ເມື່ອບໍ່ດົນມານີ້, ຄະນະກຳມະການ ວ່າດ້ວຍນະໂຍບາຍ ເພື່ອການພັດທະນາ, ເຊິ່ງເປັນໜ່ວຍງານ ສະເພາະກິດໜຶ່ງ ຂອງ ສະພາເສດຖະກິດ-ສັງຄົມ ອົງການສະຫະປະຊາຊາດ (ສປຊ) ຕັ້ງຢູ່ນິວຢອກ ໄດ້ປະກາດວ່າ: ສປປ ລາວ ປະຕິບັດໄດ້ຕາມເງື່ອນໄຂ ແລະ ມາດຕະຖານ ຂອງ ອົງການສະຫະປະຊາຊາດ ໃນການຫລຸດພົ້ນອອກຈາກສະຖານະພາບຂອງການເປັນປະເທດດ້ອຍພັດທະນາຄັ້ງທຳອິດ. ຄະນະກຳມະການດັ່ງກ່າວ ທົບທວນຄວາມຄືບໜ້າ ເພື່ອຈະຫລຸດພົ້ນອອກຈາກສະຖານະພາບດ້ອຍພັດທະນາຂອງແຕ່ລະປະເທດໃນທຸກໆ ສາມປີ. ໃນນັ້ນ ປະເທດທີ່ຈະສາມາດຫລຸດພົ້ນ ອອກຈາກສະຖານະພາບດັ່ງກ່າວ ໄດ້ຕ້ອງໃຫ້ໄດ້ສອງໃນສາມເງື່ອນໄຂ ແລະ ມາດຕະຖານທີ່ວາງໄວ້.
ການປະເມີນຜົນ ແລະ ທົບທວນ ໃນປີ 2018 ເຫັນວ່າ: ສປປ ລາວ ສາມາດບັນລຸຕາມເງື່ອນໄຂ ແລະ ເກນມາດຕະຖານຂັ້ນຕໍ່າຂອງຍອດລາຍຮັບແຫ່ງຊາດ ຕໍ່ຫົວຄົນ(GNI) ແລະ ດັດຊະນີຊັບສິນມະນຸດ (HAI), ທີ່ເປັນດັດຊະນີ ປະສົມປະສານ ຂອງການປະເມີນ ຊັບສິນມະນຸດ. ເຖິງແນວໃດກໍ່ຕາມ, ສປປ ລາວ ກໍ່ຍັງບໍ່ທັນໄດ້ ຕາມເກນມາດຕະຖານ ຂອງດັດຊະນີຄວາມອອ່ນໄຫວ ດ້ານເສດຖະກິດ(EVI) ເທື່ອ, ທີ່ເປັນມາດຕະຖານວັດແທກ ຄວາມກຽມພ້ອມ ແລະ ຢືດຢຸນໄດ້ ໃນເວລາເສດຖະກິດບໍ່ມີສະຖຽນລະພາບ ຫລືຖືກແຮງກົດດັນ. ສະນັ້ນ, ຖ້າ ຫາກ ສປປ ລາວ ສາມາດຮັກສາໄວ້ໄດ້ ຂີດລະດັບການພັດທະນາ ແລະ ສາມາດ ບັນລຸຕາມເງື່ອນໄຂ ແລະ ມາດຕະຖານ ໃນລັກສະນະດັ່ງກ່າວ ໃນປີ 2021, ສປປ ລາວ ກໍຈະຖືກລົບອອກຈາກບັນຊີ ຂອງການເປັນປະເທດດ້ອຍພັດທະນາ ຢ່າງເປັນທາງການ ໃນປີ 2024.
ທ່ານນາງ ຄາຣີນາ ອີມໂມເນັນ ຜູ້ປະສານງານ ອົງການສະຫະປະຊາຊາດ ໄດ້ກ່າວວ່າ: ພວກເຮົາ ມີຄວາມຍິນດີ ຕໍ່ຜົນສຳເລັດ ທີ່ມີຄວາມສຳຄັນ ໃນຄັ້ງນີ້ ຂອງລັດຖະບານລາວ ເຊິ່ງສະແດງ ໃຫ້ເຫັນເຖິງຄວາມກ້າວໜ້າອັນຕໍ່ເນື່ອງ ພາຍໃຕ້ ການວາງແຜນນະໂຍບາຍທີ່ດີ ແລະ ຖືກຕ້ອງ, ເພື່ອກ້າວໄປສູ່ ຜົນສຳເລັດ ຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 8. ອົງການສະຫະປະຊາຊາດ ຈະສືບຕໍ່ ໃຫ້ການສະໜັບສະໜູນຊ່ວຍເຫລືອ ສປປ ລາວ ໃນຂະບວນການຕ່າງໆ ເພື່ອຫລຸດພົ້ນອອກຈາກ ສະຖານະພາບ ຂອງການເປັນປະເທດ ດ້ອຍພັດທະນາ ແລະ ເພື່ອບັນລຸວາລະແຫ່ງການ ພັດທະນາປີ 2030 ທີ່ມີຄວາມຍືນຍົງ, ຄວາມສະເໝີພາບ, ວັດທະນາຖາວອນ ແລະ ບໍ່ປະປ່ອຍໃຜໄວ້ ຢູ່ເບື້ອງຫລັງ.
ຄະນະກຳມະການ ວ່າດ້ວຍນະໂຍບາຍ ເພື່ອການພັດທະນາແຈ້ງວ່າ: ຍອດລາຍຮັບແຫ່ງຊາດ ຕໍ່ຫົວຄົນ(GNI) ຂອງ ສປປ ລາວ ແມ່ນ 1,996 ໂດລາສະຫະລັດ ເຊິ່ງຫລາຍກວ່າເກນມາດຕະຖານ ຂັ້ນຕໍ່າ ຄື 1,230 ໂດລາສະຫະລັດ ຫລື ສູງກວ່ານັ້ນ ເຊິ່ງແມ່ນເກນມາດຕະຖານ ທີ່ວາງໄວ້ (1,232 ໂດລາສະຫະລັດ ເຊິ່ງທຽບໃສ່ປະລິມານທີ່ເພີ່ມຂຶ້ນ ເລັກນ້ອຍ 1,242 ໂດລາສະຫະລັດໃນປີ 2015). ສຳລັບ ດັດຊະນີ ຊັບສິນມະນຸດ ສາມາດບັນລຸໄດ້ 72.8 ທຽບໃສ່ເກນມາດຖານ ທີ່ວາງໄວ້ ເຊິ່ງແມ່ນ 66 ຫລື ສູງກວ່ານັ້ນ (60.8 ຢູ່ໃນລະດັບເດີມ ໃນປີ 2015) ແລະ ດັດສະນີຄວາມອ່ອນໄຫວ ດ້ານເສດຖະກິດ ສາມາດບັນລຸໄດ້ 33.7, ເຊິ່ງມີຄວາມໃກ້ຄຽງກັບເກນມາດຕະຖານ ຄື 32 ຫລື ຕໍ່າກວ່ານັ້ນ (36.2 ຢູ່ໃນລະດັບເດີມ ໃນປີ 2015).
ແຫລ່ງຂ່າວ : ຂ່າວສານປະເທດລາວ ແລະ ມ່ວນສະນຸກ