ສື່ດັງຕ່າງຊາດ ‘ຣອຍເຕີ້’ ເຜີຍແຜ່ຂ່າວ ແລະພາບຂ່າວໄປທົ່ວໂລກ ແມ້ແຕ່ສາຍການບິນໄທຍັງໃຫ້ສາວບໍລິການເທີງຍົນ(ສາວແອຣ໌) ແຕ່ງກາຍດ້ວຍຊຸດໄທເພື່ອຕ້ອນຮັບເທສະການປີໃຫມ່ທີ່ຍັບເຂົ້າມາໃກ້ຮອດນີ້.
ສຳນັກຂ່າວຣອຍເຕີ້ລາຍງານເມື່ອວັນທີ 8 ເມສາ ວ່າກະແສຄວາມນິຍົມຂອງການແຕ່ງກາຍຊຸດໄທໃນກຸງເທບໄດ້ຮັບຄວາມນິຍົມຫລາຍຈົນເຮັດໃຫ້ຜູ້ດຳເນີນທຸລະກິດຊຸດໄທຍອມຮັບວ່າໃນຊ່ວງ 30 ປິທີ່ເຮັດທຸລະກິດມາ ບໍ່ເຄີຍມີຊ່ວງໃດໄດ້ຮັບຄວາມນິຍົມຫລາຍເທົ່າຊ່ວງເວລານີ້ ເພາະກະແສເລື່ອງລາວປະຫວັດສາດປະກອບກັບຄົນໄທທີ່ຫັນມານິຍົມແຕ່ງຊຸດໄທຫລາຍຍີ່ງຂື້ນ ສ່ວນຫນື່ງແມ່ນມາຈາກລັດຖະບານ ແລະ ສຳນັກພະລາຊະວັງ ລວມເຖີງລະຄອນໂທລະທັດຊື່ດັງ.
ທັງນີ້ກະແສຄວາມນິຍົມແຕ່ງກາຍຊຸດໄທຊື່ງເລີ່ມມາຈາກງານ ‘ອຸ່ນອາຍຮັກ’ ໂດຍພະລາຊະດຳຣິຂອງສົມເດັດພະເຈົ້າຢູ່ຫົວ ມະຫາຊິຣາລົງກອນ ເມື່ອເດືອນກຸມພາ ທີ່ຜ່ານມາ. ນອກຈາກນັ້ນແລ້ວ, ລະຄອນໂທລະທັດເລື່ອງ ‘ບຸບເພສັນນິວາດ’ ທາງສະຖານີໂທລະພາບໄທທີວີສີຊ່ອງ 3 ໄດ້ບອກເລົ່າເຖີງເລື່ອງລາວໃນຍຸກສົມເດັດພະນາຣາຍສະໄຫມກຸງສີອາຍຸທະຍາໄດ້ເປັນທີ່ຍິນດີຍີ່ງ ເຮັດໃຫ້ນັກທ່ອງທ່ຽວຊາວໄທໄປທ່ຽວແຂວງພະນະຄອນສີອາຍຸທະຍາຫລາຍຍີ່ງຂື້ນ ຈຳນວນນັກທ່ອງທ່ຽວທີ່ເດີນທາງໄປທ່ອງທ່ຽວແມ່ນເພີ່ມຂື້ນເປັນ 3 ເທົ່າໃນຊ່ວງທີ່ຜ່ານມາຕາມລາຍງານຈາກທ້ອງຖີ່ນ.
ດ້ານນາຍົກລັດຖະມົນຕີ ພົນເອກ ປະຢຸດ ຈັນໂອຊາ ຍັງໄດ້ພົບປະ ແລະ ຊື່ນຊົມຕໍ່ກັບບັນດານັກສະແດງໃນລະຄອນໂທລະທັດເລື່ອງ ‘ບຸບເພສັນນິວາດ’ ວ່ານີ້ແມ່ນຕົວຢ່າງຂອງນະໂຍບາຍທີ່ລັດຖະບານພະຍາຍາມດຳເນີນມາກ່ຽວກັບເລື່ອງນະໂຍບາຍໄທນິຍົມ ຊື່ງນາຍົກລັດຖະມົນຕີເອງກໍເຄີຍນຳໃຊ້ຊຸດປະຈຳຊາດເຂົ້າໃນການປະຊຸມໃນຄະນະລັດຖະມົນຕີໃນຊ່ວງຫລາຍຄັ້ງທີ່ຜ່ານມາດ້ວຍ.
ແຫລ່ງຂ່າວຕ່າງປະເທດ: TDN