ໃນວັນທີ 24 ກັນຍາ 2018 ກົມອຸຕຸນິຍົມ ແລະ ອຸທົກກະສາດ ໄດ້ເຜີຍບົດລາຍງານສະພາບອາດກາດ ແລະ ສະພາບລະດັບນໍ້າ ໃນໄລຍະວັນທີ 17-23 ກັນຍາ 2018 ແລະ ຄາດຄະເນສະພາບອາກາດ ແລະ ລະດັບນໍ້າ ນັບແຕ່ວັນທີ 24-30 ກັນຍາ 2018.

ກົມອຸຕຸນິຍົມ ແລະ ອຸທົກກະສາດ ໄດ້ຄາດຄະເນສະພາບອາກາດວ່າ ໃນໄລຍະວັນທີ 24-27 ກັນຍາ 2018 ຄວາມກົດອາກາດຕໍ່າຈະປົກຄຸມທົ່ວທຸກພາກຂອງປະເທດລາວ, ພ້ອມດຽວກັນລົມຕາເວັນອອກຈະພັດປົກຄຸມເປັນສ່ວນໃຫຍ່ ເຊິ່ງລັກສະນະເຊັ່ນນີ້ ຈະເຮັດໃຫ້ອາກາດຮ້ອນຂຶ້ນຕື່ມໃນຕອນກາງເວັນຢູ່ໃນແຕ່ລະພາກ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຢູ່ບາງທ້ອງຖິ່ນ ໃນແຂວງພາກກາງ ຫາ ພາກໃຕ້.

ຈາກນັ້ນວັນທີ 28-30 ກັນຍາ 2018 ຄວາມກົດດັນອາກາດສູງຈາກປະເທດຈີນ ຈະມີກຳລັງແຮງເພີ່ມຂຶ້ນ ແຜ່ລົງມາປົກຄຸມພາກເໜືອຂອງປະເທດລາວ ສົມທົບກັບກະແສລົມຕາເວັນອອກສຽງເໜືອພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ອາກາດເຢັນລົງເລັກໜ້ອຍຢູ່ທົ່ວໄປໃນແຕ່ລະພາກ ແລະ ຈະມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍພ້ອມມີລົມພັດແຮງໃນບາງໂອກາດ ແລະ ຕົກປານກາງຢູ່ທ້ອງຖິ່ນແຂວງພາກເໜືອ ແລະ ພາກກາງ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂ່າວ: ກົທອຸຕຸນິຍົມ ແລະ ອຸທົກກະສາດ