆ ໃຫ້ເອົາໃຈໃສ່ປະກອບເອກະສານ ຂໍອຸນຸຍາດດຳເນີນທຸລະກິດຈາກຂະແໜງການທີ່ກ່ຽວຂ້ອງໃຫ້ຄົບຖ້ວນ ແລະ ໄດ້ຮັບການຢັ້ງຢືນອະນຸຍາດໃຫ້ສືບຕໍ່ທຸລະກິດຈາກຂະແໜງການທ່ອງທ່ຽວໃນແຕ່ລະປີ ພ້ອມທັງປະກອບສ່ວນພັນທະອາກອນ ແລະ ພັນທະອື່ນໆ ຕາມລະບຽບການຄຸ້ມຄອງຂອງລັດໃຫ້ຄົບຖ້ວນ, ໃຫ້ເອົາໃຈໃສ່ຕິດຕາມຄຸ້ມຄອງສຶກສາອົບຮົມລູກຄ້າ-ແຂກຂອງຕົນທີ່ມາໃຊ້ບໍລິການໃຫ້ມີວິໄນ ຮັບປະກັນທາງດ້ານການບໍລິການໃຫ້ມີຄວາມສະອາດຈົບງາມ ພ້ອມບໍລິການດ້ວຍຮອຍຍິ້ມ, ເວົ້າຈາສຸພາບ ແລະ ເປັນຜູ້ບໍລິການທີ່ດີ.
ນອກນັ້ນ, ໃຫ້ທາງເຈົ້າຂອງຮ້ານອາຫານ, ຮ້ານກິນດື່ມ, ຮ້ານບັນເທີງຕິດປ້າຍເຕືອນລູກຄ້າ-ແຂກທີ່ມາໃຊ້ບໍລິການໄວ້ບ່ອນເປີດເຜີຍຄື ຫ້າມບໍ່ໃຫ້ນຸ່ງເຄື່ອງແບບຂອງສຳນັກງານ, ຫ້ອງການ, ຊຸດນັກຮຽນ-ນັກສຶກສາທີ່ເຫັນວ່າບໍ່ເໝາະສົມ. ຫາກທາງຮ້ານພົບເຫັນໃຫ້ຕັກເຕືອນ ແລະ ແຈ້ງໃຫ້ການຈັດຕັ້ງຂອງຜູ້ກ່ຽວຊາບພາຍຫຼັງ. ພ້ອມນີ້, ທາງເຈົ້າຂອງຮ້ານ ຕ້ອງອຳນວຍຄວາມສະດວກໃຫ້ຄວາມຮ່ວມມື, ສະໜອງຂໍ້ມູນການເຮັດວຽກ,ຕິດຕາມເປັນຫູເປັນຕາຊ່ວຍກັນ ແລະ ຊຸກຍູ້ການແກ້ໄຂປະກົດການຫຍໍ້ທໍ້ຂອງເຈົ້າໜ້າທີ່ (ເຈົ້າໜ້າທີ່ຂອງລັດ, ອຳນາດການປົກຄອງບ້ານ) ທຸກຄັ້ງ, ໃຫ້ເປັນເຈົ້າການຕິດຕາມພຶດຕິກຳຂອງເຈົ້າໜ້າທີ່ພະນັກງານ, ລັດຖະກອນ, ໃນເວລາລົງປະຕິບັດໜ້າທີ່ໃນຮ້ານຂອງທ່ານ. ຫາກບໍ່ເຫັນຄວາມບໍ່ເໝາະສົມຕໍ່ຜູ້ປະກອບການ, ປະຕິບັດເກີນສິດ ແລະ ໜ້າທີ່ ຫຼື ຫວັງຜົນປະໂຫຍດສ່ວນຕົວ ທີ່ເຫັນວ່າຜິດຕໍ່ລະບຽບກົດໝາຍ ໃຫ້ແຈ້ງຂະແໜງການທີ່ກ່ຽວຂ້ອງຊາບໂດຍດ່ວນທີ່ພະແນກ ຖວທ (ຂະແໜງທ່ອງທ່ຽວແຂວງ ໂທ: 081 312 028/211 797, 020 22883256, 020 54949466).
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ: ຖວທ ແຂວງອຸດົມໄຊ