ຈາກເຫດການທີ່ສັນເຂື່ອນແຕກ ແລ້ວໄຫຼລົ້ນຖ້ວມບ້ານເຮືອນປະຊາຊົນ ທາງແຂວງອັດຕະປື ແລະເຫດເຂື່ອນແຕກຫຼາຍຄັ້ງທີ່ຜ່ານມາ ໄດ້ສ້າງຜົນເສຍຫາຍຕໍ່ຊີວິດແລະຊັບສິນຂອງປະຊາຊົນ ຢ່າງຮ້າຍແຮງ; ໃນຂະນະທີ່ຂ່າວພາຍຸຍັງກຳລັງຈະຖະຫຼົ່ມປະເທດລາວອີກໃນໄລຍະ ວັນທີ 26-29 ກໍລະກົດ 2018 ນີ້ ເຊິ່ງຈະເຮັດໃຫ້ມີນໍ້າຢູ່ແຕ່ລະໜ້າເຂື່ອນຢ່າງຫຼວງຫຼາຍ ຫຼືອາດຈຳເປັນຕ້ອງໄດ້ປ່ອຍນໍ້າອອກຈາກເຂື່ອນຫຼືນໍ້າລົ້ນສັນເຂື່ອນໄດ້.
ຕາມແຫຼ່ງຂ່າວລາຍງານໃຫ້ຮູ້ວ່າ ເນື່ອງຈາກຝົນຕົກລິນໃນຫຼາຍມື້ທີ່ຜ່ານມາ ໄດ້ເຮັດໃຫ້ເຂື່ອນໄຟຟ້າຫຼາຍແຫ່ງມີມວນນໍ້າຈຳນວນມະຫາສານຢູ່ເຕັມອ່າງ ໂດຍສະເພາະເຂື່ອນນໍ້າງຽບ 2 ແລະ ນໍ້າເທີນ 2 ດັ່ງນັ້ນ, ຖ້າຫາກເກີດຝົນຕົກໜັກຕື່ມອີກຄືດັ່ງກົມອຸຕຸນິຍົມແລະອຸທົກກະສາດໄດ້ແຈ້ງເຕືອນໄວ້ນັ້ນ ກໍອາດຈະມີຄວາມສ່ຽງທີ່ບັນດາເຂື່ອນໄຟຟ້າຕ້ອງໄດ້ລະບາຍນໍ້າອອກ ຫຼືນໍ້າອາດຈະລົ້ນສັນເຂື່ອນ ໄຫຼລົງຖ້ວມບ້ານເຮືອນປະຊາຊົນທີ່ອາໄສຢູ່ລຸ່ມເຂື່ອນຢ່າງກະທັນຫັນໄດ້.
ດັ່ງນັ້ນ, ເພື່ອບໍ່ເປັນການຊັກຊ້າທີ່ຈະລໍຖ້າຟັງຄຳເຕືອນຈາກພາກສ່ວນທີ່ກ່ຽວຂ້ອງ ຫຼືຮັບປະກັນຄວາມປອດໄພເມື່ອຫາກເກີດເຫດສຸດວິໄສຂຶ້ນມາ, ຖ້າເຫັນຝົນຕົກໜັກຕິດຕໍ່ກັນ ປະຊາຊົນບັນດາບ້ານຕ່າງໆ ທີ່ອາໄສຢູ່ເຂດພື້ນທີ່ຕໍ່າ ແຄມແມ່ນໍ້າລຸ່ມເຂື່ອນຕ້ອງກຽມຄວາມພ້ອມ ເພື່ອຮັບມືກັບໄພນໍ້າຖ້ວມໄວ້ລ່ວງໜ້າ ເມື່ອເກີດເຫດຈຶ່ງຈະໜີທັນ ແລະບໍ່ຊໍ້າຮອຍເຫດການທີ່ອັດຕະປືອີກ.
ບໍ່ມີຫຍັງຮັບປະກັນໄດ້ ເລື່ອງຫຍັງມັນກໍເກີດຂຶ້ນໄດ້ ຈຶ່ງຂໍໃຫ້ມີສະຕິຢູ່ຕະຫຼອດເວລາ ຢ່າປະໝາດຢ່າງເດັດຂາດ.