ທະຫານໜຸ່ມອີຣັກ ອອກມາເປີດເຜີຍປະສົບການທຳທ່າຕາຍ ເພື່ອລອດຊີວິດຈາກເຫດການກອງກຳລັງ IS ສັງຫານໝູ່
ເມື່ອວັນທີ 4 ກັນຍາ 2014 ທີ່ຜ່ານມາ ເວັບໄຊຂ່າວຂອງຕ່າງປະເທດ ເປີດເຜີຍເລື່ອງລາວຂອງທະຫານໜຸ່ມຊາວອີຣັກ
ອາຍຸ 23 ປີ ທີ່ເອົາໂຕລອດຈາກເຫດການສັງຫານໝູ່ຂອງກຸ່ມກໍ່ການຮ້າຍລັດອິດສະລາມ ຫຼື IS ມາໄດ້ ເພາະໄດ້ເຮັດທຳ
ທ່າວ່າຕົນເອງໄດ້ຕາຍໄປແລ້ວ.
ທະຫານໜຸ່ມລາຍນີ້ຄື ທ້າວ ອາລີ ຮຸນເຊນ ຄາທິມ ເຂົາເປັນໜຶ່ງໃນທະຫານທີ່ຖືກກອງກຳລັງລັດອິດສະລາມ ຄວບຄຸມ
ໂຕໄປສັງຫານໝູ່ ເມື່ອເດືອນມິຖຸນາທີ່ຜ່ານມາ ເຊິ່ງໃນມື້ນັ້ນຖືເປັນໜຶ່ງໃນມື້ສັງຫານໝູ່ຄັ້ງໃຫຍ່ທີ່ສຸດຂອງກຸ່ມກໍ່ການ
ຮ້າຍກຸ່ມນີ້, ພວກເຂົາໄດ້ນຳຄົນໄປສັງຫານຫຼາຍເຖິງ 1,700 ຄົນ ໂດຍມີພຽງເຂົາຄົນດຽວທີ່ສາມາດລອດຊີວິດມາໄດ້.
ທ້າວ ອາລີ ໄດ້ເລົ່າຄືນວ່າ ໃນມື້ສັງຫານໝູ່ວັນນັ້ນ ກອງກຳລັງລັດອິດສະລາມ ໄດ້ຈັບທະຫານມານອນຮຽງກັນເປັນແຖວ
ໂດຍເຂົາເປັນຄົນທີ 4 ແລະ ເມື່ອການສັງຫານເລີ່ມຕົ້ນຂຶ້ນ ກອງກຳລັງດັ່ງກ່າວກໍໄດ້ຈໍ່ຍິງທີ່ຫົວຂອງທະຫານເປັນແຕ່ລະ
ລາຍບຸກຄົນ, ເຂົາໄດ້ຍິນສຽງປືນດັງ 3 ຄັ້ງ ແລະ ເຫັນຄົນຢູ່ຂ້າງໆມີເລືອດຟົ້ງອອກມາຈາກຫົວເທື່ອລະຄົນ ແຕ່ແລ້ວເມື່ອ
ສຽງປືນດັງເປັນຄັ້ງທີ 4 ກະສຸນລູກປືນຊ້ຳພັດບໍ່ໄດ້ຖືກໂຕເຂົາ ແຕ່ກັບໄປຖືກຢູ່ບ່ອນໃດກໍບໍ່ຮູ້, ເຖິງແນວໃດກໍຕາມ ເຂົາ
ໄດ້ເຮັດທຳທ່າວ່າຕົນເອງຕາຍ ຈົນໃນທີ່ສຸດກໍເອົາຊີວິດລອດມາໄດ້.
ແນ່ນອນວ່າ ການລອດຊີວິດຈາກການສັງຫານໝູ່ໃນຄັ້ງນີ້ ໄດ້ເຮັດໃຫ້ຄອບຄົວຂອງເຂົາ ແລະ ລູກສາວຂອງເຂົາດີໃຈ
ເປັນຢ່າງຍິ່ງ ໃນຂະນະທີ່ ທ້າວ ອາລີ ເອງກໍໄດ້ເວົ້າວ່າ ມັນເປັນປາຕິຫານແທ້ໆ ທີ່ເຂົາສາມາດລອດຊີວິດມາໄດ້ຄືແນວນີ້.