ໃນວັນສຸກ, ວັນທີ 15 ມິຖຸນາ 2018 ເວລາ 15:00 ມີພົນລະເມືອງດີໄດ້ພົບເຫັນ ທ້າວ ກູດແກ້ວ, ອາຍຸ 35 ປີ, ສັນຊາດລາວ, ອາຊີບກຳມະກອນ ພັກເຊົາຢູ່ບ້ານໂນນແກ້ວ ໜ່ວຍ 15 ເມືອງສີໂຄດຕະບອງ ນະຄອນຫຼວງວຽງຈັນ ໄດ້ນໍາໃຊ້ລໍ້ຍູ້ ເອົາຂີ້ຫຍື້ອໄປລັກຖີ້ມ ຢູ່ເສັ້ນທາງບ້ານໂນນແກ້ວ – ບ້ານສະຫວ່າງ, ດັ່ງນັ້ນ ປກສ ບ້ານໂນນແກ້ວ ແລະ ບ້ານໂນນສະຫວ່າງ ຈຶ່ງໄດ້ ກັກຕົວຜູ້ກ່ຽວ ແລະ ດຳເນີນການກ່າວຕັກເຕືອນ ພ້ອມປັບໃໝ ຕາມມາດຕາ 3 ຂໍ້ 3.1 ວ່າດ້ວຍແຜນວຽກ ແລະ ມາດຕະການເສັ້ນທາງສະອາດ ຂອງມະຕິຕົກລົງອົງການປົກຄອງສະບັບເລກທີ 03/ອປຄ.ນວ, ລົງວັນທີ25 ກັນຍາ 2015, ເປັນຈຳນວນເງິນ 500,000 ກີບ, ( ຊຶ່ງໃນນີ້ ໄດ້ແບ່ງໃຫ້ຜູ້ພົບເຫັນ 30% ເຫລືອ 70% ອຳນາດການປົກຄອງບ້ານນຳໃຊ້ເຂົ້າໃນວຽກລວມຂອງບ້ານ) ພ້ອມທັງເຮັດບົດບັນທຶກ ຖ້າພົບເຫັນອີກເທື່ອໜ້າ ຈະໄດ້ປັບໃໝເພີ່ມອີກ 10 ເທົ່າ.
ດັ່ງນັ້ນ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ຂໍຄວາມຮ່ວມມື້ມາຍັງພໍ່ແມ່ປະຊາຊົນ ຈົ່ງຊ່ວຍກັນເປັນຫູເປັນຕາ ຖ້າພົບເຫັນໃຫ້ແຈ້ງອຳນາດການປົກຄອງບ້ານ ຫຼື ຫ້ອງການ ຄບຕ ໂທ: 020 56621164.