ເຈົ້າຫນ້າທີ່ທາງການບຣາຊິນ ລາຍງານວ່າມີຜູ້ເສຍຊີວິດຢ່າງຫນ້ອຍ 21 ຄົນ ຈາກການທີ່ນັກໂທດພະຍາຍາມໂຕນຄຸກໃນເຮືອນຄຸມຂັງທາງຕອນເຫນືອຂອງປະເທດ ໂດຍມີກຸ່ມຕິດອາວຸດຈາກພາຍນອກໃຫ້ການຊ່ວຍເຫລືອລະເບີດກຳແພງ.
ຫນ່ວຍງານຄວາມຫມັ້ນຄົງໃນລັດປາຣາ ຂອງບຣາຊິນ ລະບຸວ່າການໂຕນຄຸກທີ່ເຮືອນຄຸມຂັງຊານຕາອິຊາເບລ ໃກ້ເມືອງເບເລງ, ລັດປາຣາ ຄ້າຍຄືກັນກັບການສູ້ຮົບຂອງທະຫານ ແລະ ມີການໃຊ້ລະເບີດທຳລາຍກຳແພງ ລາຍງານເບື້ອງຕົ້ນລະບຸວ່າມີກຸ່ມຕິດອາວຸດສະຫນັບສະຫນູນໃນການພະຍາຍາມໂຕນຄຸກໃນຄັ້ງນີ້ ແລະ ນັກໂທດໃນຄຸກກໍມີອາວຸດອີກດ້ວຍ. ຜູ້ຮັກສາຄວາມປອດໄພພາຍໃນຄຸກໄດ້ພະຍາຍາມຄວບຄຸມສະຖານະການຢ່າງສຸດຂີດ ແຕ່ກໍບໍ່ພົ້ນເກີດມີການປະທະກັນຢ່າງດຸເດືອດ. ລາຍງານວ່ານັກໂທດ ແລະ ຄົນພາຍນອກເສຍຊີວິດ 20 ຄົນ ແລະ ອີກ 1 ຄົນ ແມ່ນຜູ້ຄຸມຂອງເຮືອນຄຸມຂັງ.
ນອກຈາກນີ້ຍັງມີຜູ້ຄຸມບາດເຈັບອີກຈຳນວນ 5 ຄົນ, ຫນື່ງໃນນັ້ນແມ່ນມີອາການສາຫັດ ລາຍງານລະບຸວ່າຕຳຫລວດເສີມກຳລັງຮັກສາຄວາມປອດໄພຢ່າງຫນາແຫນ້ນ ກວດຄົ້ນພົບເຫັນປຶນລູກຊອງຍາວ 2 ກະບອກ ແລະ ປີນພົກພາອີກ 5 ກະບອກໃນສະຖານທີ່ເກີດເຫດ.
ສະຖິຕິຂອງທາງການບຣາຊິນລະບຸວ່າ ນັບແຕ່ເດືອນມິຖຸນາ 2016 ມີນັກໂທດເປັນຈຳນວນ 726.712 ຄົນ ແຕ່ເຮືອນຄຸມຂັງສາມາດຮັບຮອງໄດ້ພຽງແຕ່ 368.000 ຄົນເທົ່ານັ້ນ. ນີ້ອາດເປັນອີກເຫດຫນື່ງທີ່ເຮັດໃຫ້ເກີດມີປະກົດການດັ່ງກ່າວເກີດຂື້ນ.
ແຫລ່ງຂ່າວຕ່າງປະເທດ: TNA