ສຳນັກຂ່າວ AF ແລະ AP ລາຍງານຈາກເມືອງຫລວງກົວລາລຳເປີ, ປະເທດມາເລເຊຍ ເມື່ອວັນທີ 23 ພຶດສະພາ ວ່າເຄື່ອງບິນໂບອີ້ງ 777-200ER ຖ້ຽວບິນ MH370 ລຳລຽງຜູ້ໂດຍສານ 227ຄົນ ຈາກ 15ປະເທດ ພ້ອມດ້ວຍນັກບິນ ແລະ ລູກເຮືອມາເລເຊຍ 12ຄົນ ຫາຍສາບສູນໄປຢ່າງລຶກລັບຫລັງທ່ຽງຄືນຂອງວັນທີ 7 ມີນາ 2014 ຫລັງອອກເດີນທາງຈາກເມືອງກົວລາລຳເປີ, ມາເລເຊຍ ມຸ່ງຫນ້າສູ່ເມືອງຫລວງປັກກີ່ງຂອງຈີນ.
ປະຕິບັດການຄົ້ນຫາຄັ້ງໃຫຍ່ສຸດໃນປະຫວັດສາດຂອງວົງການ ການບິນພົນລະເຮືອນໂດຍທີມຜູ້ຊ່ຽວຊານຂອງອົດສະຕາລີ, ມາເລເຊຍ ແລະ ຈີນ ຄວບຄຸມພື້ນທີ່ 120,000 ຕາລາງກິໂລແມັດ ໃນມະຫາສະຫມຸດອິນເດຍ ແລະ ຫມົດຄ່າໃຊ້ຈ່າຍໄປແລ້ວປະມານ 200 ລ້ານໂດລາອົດສະຕາລີ ຫລືປະມານ 1,331,200 ລ້ານກີບ ລະງັບລົງໃນເດືອນ ມັງກອນປີທີ່ແລ້ວ ແຕ່ຫລັງຈາກ ຖືກກົດດັນຈາກບັນດາຍາດພີ່ນ້ອງຂອງຜູ້ປະສົບເຄາະຮ້າຍ ລັດຖະບານມາເລເຊຍກໍຕົກລົງຮັບຂໍ້ສະເຫນີຈາກບໍລິສັດສຳຫລວດໃຕ້ພື້ນມະຫາສະຫມຸດແຫ່ງສະຫະລັດ ‘ໂອຊຽນ ອິນຟີນີຕີ້’ ເລີ່ມທຳການຄົ້ນຫາໃຫມ່ອີກຮອບໃນເດືອນ ມັງກອນ ຂອງປີນີ້ ໂດຍມີເງື່ອນໄຂວ່າລັດຖະບານມາເລເຊຍຈະຈ່າຍຄ່າຈ້າງໃຫ້ 70ລ້ານໂດລາສະຫະລັດ ຫລື ປະມານ 574,700 ລ້ານກີບ ຖ້າຫາກສາມາດຄົ້ນພົບຮ່າງເຮືອບິນດັ່ງກ່າວ ຫລື ກ່ອງດຳ.
ບໍລິສັດ ໂອຊຽນ ອິນຟີນີຕີ້ ແຫ່ງເມືອງ ຮິວສ໌ຕັນ, ລັດເທັກຊັດ ໃຊ້ເຮືອສຳຫລວດໃຕ້ທະເລ ຊີເບດ ຄອນສະຕັກເຕີ ຕິດຕັ້ງອຸປະກອນ ແລະ ເຕັກໂນໂລຢີທີ່ທັນສະໄຫມທີ່ສຸດເທົ່າທີ່ມີຢູ່ໃນປະຈຸບັນ ທຳການຄົ້ນຫາໃນພື້ນທີ່ 86,000 ຕາລາງກິໂລແມັດ ທາງຕອນໃຕ້ຂອງມະຫາສະຫມຸດອິນເດຍ ແຕ່ບໍ່ມີວີ່ແວ່ວ່າຈະພົບເຈີຮ່າງ MH370 ຕາມເຄີຍ ແລະ ຕາມຂໍ້ຕົກລົງການຄົ້ນຫາຈະສີ້ນສຸດລົງໃນທ້າຍເດືອນ ເມສາ ແຕ່ກໍຜ່ອນຜັນມາຈົນເຖີງທ້າຍເດືອນນີ້.
ລັດຖະມົນຕີວ່າການກະຊວງຄົມມະນາຄົມຄົນໃຫມ່ຂອງມາເລເຊຍ, ແອນໂທນີ ລ໊ອດ ເຜີຍວ່າ ການຄົ້ນຫາຈະດຳເນີນຕໍ່ໄປຈົນເຖີງວັນທີ 29 ພຶດສະພາ ຫາກການຄົ້ນຫາຍັງບໍ່ພົບຮ່າງເຮືອບິນ ຫລື ກ່ອງດຳ ລັດຖະບານກໍບໍ່ຕ້ອງຈ່າຍຄ່າເສຍເວລາໃຫ້ບໍລິສັດ ໂອຊຽນ ອິນຟີນີຕີ້ ຕາມທີ່ໄດ້ຕົກລົງກັນໄວ້.
ການປະກາດແມ່ນມີຂື້ນຂະນະທີ່ລັດຖະບານຊຸດໃຫມ່ຂອງມາເລເຊຍ ພາຍໃຕ້ການນຳພາຂອງ ດຣ. ມະຫາເທຣ໌ ໂມຮັມມັດ ພະຍາຍາມຈະລົດລາຍຈ່າຍຂອງລັດຖະບານ ຫລັງຈາກກວດພົບຫນີ້ສິນສາທາລະນະຈຳນວນຫລາຍຂອງປະເທດ.
ແຫລ່ງຂ່າວຕ່າງປະເທດ: TDN