ເຈົ້າໜ້າທີ່ພະແນກຕ້ານ ແລະ ປາບປາມຢາເສບຕິດ ປກສ ແຂວງບໍ່ແກ້ວ ໄດ້ກັກຕົວສອງອ້າຍນ້ອງພ້ອມຂອງກາງ ເຮໂຣອິນ 120 ຫໍ່ ມີມູນຄ່າຫຼາຍຮ້ອຍລ້ານກີບ ທີ່ຊຸກເຊື່ອງໄວ້ໃນຖັງນ້ຳມັນ ລົດປຣາໂດ ສີປອນເງິນ ໝາຍເລກທະບຽນ ກຫ 0808 ກຳແພງນະຄອນ ທີ່ກຽມເຄື່ອນຍ້າຍຈາກແຂວງບໍ່ແກ້ວ ໃນວັນທີ 19 ມີນາ 2014.
ເຈົ້າໜ້າທີ່ພະແນກຕ້ານ ແລະ ປາບປາມຢາເສບຕິດ (ປກສ) ແຂວງບໍ່ແກ້ວ ໃຫ້ຮູ້ວ່າ: ພາຍຫຼັງໄດ້ຮັບລາຍງານວ່າ ມີລົດເປົ້າໝາຍໃນການຂົນສົ່ງ ແລະ ຄ້າຂາຍຢາເສບຕິດເຂົ້າມາເຄື່ອນໄຫວຢູ່ພາຍໃນແຂວງບໍ່ແກ້ວ ຈຶ່ງໄດ້ປະສານສົມທົບກັບພະແນກຕຳຫຼວດຈະລາຈອນແຂວງ ຕັ້ງດ່ານກວດຕາມສາຍທາງຫຼັກພາຍໃນແຂວງ ຜ່ານການຕິດຕາມກໍ່ພົບເຫັນລົດເປົ້າໝາຍ ຈຶ່ງໄດ້ທຳການກັກລົດຄັນດັ່ງກ່າວ ເພື່ອກວດຄົ້ນຫາສິ່ງທີ່ຜິດກົດໝາຍ ໃນຂະນະນັ້ນ ຜູ້ຖືກສົງໃສ 2 ຄົນທີ່ຢູ່ໃນລົດ ໄດ້ພະຍາຍາມເອົາຕົວຫຼົບໜີ ແຕ່ເຈົ້າໜ້າທີ່ສາມາດກັກຕົວໄວ້ໄດ້.
ຜ່ານການກວດກາເອກະສານທີ່ຕິດຕົວຂອງພວກກ່ຽວ ແລະ ຜົນການສອບສວນໃນເບື້ອງຕົ້ນຈຶ່ງຮູ້ວ່າ: ຜູ້ຖືກກ່າວຫາທັງສອງ ຊື່ທ້າວ ເກົ່າວ່າງ ອາຍຸ 30 ປີ ອາຊີບຄ້າຂາຍ ຢູ່ເມືອງຊຳເໜືອ ແຂວງຫົວພັນ ແລະ ທ້າວ ດົວວ່າງ ອາຍຸ 37 ປີ ອາຊີບຄ້າຂາຍ ຢູ່ແຂວງຊຽງຂວາງ ທັງສອງເປັນອ້າຍນ້ອງກັນ ເຊິ່ງໃນເມື່ອກ່ອນ ພວກກ່ຽວເຄີຍເປັນປະຊາຊົນຢູ່ບ້ານດອນທາດ ເມືອງຕົ້ນເຜິ້ງ ແຂວງບໍ່ແກ້ວ ຜ່ານການສອບສວນ ພວກກ່ຽວຮັບສາລະພາບວ່າ: ເຮໂຣອິນຈຳນວນດັ່ງກ່າວ ໄດ້ຊື້ຈາກປະເທດເພື່ອນບ້ານ ໂດຍມີຄົນເອົາມາສົ່ງໃຫ້ຢູ່ຊາຍແດນທີ່ເມືອງຕົ້ນເຜິ້ງ ປັດຈຸບັນ ຄະດີຢາເສບຕິດລາຍນີ້ ເຈົ້າໜ້າທີ່ (ປກສ) ແຂວງບໍ່ແກ້ວ ພວມເລັ່ງສອບສວນຂະຫຍາຍຜົນ ເປີດກວ້າງຮູບການຄະດີໄປຕາມຂັ້ນຕອນຂອງກົດໝາຍ.
ທີ່ມາ : http://www.vientianemai.net/teen/khao/1/11459