ສຳນັກຂ່າວຕ່າງປະເທດລາຍງານຈາກເມືອງສະໂກເປຍ, ປະເທດມາເຊໂດນີ ເມື່ອວັນທີ 13 ມິຖຸນາວ່າ ນາຍົກລັດຖະມົນຕີ ໂຊຣານ ເຊຟ ຜູ້ນຳແຫ່ງປະເທດມາເຊໂດນີ ກ່າວເລື່ອງການບັນລຸ ຂໍ້ຕົກລົງແກ້ໄຂທາງປະຫວັດສາດ ກັບນາຍົກລັດຖະມົນຕີ ອະເລັກຊິສ ຊີປຣາສ ຜູ້ນຳແຫ່ງປະເທດເກຣັກ ໃນການປ່ຽນຊື່ຢ່າງເປັນທາງການຂອງປະເທດມາເຊໂດນີ ຈາກ ສາທາລະນະລັດມາເຊໂດນີ ເປັນ ສາທາລະນະລັດປະຊາທິປະໄຕມາເຊໂດນີເຫນືອ ເພື່ອຍຸຕິຄວາມຂັດແຍ່ງທີ່ຢືດເຢື້ອຍາວນານເຖີງ 27 ປີ ຫລື ນັບຕັ້ງແຕ່ມາເຊໂດນີໄດ້ຮັບເອກະລາດຈາກການລົ້ມສະລາຍຂອງຢູໂກສລາເວ ເມື່ອປີ 1991.
ທັງນີ້ ລັດຖະບານເອເທນຣ໌ ຊື່ງເປັນປະເທດໃກ້ຄຽງທີ່ຕັ້ງຢູ່ທາງເຫນືອຮຽກຮ້ອງໃຫ້ມາເຊໂດນີ ປ່ຽນຊື່ປະເທດມາໂດຍຕະຫລອດ ໂດຍໃຫ້ເຫດຜົນວ່າ ເປັນຊື່ດຽວກັບພູມຖານມາເຊໂດນີທີ່ຢູ່ທາງເຫນືອຂອງປະເທດ ແລະ ເປັນຊື່ຊໍ້າກັບອານາຈັກມາເຊໂດນີຂອງອະເລັກຊານເດີ ມະຫາລາຊ ກະສັດທີ່ມີຊື່ສຽງທີ່ສຸດໃນປະຫວັດສາດເກຣັກບູຮານ ນອກຈາກນີ້ ຄົນເກຣັກຍັງມີຄວາມວິຕົກກັງວົນວ່າ ລັດຖະບານມາເຊໂດນີອາດໃຊ້ຊື່ທີ່ຄືກັນ ເພື່ອຜົນປະໂຫຍດຂອງການຮວບຮວມດິນແດນສ່ວນນີ້ເຂົ້າກັນໃນອະນາຄົດ ແລະ ເປັນປັດໃຈສຳຄັນທີ່ຈະເຮັດໃຫ້ລັດຖະບານເອເທນ ຂັດຂວາງຄວາມພະຍາຍາມເຂົ້າເປັນສະມາຊິກສະຫະພາບເອີຣົບ (EU) ແລະ ອົງກອນສົນທິສັນຍາແອດແລນຕິກເຫນືອ (NATO) ມາຕະຫລອດ ຂະນະທີ່ສະຫະປະຊາຊາດ (UN) ພະຍາຍາມໄກ່ເກ່ຍມາແລ້ວຫລາຍຄັ້ງແຕ່ບໍ່ເຄີຍປະສົບຜົນສຳເລັດ.
ດ້ານຊີປຣາສ ກ່າວຢູ່ທີ່ເມືອງຫລວງເທນຣ໌ ວ່າການບັນລຸຂໍ້ຕົກລົງຄັ້ງສຳຄັນນີ້ ທີ່ເປັນຜົນຈາກການສົນທະນາທາງໂທລະສັບຕໍ່ເນື່ອງ 3 ມື້ ລະຫວ່າງລັດຖະບານຂອງທັງສອງປະເທດ ຄືໄຊຊະນະທາງການທູດຂອງທັງສອງຝ່າຍ ແລະ ການສ້າງໂອກາດທາງປະຫວັດສາດຄັ້ງຍີ່ງໃຫຍ່ ພ້ອມທັງຂໍໃຫ້ 140 ປະເທດທົ່ວໂລກຮັບຮອງເອກະລາດຂອງມາເຊໂດນີຮ່ວມກັນ ຮັບຮອງຊື່ໃຫມ່ຂອງມາເຊໂດນີທັງໃນພາສາອັງກິດ ແລະ ພາສາສະໂລວັກ ທີ່ຈະມີການຢື່ນຫນັງສືແຈ້ງເຖີງ UN ຕໍ່ໄປ.
ແຫລ່ງຂ່າວຕ່າງປະເທດ : TDN