ສຳນັກຂ່າວ ບີບີຊີລາຍງານວ່າ ລັດຖະບານປະເທດແອວຈີເຣຍໄດ້ສັ່ງຕັດສັນຍານອິນເຕີເນັດທົ່ວປະເທດໃນລະຫວ່າງການສອບເສັງຊັ້ນມັດທະຍົມປາຍເພື່ອແກ້ໄຂບັນຫາການກ່າຍບົດສອບເສັງ.
ເນື້ອໃນຂ່າວລະບຸວ່າ ການໃຫ້ບໍລິການອິນເຕີເນັດທັງຜ່ານທາງອຸປະກອນເຄື່ອນທີ່ ແລະ ສາຍອິນເຕີເນັດຄວາມໄວສູງຈະຖືກຕັດເປັນເວລາ 1 ຊົ່ວໂມງຫຼັງຈາກທີ່ການທົດສອບຄວາມຮູ້ພື້ນຖານຂອງໂຮງຮຽນມັດທະຍົມທົ່ວປະເທດເລີ່ມຕົ້ນຂຶ້ນ ເພື່ອຍຸຕິການຮົ່ວໄຫຼຂອງຂໍ້ມູນ ໂດຍການຕັດລະບົບອິນເຕີເນັດຈະຖືກດຳເນີນໄປຕະຫຼອດໄລຍະສອບເສັງ ຕັ້ງແຕ່ວັນທີ 20-25 ມິຖຸນານີ້.
ມາດຕະການນີ້ມີຂຶ້ນຫຼັງຈາກມີການໂກງບົດສອບເສັງທົ່ວປະເທດໃນປີ 2016 ເຊິ່ງມີຫຼາຍຄໍາຖາມຮົ່ວໄຫຼອອກມາທາງອອນລາຍທັງກ່ອນ ແລະ ໃນລະຫວ່າງການສອບເສັງ. ດ້ວຍເຫດຜົນນີ້ເຮັດໃຫ້ທາງລັດຖະບານຮ້ອງຂໍໃຫ້ຜູ້ບໍລິການອິນເຕີເນັດປິດການເຂົ້າເຖິງໂຊຊຽວມີເດຍໃນປີທີ່ຜ່ານມາ ແຕ່ມາດຕະການແບບສະໝັກໃຈນີ້ກໍບໍ່ພຽງພໍ.
ທ່ານນາງ ນູເຣຍ ເບັງກາບຣິດ, ລັດຖະມົນຕີກະຊວງສຶກສາປະເທດແອວຈີເຣຍກ່າວກັບໜັງສືພິມອັນນາຮາວາສ ຈະມີການບລັອກການເຂົ້າເຖິງເຟສບຸກທົ່ວປະເທດຕະຫຼອດໄລຍະເວລາການສອບເສັງ.
ທ່ານນາງ ນູເຣຍ ກ່າວອີກວ່າ ທາງລັດຖະບານຮູ້ສຶກບໍ່ສະບາຍໃຈກັບການຕັດສິນໃຈຄັ້ງນີ້ ແຕ່ກໍຮູ້ສຶກວ່າບໍ່ຄວນເມີນເສີຍກັບເຫດການທີ່ອາດຈະມີການຮົ່ວໄຫຼຂອງຫົວບົດສອບເສັງໄດ້.
ນອກຈາກນີ້, ອຸປະກອນອີເລັກໂຕຣນິກທີ່ສາມາດເຂົ້າເຖິງອິນເຕີເນັດໄດ້ທັງສຳລັບນັກຮຽນ, ຄູອາຈານ ແລະ ເຈົ້າໜ້າທີ່ໂຮງຮຽນ ຈະຖືກສັ່ງຫ້າມນໍສເຂົ້າມາໃນອາຄານສະຖານທີ່ສອບເສັງ ຈໍານວນ 2000 ແຫ່ງທົ່ວປະເທດ ໂດຍຈະມີການຕິດຕັ້ງເຄື່ອງກວດຈັບໂລຫະໄວ້ທີ່ປະຕູທາງເຂົ້າ. ທ່ານນາງ ນູເຣຍ ຍັງເສີມຕື່ມອີກວ່າ ມີການຕິດຕັ້ງກ້ອງວົງຈອນປິດ ແລະ ເຄື່ອງລົບກວນສັນຍານໂທລະສັບມືຖືໄວ້ທີ່ໂຮງພິມບົດເສັງທຸກແຫ່ງ.
ນັກຮຽນໃນທົ່ວປະເທດແອວຈີເຣຍຫຼາຍກວ່າ 700.000 ຄົນຈະເຈົ້າເສັງເພື່ອຈົບການສຶກສາໃນອາທິດໜ້າ ແລະ ຄາດວ່າຈະຮູ້ຜົນການສອບເສັງໃນວັນທີ 22 ກໍລະກົດນີ້.