ຕອນເຊົ້າວັນທີ 3 ກໍລະກົດ 2018 ຜູ້ວ່າລາຊະການຈັງຫວັດຊຽງຣາຍ ຫຼືເຈົ້າແຂວງຊຽງຮາຍໄດ້ຖະແຫຼງຂ່າວຢືນຢັນວ່າເດັກນ້ອຍໃນຖໍ້າທຸກຄົນມີສຸຂະພາບດີ ຕໍ່ໄປແມ່ນຕ້ອງຫາວິທີນຳເອົາເຂົາເຈົ້າອອກມາ.
ເບື້ອງຕົ້ນຈະໄດ້ສົ່ງອາຫານບຳລຸງແລະຢາເຂົ້າໃຫ້ ເພື່ອປະຖົມພະຍາຍານເຮັດໃຫ້ສຸຂະພາບແຂງແຮງຂຶ້ນ ລໍຖ້າການຊ່ວຍເຫຼືອເອົາອອກມາຂ້າງນອກ. ແລະພາລະກິດການຊ່ວຍເຫຼືອຍັງຕ້ອງສືບຕໍ່ແບບບໍ່ໄດ້ຢຸດ ເປັນຕົ້ນແມ່ນການດູດນໍ້າອອກຕື່ມ ເພື່ອໃຫ້ລະດັບນໍ້າຫຼຸດລົງ ແລະເຝິກສອນໃຫ້ເດັກນ້ອຍຮູ້ຈັກລອຍນໍ້າ ໃຫ້ຮ່າງກາຍແລະເສັ້ນທາງມີຄວາມພ້ອມຈັ່ງຄ່ອຍເອົາອອກມາຂ້າງນອກ.
ໂອກາດນີ້ທ່ານເຈົ້າແຂວງຊຽງຮາຍໄດ້ກ່າວວ່າ ນີ້ເປັນຜົນງານການຊ່ວຍເຫຼືອຂອງຫຼາຍພາກສ່ວນ ລວມທັງໜ່ວຍກູ້ໄພຈາກຫຼາຍປະເທດທົ່ວໂລກ, ເປັນປະຫວັດສາດ ແລະຄວາມສຳເລັດທີ່ທົ່ວໂລກຈະຈົດຈຳຕະຫຼອດໄປ.
