ໃນວັນທີ 5 ເມສາ ສຳນັກຂ່າວ Reuters ລາຍງານວ່າ ທ່ານນາຍົກລັດຖະມົນຕີ ບໍຣິສ ຈອນສັນ (Boris Johnson) ໄດ້ຖືກນຳສົ່ງໂຮງໝໍ ຫຼັງຈາກມີອາການຊໍາເຮື້ອຈາກພະຍາດໄວຣັສໂຄວິດ-19 ເປັນເວລາ 10 ມື້, ເຊິ່ງກ່ອນໜ້ານີ້ ທ່ານນາຍົກລັດຖະມົນຕີໄດ້ແຍກປ່ຽວຕົວເອງທີ່ບ້ານພັກຂອງທ່ານເອງ ຫຼັງຈາກກວດພົບເຊື້ອໄວຣັສດັ່ງກ່າວໃນວັນທີ 27 ມີນາທີ່ຜ່ານມາ.
ທາງສຳນັກງານນາຍົກກໍ່ໄດ້ອອກມາຢືນຢັນວ່າ ທ່ານນາຍົກລັດຖະມົນຕີຍັງຈະສືບຕໍ່ວຽກລັດຖະການຕໍ່ໄປ ພ້ອມກ່າວເພີ່ມຕື່ມວ່າການນຳສົ່ງນາຍົກເຂົ້າໄປກວດສອບອາການທີ່ໂຮງໝໍ ຖືເປັນການປ້ອງກັນລ່ວງໜ້າ ບໍ່ແມ່ນເຫດສຸກເສີນແຕ່ຢ່າງໄດ້. ກ່ອນໜ້ານີ້ ທ່ານນາຍົກລັດຖະມົນຕີ ກໍ່ໄດ້ປະຕິບັດເຮັດວຽກລັດຖະການຜ່ານການປະຊຸມທາງວີດິໂອ ພ້ອມລາຍງານເຖິງວຽກງານ ແລະ ອາການຂອງເພິ່ນທາງບັນຊີທະວິດເຕີ (Twitter: @BorisJohnson) ເຊິ່ງໃນວັນສຸກທີ 3 ເມສາທີ່ຜ່ານມາ ທ່ານນາຍົກໄດ້ລາຍງານວ່າຕົວທ່ານເອງໄຄຂຶ້ນ ແຕ່ມີໄຂ້ເລັກນ້ອຍ.
ຂະນະນີ້ ປະເທດອັງກິດໄດ້ມີກໍລະນີຜູ້ຕິດເຊື້ອ 47,806 ກໍລະນີ ເຊົາແລ້ວ 135 ກໍລະນີ ແລະ ເສຍຊີວິດ 4,934 ກໍລະນີ.
ຮຽບຮຽງໂດຍ: ວະນິດາ